Mwenaimo mu Kufunda Buku wa Palameni Kuli Yehova

¹ Pa Kupwila kwa Nkambi kwa “Bamukoyo Wakutaya Mbila ya Bufumu,” twasangalele bingi pa kutambwila buku wa Palameni Kuli Yehova. Bavula bafikenejiletu ponkapo kumutanga. Kabiji bakwabo nabo kwakubula nangwa kuzhinaukatu ne, batundaikilwe kutendeka kumutanga panyuma ya kutambwila kinembelo kya mwaka wa 2003 kya kuba’mba: “Fwenyai kwipi ne Lesa, kabiji ne aye ukafwenya kwipi ne anweba.”—Yako. 4: 8.

² Mu March tukatendeka kufunda buku wa Palameni Kuli Yehova pa Lufunjisho lwa Buku pa Kipwilo. Twakonsha kumwenamo byepi mfweto mu lufunjisho lwetu? Kyanema bingi kunengezha. Kitango kimo kimo kikafunjiwanga mu milungu ibiji, mambo kukekalangatu kufunda mapalagalafu aesakana mulungu ne mulungu. Kino kikemupako kimye kya kukumbulapo pa lufunjisho lwenu mikumbu ya kufuma panshi ya muchima wenu ne kulanguluka langulukapo pa byo byo byambo. Kunungapo, kukekalangatu kufunda mapalagalafu acheche mu milungu ikafunjiwangamo lubaji lwapelako lwa kyapitala. Kino kikapanangako kimye kya kwisamba pa kabokoshi.

³ Kutatula na kyapitala 2, kabokoshi kaji na mutwe waamba’mba “Amepusho ya Kutontonkanyapo” kaji kwipi na ku mpelo ya kitango kimo kimo. Panyuma ya kwisamba palagalafu yapelako mu kitango, mukulumpe wa lufunjisho lwa buku ukapitulukila pamo na jibumba mu kano kabokoshi. Ukatundaika bonse mu jibumba kukumbulapo mu meso anteka byo balangulukapo, kulumbulula bulongo mwatala Binembelo. (Mana. 20:5) Kununga pa mepuzho anembwa mu kabokoshi, kimo kimye wakonsha ne kwipuzha mepuzho nabiji akuba’mba: “Bino byambo bimubulapo ka pe Yehoba? Bimukwasha byepi mu bumi bwenu? Mwakonsha kwibingijisha byepi kukwashishamo bakwenu?” Aye kyoakemenapo ke kumvwa mikumbu ya kufuma panshi ya michima yabo, kechi ya kweseka jibumba kupichila mu oo mepuzho ne.

⁴ Uno buku wa Palameni Kuli Yehova wapusanako bingi na mabuku akwabo. Nangwa kyakuba mabuku onse a ‘kalume wa kishinka ne wa maana’ aamba pa kutumbijika Yehoba, bino nkebelo ya uno buku yense ke ya kwisamba pa byubilo bya Yehoba. (Mat. 24:45-47) Jino ke jishuko bingi jiji kulutwe yetu! Tukamwenamo bingi mfweto mu kufunda byubilo bya Yehoba mu kuzhika. Mwane kine luno lufunjisho lwitukwashe kufwenya kwipi na Shetu wa mwiulu, kabiji twayai twikale bakasuluka mu kukwasha bakwetu nabo kuba kintutu kimo.