Londelainga Lwitabilo Lwabo

1. Kutendeka mulungu wa October 19, ñanyi buku ye tukafundanga pa Lufunjisho lwa Baibolo lwa Kipwilo?

¹ Mu mulungu wa October 19, 2015, tukatendeka kufunda buku wa Londelainga Lwitabilo Lwabo pa Lufunjisho lwa Baibolo lwa Kipwilo. Uno buku waamba pa mashimikila a banabalume ne banabakazhi 14 banembwa mu Baibolo bajinga na lwitabilo. Ano mashimikila anembwa mu jishinda ja kwitulengela kufwanyikizha byapichilengamo bano bantu ba kishinka ne kwitukwasha kumona’mba bajinga bantu byonka byo tuji kabiji bapichilenga mu makatazho pa kwingijila Yehoba. Uno buku waamba pa byo tufunjilako ku ano mashimikila lelo jino.—Hebe. 6:12.

2. Lumbululai bintu bimo biji mu buku wa Londelainga Lwitabilo Lwabo.

² Biji mu uno Buku: Mu uno buku muji ne ndonda ya myaka ya bintu byanembwa mu Baibolo ne maapu a kwitukwasha kuyuka kimye ne mpunzha kwaikelenga muntu wanembwa mu Baibolo. Kabiji kitango kyonse kiji na “Mepuzho a Kulangulukapo. . . ,” akonsha kwitukwasha kulanguluka pa mashimikila ajimo ne byo twakonsha kwingijisha mafunjisho ajimo. Mu uno buku muji ne bipikichala byawama bingi byo balumbulula bulongo bya kwitukwasha kufwanyikizha bintu byamwekelenga.

3. Twakonsha kuba byepi pa kuba’mba tumwenemo mu kufunda uno buku?

³ Byo Mwakonsha Kumwenamo: Nkalata kufuma ku Jibumba Jitangijila itutundaika’mba: “Fwanyikizhainga ne kulanguluka pa byo mubena kutanga. Esekainga kufwanyikizha biumvwinenga bano bantu ne kumona byo bamwenenga. Esakanyai byo baubile kimye bintu bimo kyo bibamwekejile ne byo mwafwainwe kuba inge mwajingako.” Pano bino, kufwanyikizha kechi kulumbulula kukizhamo kulanguluka pa bintu byabujileko ne, bino, twafwainwa kufwanyikizhanga byaamba ano mashimikila ne kulanguluka pa bantu bajimo. Kuba bino kukebewa kimye ne kulanguluka langulukapo. (Ne. 8:8) Inge lufunjisho lwatendekela pakachi ka kitango, ubena kutangijila wafwainwa kwingijisha miniti umo ne kubwela panshi kupituluka mu byafunjiwe mu lufunjisho lwafumineko. Wakonsha kwipuzha bwipuzho bumo nangwa abiji a kupitulukamo inge mu lolo lufunjisho kechi muji “Mepuzho a Kulangulukapo . . . ” ne.

4. Mambo ka o twafwainwa kufunjila buku wa Londelainga Lwitabilo Lwabo?

⁴ Tubena kwikala mu ntanda ikeba konauna nangwa kukookesha lwitabilo lwetu mu mashinda apusana pusana. Uno buku kubikapo ne bibaba bikinembwa mu Kyamba kya Usopa paimena uno buku, ke bupe bwafuma kwi Yehoba bwa kwitukwasha kukosesha lwitabilo lwetu. (Yako. 1:17) Twayai twingijishenga buno bupe kupichila mu kutanwa ku Lufunjisho lwa Baibolo lwa Kipwilo kimye kyonse ne kukumbulapo kimye kyo tukafundanga uno buku.