Lubaji 4: Kufunjisha Bomufunjisha Baibolo bya Kunengezha
Kufunjishanga Mafunjisho a Baibolo Anunguluka
1 Ufunda Baibolo utangila jimo mu lufunjisho, kushila mikumbu, ne kulangulukila jimo mwakukumbwila mu byambo byanji mwine javula ununguluka bingi ku mupashi. Onkao mambo, umvwe lufunjisho lwa kufundanga kimye kyonse lwatendeka, nengezhezhai nanji pamo lufunjisho lumo ne kumubula bya kunengezha. Bavula bafunda Baibolo kyakonsha kuwama kunengezhezha nabo pamo kitango kyonse nangwa lufunjisho lonse.
2 Kushila Mikumbu ne Kunemba Tubishinka Kunsakunsa: Londololai bya kufikena kutana mikumbu ya mepuzho anembwa. Mumweshai ye mufunjisha buku wenu ye mufunjishamo byo mwashila byambo nangwa mikuku ya byambo paji bishinka. Byo musa kwisambanga lolo lufunjisho, ne aye wakonsha kuba byonka byo mwauba, saka ashila mu buku wanji pa byambo bibena kukebewa kuba’mba bimukwasheko kuvuluka mukumbu. (Luka 6:40) Panyuma ya bino, mwipuzhai akumbule mu byambo byanji mwine. Kino kikemukwashako kuyuka byo aumvwa lolo lufunjisho.
3 Awo muntu ufunda Baibolo wafwainwa kutesha muchima ku kutanga binembelo byamweshiwa mambo byafwainwa kumukwashako kunengezha bulongo lufunjisho. (Byubilo 17:11) Mubulai’mba binembelo byonse byamweshiwa bikoseshapo kishinka kimo mu palagalafu. Mumweshai bya kunemba tubishinka twipi kunsa ya pepala mu buku wanji ye afundamo. Mulumbulwilai amba lufunjisho lo abena kufunda lwaimena pa Baibolo. Mutundaikai ambengapo pa binembelo byamweshiwa mu mikumbu yanji kimye kya lufunjisho.
4 Pitaimo kabiji Mubwele Mupitulukemo: Awo ye mufunjisha saka akyangye kutendeka kunengezha lufunjisho lwa kufunda, wafwainwa patanshi kupitamo. Mubulai’mba wakonsha kuyuka biji lolo lufunjisho umvwe wapitamo ne kumona biji mutwe wa kyokyo kitango, tumitwe twa tucheche, ne bipikichala. Mulondolwelai amba saka akyangye kupwisha kunengezha, wafwainwa kupituluka mu bishinka bikatampe biji mu lufunjisho, kampe kupichila mu kwingijisha kabokoshi ka kupitulukamo umvwe mo kaji mu lufunjisho. Umvwe saka apitulukamo kikamukwashako kuvulukanga bishinka.
5 Kufunjisha muntu ye mufunjisha Baibolo bya kunengezha bulongo lufunjisho lwanji kikamukwasha kukumbulanga mikumbu yawama pa kupwila kwa kipwilo. Kabiji kikamukwasha kutwajijila kwikala na muteeto wa kufundanga kukakonsha kumukwasha kulutwe na lwendo umvwe mwapwisha kumufunjisha lufunjisho lwa Baibolo.