Kufunda Buku wa Popwelai Lesa Yenka Wakine

Buku wa Popwelai Lesa Yenka Wakine, wanembwa kufunjishamo bakatataka bapwisha kufunda buku wa Kuyuka. Kufunda kwa uno buku pa Lufunjisho lwa Buku pa Kipwilo, kuketukwasha kuyuka bya kumwingijisha mu mwingilo, uketukwasha kubaisha butemwe bwetu ne lusanchilo lwa kusanchila Yehoba ne jibumba janji. Pano twakonsha kumwenamo byepi pakatampe mu kufunda uno buku wa Popwelai Lesa?

Kufunjisha Lufunjisho: Byo tukapwishanga kufunda kitango kimo mulungu ne mulungu, bakulumpe ba lufunjisho lwa buku bafwainwa kwabanya kimye bulongo. Kechi bafwainwa kutaya kimye kyabaya mu mapalagalafu atanshi alumbulula byambo bijimo ne, bino bafwainwa kutaya kimye kyabaya mu mapalagalafu aji palutwe muji byambo byanema. Kwisamba mu ngipipishilo kabokoshi ka mepuzho a kupitulukamo panyuma ya lufunjisho luji lonse, kukakwasha batanwako kuvuluka bishinka bikatampe.

Mukachi ka bitango bya uno buku wa Popwelai Lesa muji ne mepuzho a kulangulukapo ne kwisambapo. Kyakumwenako, mwakonsha kumona pa peja 48-9. Kechi kyafwainwa kutanga ano mepuzho pa kimye kyo mubena kutanga mapalagalafu ne. Umvwe ke mwisambepo ano mepuzho na jibumba, mukulumpe wa lufunjisho wafwainwa kumona kuba’mba binembelo byatangiwa ne kwisambapo kwesakanatu na kimye kijiko.

Kunengezhezha Jimo: Kunengezha bulongo lufunjisho kwavwangamo byavula, kechi kushilatu tubishilwa pa mikumbu konkatu ne. Kulangulukishapo pa binembelo bijimo, kechi kwakonsha kwitukwashatu kwinengezha kukumbulapo ne, bino kikatakata kwitukwasha kunengezha muchima wetu. (Ezela 7:10) Atweba bonse, twakonsha kwikwasha atwe bene na bene kupichila mu kukumbulapo satwakasuluka kabiji kwakubula kukizhamo kulolobwela ne.—Loma 1:11, 12.

Lufunjisho lo tukafundanga mu buku wa Popwelai Lesa, luketukwasha kufwenya kwipi ne Yehoba kabiji luketufunjisha bya kukwasha bantu bakishinka kwiya kwivwanga ne atweba mu ku mupopwela. (Sala. 95:6; Yako. 4:8) Twayai atweba bonse tufunde byavula mu luno lunengezho lwa ku mupashi lwawama.