Byo Mwakonsha Kumwenamo mu Jibumba ja Kuya mu Mwingilo Momuji
1 Nanchi mwakelwanga ku mbaji imo ya Lufunjisho lwa Buku lwa Kipwilo nyi? Mabumba ajinga acheche kabiji bantu baikalanga bakasuluka. Kyawamine bingi mambo kitulengelanga kwikala na balunda bakwitutundaika ne kukosesha lwitabilo. (Mana 18:24) Mukulumpe wa lufunjisho lwa buku wayukanga bintu byo twapitangamo ne kwitukwasha. (Mana 27:23; 1 Pe. 5:2, 3) Ne luno tukimwenamo kupichila mu jibumba ja kuya mu mwingilo motuji.
2 Kwitendekelako Anweba Bene: Mabumba a kuya mu mwingilo ekalatu na bantu bacheche byonka byoajinga mabumba a Lufunjisho lwa Buku lwa Kipwilo. Kupichila mu “kwingijila pamo” mu mwingilo na bakwetu kulengela kukosesha bulunda. (Fili. 1:27) Basapwishi banga bo mwaingilapo kala nabo baji mu jibumba momuji? Nanchi “butemwe bwenu bwafwainwa kubaya” mu jije jishinda nyi? (2 Ko. 6:13) Kunungapo, twakonsha kwitako balongo bamo nangwa banyenga baji mu jibumba jetu kwiya na kutanwa ku kupopwela kwa kisemi nangwa ku bya kuja. Mu bipwilo bimo mabumba a mu mwingilo bapimpuzhañana kunengezha bya kuja bya ñambi mwenyi wafuma ku kipwilo kingi. Mu yewo mulungu musa kufwakasha uno ñambi, jibumba jo basala kunengezha bya kuja jiiya pamo na kuja kajo ne kwitundaika nangwa kya kuba ñambi kechi usa kwikalako ne.
3 Byokiji kuba’mba luno kipwilo kisambakanatu jibiji mu mulungu, kino kechi kibena kulumbulula amba bakulumpe bafwainwa kuleka mwingilo wa bukafunga ne. Bakalama ba mabumba bafwainwa kutundaikanga ne kufunjisha basapwishi bonse baji mu jibumba jabo bya kwingila mu mwingilo. Umvwe kya kuba kalama uji mu jibumba jenu kechi wakingilapo kala nenu mu mwingilo ne, mambo ka akubujila kumwambila kwingila nanji? Kunungapo, kalama wa mwingilo wingila na jibumba jimo mu mwingilo kumpelo ya mulungu pa ñondo pa ñondo. Mu bipwilo bicheche mujitu mabumba acheche a kuya mu mwingilo, kalama wamwingilo wafwainwa kunengezha kufwakesha jibumba jimo jimo jibiji mu mwaka. Nanchi mwinengezha kwingilako mu mwingilo kimye kalama wamwingilo kyo abena kufwakesha jibumba mo muji nyi?
4 Kyawama kila jibumba kusambakana bunke bunke pa kuya mu mwingilo kumpelo ya mulungu. Kwikala na mapunzha avula a kusambakenapo pa kuya mu mwingilo, kwakonsha kukwasha basapwishi bonse kufika bukiji ku kusambakana ne kutendeka kwingijila mu nyaunda yabo. Basapwishi bafwainwa kutendeka kuya mu nyaunda yabo panyuma ya kwibabanya kwakubula kuzhinyazhinya ne. Kabiji kipelela ne kalama wa jibumba kulabijila bonse baji mu jibumba janji ne kuyuka byo akonsha kwibakwasha. Nangwa byonkabyo, kuji bintu bimo byakonsha kulengela mabumba abiji nangwa kukilapo kwimvwanga. Umvwe kya kuba kipwilo kyonse kisambakena pamo kuya mu mwingilo pa kibelushi kitanshi mu ñondo nangwa kampe panyuma ya lufunjisho lwa Kyamba kya Usopa, kyafwainwa kuwama kila jibumba kwiikela kabiji kalama wa jibumba yense bafwainwa kumupako kimye kya kwabanya jibumba janji lulombelo lwa kupezhako saka lukyangye.—Monai kakitenguluzha ka kuba’mba “Nanchi Mwakonsha Kuswisha Nzubo Yenu nyi?”
5 Nangwa kya kuba mutanchi wa Lufunjisho lwa Buku lwa Kipwilo waleka, Yehoba watwajijila na kwitupa byonse bikebewa pa kuba’mba tubenga kyaswa muchima wanji. (Hebe. 13:20, 21) Yehoba byo etuta muchima, kechi tukajilwa kiji kyonse ne. (Sala. 23:1) Tumwenamo mapesho avula bingi kupichila mu jibumba ja kuya mu mwingilo motuji. Umvwe twitendekelako ne ‘kukusa byavula tukanowa byavula.’—2 Ko. 9:6.
[Mepuzho a Lufunjisho]
1. Bintu ka byotwamwenangamo mu lufunjisho lwa buku lwa kipwilo byotumwenamo ne luno kupichila mu jibumba ja kuya mu mwingilo motuji?
2. Twakonsha kwitendekelako byepi kulenga bulunda bwakonsha kwitulengela kwikala bakosa ku mupashi mu jibumba ja kuya mu mwingilo motuji?
3. Bimye ka bakafunga mo betukwashisha mu jibumba ja mu mwingilo motuji?
4. (a) Nga kusambakana kwa kuya mu mwingilo kunengezhiwa byepi? (b) Mambo ka o twafwainwa kuswishisha mazubo etu kusambakenangamo pa kuya mu mwingilo?
5. Nangwa kya kuba mutanchi wa Lufunjisho lwa Buku lwa Kipwilo waleka, twakonsha kuketekela ka?
[Kitenguluzha pa peja 6
Nanchi Mwakonsha Kuswisha Nzubo Yenu nyi?
Bipwilo bimo bavwanga mabumba pa kuya mu mwingilo pa kupwa kwa mulungu na mambo akuba mazubo akusambakenamo akepa. Kusambakana kwa kuya mu mwingilo wa mu bujimi nalo ke lunengezho lwa kipwilo, onkao mambo kuswisha nzubo yenu kwikelamo kuno kusambakana ke mapesho. Nanchi mwakonsha kuswisha nzubo yenu kusambakenamo nyi? Kechi mwafwainwa kwikileka na mambo akuba’mba nzubo yenu kechi yafwainwa ne. Bakulumpe bakapitulukamo ne kumona kwaikela nzubo yenu ne bintu bikwabo byo balondelanga pa kusala mpuzha kwaikelanga lufunjisho lwa buku. Umvwe mubena kukeba kuswisha nzubo yenu, mwafwainwa kubula kalama wenu wa jibumba.