Iyowayi Lufunjisho Lwetu mu Buku wa Nanchi Baibolo Kine Ufunjisha’mba Ka?
1 Lubaji lumo lwajinga lwa lusekelo pa Kupwila kwa Nkambi kwa “Kukokela Lesa” lwajinga kulupulwa kwa buku wa Nanchi Baibolo Kine Ufunjisha’mba Ka? Katatakatu tutendeke kumwingijisha mu mwingilo wa mu bujimi kimye kyonse, kikatakata umvwe ke tufunjishe mafunjisho a Baibolo. Onkao mambo, twafwainwa kumuyukisha bulongo uno buku wa bukumo. Kino kikengila mambo tukamufundanga pa Lufunjisho lwa Buku lwa Kipwilo kutatula mu mulungu wa April 17, 2006.
2 Mukulumpe wa Lufunjisho lwa Buku lwa Kipwilo ukambangapo pa mepuzho aji peulu ya kitango kyonse. Apa bino lufunjisho lukafunjiwenga kwingijisha mepuzho aji panshi ya peja. Binembelo byalumbulula bishinka bikatampe bikatangiwanga ne kulumbululwa, kabiji kabokoshi ka kuba’mba “Baibolo byo Afunjisha” kaji ku mpelo ya kitango kyonse, kakakwashañananga bingi mu kupitulukamo mu byambo byafunjiwa, mambo kano kabokoshi kaji na mikumbu ya mu Binembelo ya mepuzho aji peulu ya kitango. Mukomvwanga bingi bulongo kukumbulapo, mambo uno buku muji mitwe yaumvwanyika, yapela, kabiji izakula muchima.
3 Bya kulumbulula biji mu uno buku bipana bishinka byavula bya pa mitwe yapusana pusana. Tukengijishanga bino byambo umvwe bafunda Baibolo bakeba byambo bikwabo pa mutwe umo. Bibese bimo bya bya kulumbulula tukebifundanga pa Lufunjisho lwa Buku lwa Kipwilo. Mutwe uji mu bya kulumbulula ukatangiwanga na utangako pa lufunjisho lwa buku, kabiji bibaba byabaya bikafunjiwanga mu bipungu. Mepuzho a kufunda kechi amweshiwa mu bya kulumbulula ne. Pano bino mukulumpe wafwainwa kushikisha batanwako kwambapo kupichila mu kwibepuzha mepuzho alumbulula bishinka bikatampe.
4 Mafunjisho a Lufunjisho lwa Buku lwa Kipwilo mu buku wa Baibolo Ufunjisha akafunjiwa bingi lubilo. Pano kino kechi kibena kulumbulula’mba ne atweba twafwainwa kukafunjishanga lubilo bantu mu uno buku ne, kikatakata umvwe bayukapotu bicheche nangwa umvwe kechi bayukapo kiji kyonse mu Baibolo ne. (Byubilo 26:28, 29) Kimye kya kufunjisha mafunjisho a Baibolo a ku nzubo, kikakebewanga kwisamba pa binembelo bulongo, kulumbulula bulongo bya kumwenako, ne bintutu bikwabo. Onkao mambo mwane kikale kikonkwanyi kyenu kya kutanwako milungu yonse ne kukumbulapo kimye kya lufunjisho lwetu lwa buku wa Nanchi Baibolo Kine Ufunjisha’mba Ka?