Twafwainwa Kunengezhanga pa Kuba’mba Tufunjishenga Bulongo

Pa bimye bibiji, Yesu bamwipwizhe bwipuzho buntutu bumo bwaambilenga pa bumi bwa myaka, bino wakumbwile kwesakana na byajinga bamwipwizhenga. (Luka 10:25-28; 18:18-20) Nangwa kya kuba twayuka bulongo byo tusa kufunjisha muntu, twafwainwa kunengezhezha jimo saka tubena kulanguluka pa ye tubena kuya na kufunjisha. Ñanyi bishinka byakonsha kumukatazha kumvwa nangwa kwibitaba? Ñanyi binembelo byo bamwesha byo nsakutangila pamo nanji? Mafuka anga o tusa kufunda? Kampe twakonsha kunengezha kyakumwenako, kulumbulula nangwa mepuzho pa kuba’mba omvwishe kishinka. Byo kiji kuba’mba Yehoba ye ulengela lukunwa wa bukine kukoma mu muchima wa muntu, twafwainwa kulomba kwi Yehoba inge tubena kunengezha lufunjisho, kulombelako ye tufunjisha ne kuba’mba tumukwashe kukoma ku mupashi.—1 Ko. 3:6; Yako. 1:5.