Lunengezho lwa Lufunjisho lwa Buku lwa Kipwilo byo Lwitukwasha
1. Kupwila kwetu konse kutanu kubiwa mulungu ne mulungu kwitukwasha byepi?
1 Kupwila konse kutanu kubiwa mulungu ne mulungu, kwapusana mu kutangijilwa kabiji ne nkebelo yako. Bino, kuno kupwila konse kwanema bingi mu kwitukwasha “kwilanguluka atwe bene na bene mu kwiubisha butemwe ne mingilo yawama.” (Hebe. 10:24, 25) Mbaji ka imo yapusanako ne kunema iji mu lunengezho lwa Lufunjisho lwa Buku lwa Kipwilo?
2. Bintu ka byawama bifuma mu kupwila kwa kajibumba kacheche pa kupwila kwa lufunjisho lwa buku?
2 Lwitukwasha Kukomenako ku Mupashi: Kibelengelo kya bantu batanwako ku kupwila kwa lufunjisho lwa buku kyakepa bingi kukila kyokya kya bantu batanwako ku kupwila kukwabo kwa kipwilo. Kino kitupelela kwikala na balunda bakonsha kwitukwasha ku mupashi. (Mana. 18:24) Nanchi mwaeseka kuyuka bonse ba mu jibumba jenu ja lufunjisho lwa buku, kampe kwibambila kwingila nabo mu mwingilo nyi? Lunengezho lwa lufunjisho lwa buku lulengela ne mukulumpe wa lufunjisho lwa buku kuyuka biji bwikalo bwa muntu yense uji mu jibumba ne kumutundaika.—Mana. 27:23.
3. Lunengezho lwa lufunjisho lwa buku lutundaika byepi bantu kukumbulapo kabiji ne kulengela boba bafunda Baibolo kutanwako?
3 Nanchi mwaambila bo mufunjisha Baibolo kutanwanga pamo ne anweba ku kupwila kwa lufunjisho lwa buku nyi? Aba baji na lusekelo bakankalwa kutanwa ku kupwila kwetu kukatampe, kyakonsha kwibapelela kutanwa ku kupwila kwa kajibumba kacheche, kikatakata kubiwa mu nzubo. Bulunda bwikalapo bulengela banyike ne boba bakatataka beya na kutanwako kukumbulapo. Byo kaji kajibumba kacheche, tuji na jishuko ja kukumbulapo bimye byavula kabiji ne kumutota Yehoba.—Sala. 111:1.
4. Lunengezho lwa lufunjisho lwa buku lwawamina mu ñanyi mashinda?
4 Mafunjisho a buku javula ekela pa mapunzha asalwa a mu nyaunda pakonsha kwipipa na kwikela basapwishi. Byo kiji kuba’mba kechi kyakonsheka ino mpunzha kwikela ku bukonde bwa musapwishi yense ne, kuya ku mafunjisho a buku ko betutongwela kwakonsha kwitulengela kwendapo kimye kicheche kukila kyo twenda pa kuya ku kupwila kukwabo kwa kipwilo. Mpunzha ya lufunjisho lwa buku yakonsha ne kwikala mpunzha yawama kusambakenapo pa kuya mu mwingilo wa mu bujimi.
5. Twakonsha kutambula byepi bukwasho mu mwingilo kufuma ku mukulumpe wa lufunjisho lwa buku?
5 Lwitukwasha mu Mwingilo: Mukulumpe wa lufunjisho lwa buku uta muchima kukwasha yense kwingila bulongo ne kwikala na lusekelo mu mwingilo kimye kyonse. Onkao mambo, wibikishako kwingila na muntu yense mu jibumba, kumukwasha bya kwingilako mu mbaji yapusana pusana ya mwingilo. Umvwe mwatana’mba mbaji imo ya mwingilo ibena kwimushupa, nabiji kubwelako, bulai mukulumpe wenu wa lufunjisho lwa buku. Kampe wakonsha kwambila musapwishi umo mu jibumba wayuka bulongo kwingilako ne anweba. Mfunjishisho yenu ya mafunjisho a Baibolo ikawaminako kupichila mu kutesha muchima ku mfunjishisho yawama ya mukulumpe wa lufunjisho lwa buku kimye kyo atangijila lufunjisho lwa buku.—1 Ko. 4:17.
6. Mambo ka o twafwainwa kukebela kumwenamo pakatampe mu lunengezho lwa lufunjisho lwa buku?
6 Lufunjisho lwa Buku lwa Kipwilo ke lunengezho lwawama kya kine kine! Luno lunengezho lwa butemwe lwafuma kwi Yehoba, lwitukwasha kutwajijila kwikala bakosa ku mupashi mu kimye kya makatazho o tupitamo mu bwikalo bwetu.—Sala. 26:12.