Ingijishainga Bulongo Biji mu Buku wa Baibolo Ufunjisha

Umvwe ubena kufunda Baibolo wayuka bifunjisha Baibolo ne kwibilondela, ukakoma ku mupashi ne kwikala na bipangwa bya mupashi. (Sala. 1:1-3) Twakonsha kukwasha ye tufunjisha Baibolo kuyilako palutwe inge ke twingijishe bulongo biji mu buku wa Baibolo Ufunjisha.

Mepuzho a Kutendekelapo: Kitango kyonse kyatendekelapo na mepuzho akumbulwa mu kibaaba. Mwakonsha kwipuzha ye mubena kufunjisha ano mepuzho kukumbwila mu muchima pa kuba’mba ekale na kizaku pa byo musakutendeka kufunda. Nangwa mwakonsha kumwipuzha kwambako pacheche pa bwipuzho. Umvwe byo akumbula kechi ibyo ne, kechi mwafwainwa kumubuula byaji kufwainwa kwikala mukumbu ne. Mikumbu yanji ikemukwasha kuyuka bishinka byo mwafwainwa kumukwasha kumvwisha.—Maana 16:23; 18:13.

Bya Kulumbulula: Umvwe ye mubena kufunjisha waumvwisha byonse byo mwafunda, mwakonsha kumutundaikatu kupitulukamo mu bya kulumbulula bunke bwanji. Pa lufunjisho lwalondelapo, mwakonsha kupitulukamo pacheche pa kuba’mba muyuke umvwe waumvwine bishinka. Inge kyakonsheka, mwafwainwa kutanga mafuka amo mu bya kulumbulula ne kwipuzha mepuzho o mwanengezhezha jimo kimye kyo mubena kufunda.

Kakitenguluzha ka Kupitulukamo: Kakitenguluzha ka kupitulukamo kaji ku mpelo ya kitango muji mikumbu ya mepuzho a kutendekelako. Mwakonsha kwikengijisha pa kuba’mba muyuke ye mubena kufunjisha inge waumvwa kabiji wakonsha kulumbulula bishinka biji mu kitango. Tangai mukumbu ne binembelo bijipo. Ambilai ye mubena kufunjisha kulumbulula kishinka kijipo kwingijisha kinembelo.—Byu. 17:2, 3.