Kufunjishanga Mafunjisho a Baibolo Anunguluka
Lubaji 2: Kwinengezha Kufunjisha Lufunjisho
1 Kufunjishanga bulongo lufunjisho lwa Baibolo kechi kwavwangamotu kwisamba lolo lufunjisho ne kutanga binembelo byamweshiwa ne. Twafwainwa kufunjisha byambo mu jishinda ja kuba byafika pa muchima wa yewo muntu ye tubena kufunjisha. Kino kikebewa kunengezha bulongo kuba’mba awo muntu akamwenemo.—Mana. 15:28.
2 Bya Kunengezha: Patanshi awo muntu mubikai mu milombelo kwi Yehoba mu bibena kukebewa. Mulombai Yehoba emukwashe bya kufika pa muchima wa yewo muntu ye mubena kufunjisha. (Kolo. 1:9, 10) Pa kuba’mba mumvwishe bulongo kishina, patanshi akilangulukai pa mutwe wa kyokyo kitango nangwa lufunjisho, tumitwe twa tucheche, ne bipikichala. Ishikishai anwe bene amba, ‘Ñanyi nkebelo ine ya luno lufunjisho?’ Kino kikemukwasha kulumbululatu bishinka bikatampe kimye kyo mubena kufunjisha lufunjisho.
3 Pitulukai bulongo mu mapalagalafu onse monka moalondankena. Tanai mikumbu ya mepuzho anembwa ne kushilatu bishinka bine bibena kukebewa. Monai binembelo byamweshiwa byo byakwatankana na kishinka kiji mu palagalafu, ne kuyuka binembelo byo mwakonsha kutanga kimye kya lufunjisho. Kyakonsha kwimukwasha bingi kunemba tubishinka twipi twaamba pa binembelo kunsakunsa ya buku. Ubena kufunda wafwainwa kuyuka’mba byo abena kufunda byafuma mu Byambo bya Lesa.—1 Tesa. 2:13.
4 Nengezhai Lufunjisho Kwesakana na Muntu ye Mubena Kufunjisha: Kyalondelapo, nengezhai lufunjisho kwesakana na biji yewo muntu ye mubena kufunjisha. Esekai kuyukila jimo mepuzho anji o akepuzha ne bishinka bikakonsha kumukatazha kumvwa nangwa kwitaba. Ishikishai anwe bene amba: ‘Bika byo afwainwa kumvwisha nangwa kwingijilapo kuba’mba akome ku mupashi? Nakonsha kumufika byepi pa muchima?’ Apa bino munengezhe lufunjisho lwenu kwesakana na momwikimwena kuwama. Bimye bimo, mwakonsha ne kunengezha kya kumwenako, bya kulumbulula, nangwa kwipuzha mepuzho avula kuba’mba awo muntu omvwishe mwatala kishinka nangwa kinembelo. (Ne. 8:8) Bino monai’mba kechi mwanungako byambo bikwabo byabula kukwatankana na kishina ne. Kupitulukamo pa kupwisha lufunjisho kukakwashako yewo muntu kuvuluka bishinka bikatampe.
5 Kine twikala bingi na lusekelo umvwe bakatataka ke bapange bipangwa byawama bya kuleta lutotelo kwi Yehoba! (Fili. 1:11) Pa kuba’mba mwibakwashe kwikala bino, nengezhainga bulongo kimye kyonse saka mukyangye kufunjisha lufunjisho lwa Baibolo.