“Wayuzha Ntulwa Yashajile mu Muchima Wami”

“NEMUSANCHILA kufuma panshi ya muchima wami pa kino kya bupe kyanengela byonkabye kya kutambwila buku wa ‘Palameni Kuli Yehova.’ Kine wayuzha ntulwa yashajile mu muchima wami, byo nayuka namba Yehoba wantemwa. Luno ñumvwa namba nji kwipi ne Yehoba ne Mwananji yeatemwisha. Mbena kubulako bantu pa ye uno buku ne kupapo batemwe bami.” Bino byambo byaambile Kamonyi wakwa Yehoba umo pa mambo a buku wakatataka wa mapeja 320, walupwilwe pa Kupwila kwa Nkambi kwa “Bamukoyo Wakutaya Mbila ya Bufumu” kwajingako mu 2002/03. Pano twayai tutongauleko pacheche bintu bimo biji mu uno buku wakatataka ne kine kintu kyo anembejilwe.

Bintu Bimo Biji mu uno Buku Wakatataka

Bika biji mu uno buku wakatataka? Mu uno Buku muji byambo byonse byaambiwapo mu mitwe ya kufundamo iji mu uno magazini, kabiji ne bikwabotu byavula! Uno buku uji na bitango 31, kitango kimo kyalepa byonka byalepa mutwe wa kufunda mu Kyamba kya Usopa. Kufuma pa byambo bitanshi, ne bitango byalondelapo bitanshi bisatu, buku waabana mu bipungu bina. Kipungu kimo kimo kyalumbululapo kyubilo kimo kya Yehoba. Kipungu kyonse kyatendeka na byambo byalumbulula kyokyo kyubilo. Bitango bikwabo bicheche byalondelapo mu kyokyo kipungu byaamba pe Yehoba byoamwesha kyokyo kyubilo. Mu kipungu kyonse muji kitango kyaamba pe Yesu. Mambo ka? Yesu waambile’mba: “Awa wammona amiwa wamona ne Batata.” (Yoano 14:9) Yesu byoamwesheshe byubilo bya Yehoba byonka byoaji, wamwesheshe bintu byotwakonsha kumwenako mingilo ya byubilo bya Lesa. Mpelo ya kipungu kyonse yapelako na kitango kibena kwitufunjisha byotwakonsha kulonda Yehoba mu kumwesha kyubilo kyaambiwapo mu kyokyo kipungu. Uno buku wakatataka waingijisha mabuku onse a mu Baibolo mu kulumbulula byubilo bya Yehoba.

Kabiji buku wa Palameni Kuli Yehova uji ne na bintu bikwabo byawama. Kutendeka na Kitango 2, kitango kyonse kiji na kabokoshi kaji na mutwe wakuba’mba “Mepuzho Akulangulukapo.” Binembelo ne mepuzho ajimo kechi anengezhewa amba akupitulukamo kwa kitango ne. Anembelwa kuba’mba emukwashe kwingijisha Baibolo kulanguluka pa yewo mutwe. Onkao mambo, mwafwainwa kutanga Kinembelo kyonse kyo mwatana. Apa bino mwalanguluka pa jipuzho jijipo, ne kweseka na ngovu kwingijisha byobyo byambo anweba bene. Kulanguluka languluka pa byo bino bintu kwakonsha kuzakula muchima wenu ne kwimufwenyesha kwipi ne Yehoba.—Masalamo 19:14.

Kabiji bipikichala biji mu buku wa Palameni Kuli Yehova nabyo bebipesele pesele bingi bulongo ne kwibinengezha kuba’mba bifunjishe ne kutundaika bantu. Muji bitango 17 biji na bipikichala bikatampe byawama bingi bibena kumwesha bintu byaubiwanga byanembwa mu Baibolo.

Mambo ka uno Buku Kyoanembelwa?

Mambo ka buku wa Palameni Kuli Yehova kyoanembelwa? Kintu kikatampe kyanembelwa uno buku ke kwitukwasha kuyuka bulongo Yehoba kuba’mba kitukwashe kwisampa bulunda bwa kine kine ne aye Lesa wetu.

Vulukaipo muntu wakonsha kufunda uno buku wa Palameni Kuli Yehova, kampe yemufunjisha Baibolo nangwa mulongo wa bwina Kilishitu nangwa nyenga wakoka. Nga anweba bene, mwatendeka kala kutanga uno buku wakatataka nyi? Umvwe mukyangye, nga mambo ka ne kutanchikapo kimye kya kumutanga lonka luno ne? Mwafwainwa kwikalangapo ne na kimye kya kulanguluka pa byomubena kutanga. Uno buku kine emukwashe kufwenya kwipi ne Yehoba Lesa, kuba’mba musapwile mambo awama a Bufumu bwanji na lusekelo lwa mukachi ka muchima wenu ne na mukoyo!