Byakwingijisha Buku wa “Butemwe bwa Lesa” Kufunjishishamo Mafunjisho a Baibolo

1. Buku wa “Butemwe bwa Lesa” wanembelwa nkebelo ka?

¹ Byo twasangalelepo pa Kushonkena kwa Nkambi kwa “Tangijilwainga na Mupashi wa Lesa” kumvwa kya kubijika kya buku wakatataka wa ‘Ikalai Monka mu Butemwe bwa Lesa’! Byonka byo kyabijikilwe, uno buku wanembelwa kwitukwasha kuyuka ne kutemwa mizhilo ya Yehoba ya byubilo byawama, kabiji kechi wa kufunjishishamo mafunjisho atanshi a mu Baibolo ne. Kabiji kechi tukamushanga uno buku ku nzubo ku nzubo ne.

2. Uno buku tukamwingijishanga byepi, kabiji na bañanyi?

² Uno buku ukekala wa bubiji wa kufunjishamo bafunda Baibolo panyuma ya kupwisha kufunda buku wa Baibolo Ufunjisha.a Yukai’mba bantu bapusana mu nkomeno yabo ya ku mupashi. Kyawama kufunjisha muntu kwesakana na papelela bulume bwanji. Monai kuba’mba byambo byo abena kufunda ubena kwibyumvwisha. Nangwa kikale byonkabyo, uno buku kechi wa kwingijisha kutendekelamo mafunjisho a Baibolo na bantu bafundapo kala mabuku avula babula kwiya na kupwila kabiji babula kukeba kupimpula bwikalo bwabo kwesakana na bukine bwa mu Baibolo bo bafunjile ne.

3. Twafwainwa kuba byepi umvwe pa kino kimye tubena kukifunjisha muntu mu buku wa Popwelai Lesa?

³ Umvwe pa kino kimye mubena kukifunjisha muntu mu buku wa Popwelai Lesa kabiji kwashala ne bitango bicheche kuba’mba mupwishe, mwakonsha kufuukulapo kupwisha uno buku ne kutundaika ye mufunjisha kwitangila buku wa “Butemwe bwa Lesa” aye mwine. Umvwe kechi mubena kukeba kuba bino ne, kyakonsha kuwama pa kutuntulukila mu buku wakatataka mwatatwilatu ku ntendekelo. Pano bino, pa mambo a buku wa Baibolo Ufunjisha, kiji kwi anwe bene kumona kana mwakonsha kwisambapo pa mitwe iji mu bya kulumbulula.

4. Twafwainwa kuba byepi umvwe ye tufunjisha wabatizwa saka akyangye kupwisha buku wa Baibolo Ufunjisha ne wa “Butemwe bwa Lesa”?

⁴ Inge ye mufunjisha wabatizwa saka akyangye kupwisha mabuku onse abiji, mwafwainwa kutwajijila na kumufunjisha kufikatu ne kimye kyo mukapwisha buku wa “Butemwe bwa Lesa.” Nangwa kya kuba ye mufunjisha wabatizwa, mwafwainwa kunemba kimye, kubwelako ne lufunjisho. Musapwishi ye mwaya nanji naye wakonsha kunemba kimye umvwe waambapo pa lufunjisho.

5. Twakonsha kwingijisha byepi buku wa “Butemwe bwa Lesa” kukwashishamo basapwishi babula kuyayaya mu mwingilo?

⁵ Inge wa mu Kavoto ka Mwingilo mu Kipwilo wimubula kufunjisha lufunjisho lwa Baibolo muntu wakoka mu mwingilo wa kusapwila, wakonsha kwimubula bitango bya kwisambapo mu buku wa “Butemwe bwa Lesa.” Kechi mwafwainwa kumufunjisha pa kimye kyabaya ne. Luno ke lunengezho lwawama bingi luji mu uno buku wakatataka, ye banengezha kuba’mba etukwashe kutwajijila kwikala monka “mu Butemwe bwa Lesa”!—Yuda 21.

[Tubyambo twa mushi]