Ene Mambo o Tukebela Lufunjisho lwa Buku pa Kipwilo
1. Lufunjisho lwa Buku pa Kipwilo lwatendekele byepi?
1 Mu 1895, mabumba a lufunjisho a Bafunda Baibolo luno babena kutelwa’mba Bakamonyi ba kwa Yehoba ayukanyikilwe’mba, Mabumba Atanshi a Bafunda Baibolo. Mabuku atelwa’mba Millennial Dawn o aingijishiwanga kufundamo. Kulutwe na lwendo ano mabumba a lufunjisho atendekele kutelwa’mba Mabumba Abena Beliya a Bafunda Baibolo. (Byubilo 17:11) Javula mabumba ache ache apwilanga mu mazubo kimye kya mabanga kyawamina jojo jibumba. Abino byo byatendekele Lufunjisho lwa Buku pa Kipwilo.
2. Twakonsha ‘kwikwasha’ byepi pa lufunjisho lwa buku?
2 Lutundaiko ne Bukwasho: Byo kiji kuba’mba mabumba a lufunjisho lwa buku anengezhewa kwikala ache ache, kipanako kimye kyabaya ku boba batanwako kwilumbulwila lwitabilo lwabo kupichila mu kukumbulapo. Kifumamo ke kya kuba’mba kwikala bingi ‘kwikwasha ... , bonse na lwitabilo lwa mukwabo.’—Loma 1:12.
3, 4. Lunengezho lwa lufunjisho lwa buku lwakonsha kwitukwasha byepi kwingila mwingilo wetu?
3 Kumona bibena kufunjisha mukulumpe wa lufunjisho lwa buku kwakonsha kwitukwasha ‘kutwalatu [kwambatu, NW] bulongo mambo a bukine.’ (2 Timo. 2:15) Monai byo abena kulumbulula Binembelo paimena byobyo byambo. Umvwe kyakonsheka kwesakana na buku ubena kufunjiwamo, wakonsha kulumbulula bishinka bikatampe kupichila mu mepuzho a kupitulukamo, mu kwingijishatu Baibolo. Kya kumwenako kyanji kyakonsha kwitukwasha kuwamishako mfunjishisho yetu mu mwingilo wa bwina Kilishitu.—1 Ko. 11:1.
4 Kununga pa kufunjisha lufunjisho lwa mulungu ne mulungu, mukulumpe wa lufunjisho lwa buku utangijila ne mu busapwishi. Aye mu kwingijila pamo na mukulumpe utangijila mwingilo wa mu bujimi, unengezha lunengezho lwawama lwa mu mwingilo wa mu bujimi. Ukebesha bingi kukwasha bonse banji mu jibumba kwingila mwingilo wabo wa bwina Kilishitu wa kusapwila mambo awama ne kulenga baana ba bwanga.—Mat. 28:19, 20; 1 Ko. 9:16.
5. Ñanyi bukwasho bwa kukwasha muntu umo umo bubiwa kupichila mu lufunjisho lwa buku?
5 Mukulumpe wa lufunjisho lwa buku wikala bingi na lusekelo mu kuyuka biji bumupashi bwa muntu yense uji mu jibumba. Luno lusekelo wilumweshesha pa kupwila kwa kipwilo ne byo engila na bakwabo mu mwingilo wa mu bujimi. Kabiji bimye bimo byo aya na kufwakesha balongo ku mazubo abo, wisamba nabo misambo ya ku mupashi ikoseshañana. Bonse bafwainwa kwikala bakasuluka kusolomoka mukulumpe wa lufunjisho lwa buku kuba’mba ebakwashe kimye kiji kyonse kyo bakeba.—Isa. 32:1, 2.
6. (a) Balongo ne banyenga mu byalo bimo bakoseshiwa byepi kupichila mu kupwila mu tumabumba tuchetuche? (b)Nga anweba bunke bwenu mwamwenamo byepi mu lufunjisho lwa buku?
6 Ikoseshai Anwe Bene na Bene: Mu byalo mo bakanya mwingilo wa bantu ba Lesa, javula balongo bapwila mu tumabumba tuchetuche. Mulongo umo uvuluka’mba: “Nangwa kya kuba mingilo yetu ya bwina Kilishitu beilekeshe, umvwe twashukilwapo ka kimye twaikalanga na kupwila kwetu kwa mulungu ne mulungu mu tumabumba mabumba nabiji bantu 10 ne 15. Mu kuno kupwila twakoseshiwanga bingi ku mupashi, mu mbaji yonse ibiji, mu lufunjisho lwetu lwa Baibolo ne kupwañena pamo panyuma ya kupwila. Twaesakanyanga byo twapitangamo, kabiji kino kitukwashangako kuyuka’mba atweba bonse tupitatu mu makatazho amotu.” (1 Pe. 5:9) Twayai ne atweba, twikoseshenga atwe bene na bene kupichila mu kutundaika lunengezho lwa kupwila kwa Lufunjisho lwa Buku pa Kipwilo.—Efi. 4:16.