Kabokoshi Ka Mepuzho

◼ Ñanyi kimye kyafwainwa kulengelapo jibumba jikwabo ja Lufunjisho lwa Buku pa Kipwilo?

Jibumba jikwabo jakonsha kulengewa umvwe kyafwainwa pa kuba’mba pa mpunzha imo imo ya lufunjisho lwa buku kuvwangako ne pa Nzubo ya Bufumu patanwengatu bantu 15 ne kubwela panshi. Mambo ka kino o kyawamina kwikela bino?

Umvwe mabumba a Lufunjisho lwa Buku pa Kipwilo aikala na bantu bacheche, kikwashako utangijila kwibayuka bulongo bonse pa muntu pa muntu. Kunungapo, bonse bakekalanga na jishuko ja kukumbulapo mu kwiambila lwitabilo lwabo abo bene. (Hebe. 10:23; 13:15) Kipelelako bantu kutanwa ku Lufunjisho lwa Buku ne ku kupwila kwa kuya mu mwingilo wa mu bujimi, inge kya kuba’mba mu nyaunda yonse ya kipwilo mwaikala mabumba a bantu bacheche mu mapunzha avula. Bipwilo biji na mapunzha avula bitana kuba’mba kibelengelo kya batanwa ku mabumba onse a lufunjisho lwa buku kyabailako pa kwikivwanga pamo.

Kimo kimye kwikala bintu bimo bilengela kulenga jibumba jikwabo nangwatu na bantu bacheche. Kikatakata ku mapunzha aji kwalepa ne oa patanwa bantu bavula bakankalwa ne kumona pa kwikala. Umvwe kyafwainwa, jibumba jikwabo ja kupwila mute jakonsha kulengwa pa kuba’mba bakikulumpe, bengila kimye kya bufuku ne banyenga basongolwa ku babula Bakamonyi batanwengako.

Jibumba jonse ja lufunjisho lwa buku jafwainwa kwikala na basapwishi bakosa ku mupashi kabiji babambakana pamo ne utangijila ne yewa utanga. Onkao mambo, balongo bafwainwa kukanamina uno mwingilo pa kuba’mba bafikepo kwingila mu kipwilo.

Bakulumpe mu kipwilo bakonsha kutundaika kipwilo kuya palutwe mu kumona’mba mabumba a lufunjisho lwa buku aesakana ne kulamwa bulongo ku mupashi kabiji bantu babena kutanwa pa mpunzha iji ku bwipi na kobaji. Umvwe kyakonsheka, mabumba apya afwainwa kulengwa pa kuba’mba bonse bamwenengamo mu luno lunengezho lwawama lwa ku mupashi. Nanchi mwakonsha kuswisha nzubo yenu kwikala mpunzha ya lufunjisho lwa buku nyi? Bavula bauba byonkabyo babena kumwenamo mu mapesho a ku mupashi.