Londainga Mufunjishi Mukatampe pa Kwingijisha Buku wa Baibolo Ufunjisha
1. Yesu wafunjishanga byepi?
1 Kimye kyonse Mufunjishi Mukatampe, aye Yesu, walumbululanga bintu mu jishinda japela kumvwa. Pa kuba’mba akwashe banteleki banji kulangulukapo, kimye kimo wakibepuzhanga byo balanguluka pa kyokyo kintu. (Mat. 17:24-27) Walengelanga bantu kuta muchima ku Mambo a Lesa. (Mat. 26:31; Mako 7:6) Kechi wafunjishanga baana banji ba bwanga bintu byavujisha pa kimye kimo ne, mambo wayukile’mba bakatwajijila na kufunda. (Yoa. 16:12) Kabiji Yesu wateleko bingi muchima kukeba kuyuka umvwe kya kuba baana banji ba bwanga baitabijilenga ne kumvwa bintu byo ebafunjishenga. (Mat. 13:51) Buku wa Baibolo Ufunjisha wanengezhiwa kwitukwasha kufunjisha byonka byafunjishanga Yesu.
2. Mu ñanyi mashinda mo twakonsha kwingijishisha mepuzho aji ku ntendekelo ya kitango kimo kimo?
2 Mepuzho a ku Ntendekelo: Umvwe mwatendeka kitango, kyawama kukishikisha mepuzho a ku ntendekelo aji munshi ya mutwe. Shikishai ano mepuzho kulengela yewo ubena kufunda kulangulukapo kuba’mba ekale na mujojo wa kukeba kuyuka mikumbu yao. Nangwa mwakonsha kumwambila kukumbulapo mikumbu ipi ya oo mepuzho. Kechi kikebewa kwisambila kitala mikumbu yo akumbula nangwa kololatu mikumbu yonse yo abula kukumbula bulongo ne. Mwakonsha kumusanchilatu pa byo akumbula ne kutendeka kufunda yeo mutwe. Mikumbu yanji yo akumbula mepuzho a ku ntendekelo ikemukwasha kuyuka kibese kya mu lolo lufunjisho kyo mwafwainwa kulumbulwisha bulongo.
3. Twakonsha byepi kubula kukoseshanga bintu pa kufunjisha?
3 Binembelo: Lufunjisho lwafwainwa kwimena pa Binembelo. (Hebe. 4:12) Nangwa byonkabyo, kechi kikebewa kutangatu binembelo byonse byamweshiwa ne. Lumbululaikotu byobya mwafuma bintu byo twaitabilamo. Abya binembelo bibena kulondololatu byajinga kyokyo kintu kechi byakonsha kutangiwa ne. Buku wa Baibolo Ufunjisha walondolola bukine mu jishinda japela kumvwa. Kukoseshanga bintu ne. Teshai muchima pa bishinka bikatampe ne kuchinuzhuka kisela kya kulondolwela bintu kitala nangwa kuletelamo bishinka bingi byabula mu mwisambo bibena kubula kukebewa.
4. Ki ka kyafwainwa kwitulengela kuyuka umvwe kibena kukebewa kwikalako na kimye kya kwisamba byambo biji mu bya kulumbulula kimye kyo tubena kufunjisha?
4 Bya Kulumbulula: Kipungu kya bya kulumbulula kiji na mitwe 14 yanungwako ibena kulondolola byambo bibena kwamba pa yeo mutwe. Kiji kwi anwe bene kwisambapo pa ino mitwe kimye kyo mubena kufunjisha. Pa mitwe imo mwakonsha kutundaikatu ye mufunjisha kwitangila byobyo byambo byanungwako pa kimye kyanji mwine, kikatakata umvwe kya kuba ubena kumvwisha ne kuswa byambo biji mu kine kitango. Kya kumwenako, umvwe awo ubena kufunda wayukila jimo amba Yesu ye Mesiasa, kechi kyakonsha kukebewa kwisamba nanji mutwe wa kuba’mba, “Yesu Kilishitu—Mesiasa Walayiwe,” kimye kyo mubena kufunjisha kitango 4, kyaamba’mba, “Yesu Kilishitu Ye Ñanyi?” ne. Pa bimye bikwabo, kyakonsha kuwama kwikalako na kimye kya kwisambako mitwe imo iji mu bya kulumbulula ibena kwamba pa kine kitango kyo mubena kufundapo.
5. Umvwe twakeba’mba twisambepo pa byambo biji mu bya kulumbulula, twakonsha kwisambapo byepi?
5 Umvwe mukeba kwisambapo pa byambo biji mu bya kulumbulula, mwakonsha kunengezhezha jimo mepuzho kabiji ne kwisamba mapalagalafu na ye mubena kufunjisha byonka byo mwakonsha kufunjisha lufunjisho lwine. Nangwa kwesakanatu na biji yewo ubena ufunda, mwakonsha kwikalako na maminiti acheche a kupitulukamo nanji mu byobyo byambo byanungwako kimye kyo mubena kufunda. Kino kikemulengela kushiinwa’mba ubena kumvwisha byambo byo atanga pa bunke bwanji.
6. Kabokoshi ka kupitulukamo kaji ku mpelo ya lufunjisho lonse kakonsha kwingijishiwa byepi?
6 Kabokoshi ka Kupitulukamo: Kabokoshi kaji ku mpelo ya kitango kiji kyonse kaji na bishinka bikumbula javula mepuzho aji ku ntendekelo. Mwakonsha kwingijisha bino byambo kupituluka mu bishinka bine bikatampe biji mu kitango. Basapwishi bamo bekitana’mba kikwasha bingi kutanga byobyo byambo na ye mubena kufunjisha kabiji kimye kimo ne kutanga binembelo bijipo. Apa bino bashikisha ye babena kufunjisha kulondololako pacheche binembelo byo bibena kumwesha bukishinka bwa byobyo byambo. Kino kikwasha mufunjishi kuyuka umvwe kya kuba muntu ye abena kufunjisha waumvwisha kya kine bishinka bikatampe biji mu lolo lufunjisho ne byo byalondololwa mu Baibolo kabiji ne kumona umvwe wibitabila nangwa ne. Kabiji kikwasha ne ye mubena kufunjisha kwingijisha Baibolo kulondolwela bakwabo bukine.
7. Twakonsha kwingijisha byepi buku wa Baibolo Ufunjisha pa kwingila mwingilo wetu?
7 Jishinda jawama ja kwingijilamo mwingilo wetu wa kufunjisha bantu ne kulenga baana ba bwanga ke kulonda mashinda a kwa Yesu a kufunjishishamo. (Mat. 28:19, 20) Buku wa Baibolo Ufunjisha wakonsha kwitukwasha kuba kino. Mwingijishainga bulongo kufunjishamo bantu bukine mu jishinda japela kabiji ja lusekelo.