Bintu Bitanu Bikwasha Kwikala na Mafunjisho a Baibolo
1. Umvwe kimukatazha kwikala na lufunjisho lwa Baibolo mu nyaunda yenu, mwakonsha kuba byepi kabiji mambo ka?
1 Abya kimukatazha kwikala na lufunjisho lwa Baibolo nyi? Ibikaingako kutendeka mafunjisho a Baibolo. Yehoba upesha boba batwajijila kuba kyaswa muchima wanji. (Gal. 6:9) Panshipo paji bishinka bitanu byakonsha kwitukwasha.
2. Twakonsha kutendeka byepi lufunjisho lwa Baibolo pa kimye kitanshi?
2 Kutatula Lufunjisho lwa Baibolo pa Kimye Kitanshi: Bantu bavula bayuka amba tushatu Kyamba kya Usopa ne Awake!, pano bino kechi bayuka amba tufunjisha ne Baibolo ne. Mambo ka akubujila kutatula lufunjisho lwa Baibolo pa kimye kitanshi kyo mubena kwingila busapwishi bwa ku nzubo ku nzubo? Mwakonsha kwipuzha bantu bamwesha lusekelo bomusapwila umvwe bakonsha kutemwa kufunda Baibolo. Umvwe bakana, mwakonsha kutwajijila na kwibashila magazini pa kuba’mba mwibalengele kwikala na kizaku kya kukeba kufunda. Mulongo umo watwajilanga bamulume ne mukazhi magazini pa myaka yavula. Juba jimo byo ebashijile magazini akatataka wibashikishe amba: “Nanchi mwakonsha kutemwa kufunda Baibolo nyi?” Baswile kufunda. Pa kino kimye babatizhiwa.
3. Nanchi mwakonsha kulanguluka amba bantu bonse batanwa ku kupwila baji na bebafunjisha Baibolo nyi? Londololai.
3 Bantu Batanwa ku Kupwila: Kechi mulangulukenga kuba’mba bantu bonse beya na kupwila baji na bebafunjisha Baibolo ne. Mulongo umo waambile’mba: “Mafunjisho avula a Baibolo o nji nao natendekele kupichila mu kwipuzha bantu bonka baiyanga ku kupwila.” Nyenga umo wasolomokele wamukazhi waumvwanga bumvu wajinga na bana babatizhiwa mu kipwilo. Uno wamukazhi wapwila pa myaka 15 kabiji wafikanga bukiji pa Nzubo ya Bufumu ne kulwasukamo aku kupwila kupwatu. Wamukazhi waswile kufunda Baibolo kabiji mukuya kwa kimye waishile kwikala kamonyi. Nyenga waambile amba: “Nelangulusha bingi pa kupempelela myaka 15 kwakubula kumwipuzha umvwe wakonsha kutemwa kufunda Baibolo!”
4. Mwakonsha kuba byepi pa kuba’mba mutanepo bantu bakeba kufunda Baibolo?
4 Bantu Bakeba Kufunda Bukine: Nyenga umo waile na bakwabo ku mafunjisho abo a Baibolo. Panyuma ya lufunjisho walombele lūsa ku mwina lufunjisho kumuswisha kwipuzha muntu ye bafunjishenga umvwe wayukapo bamo bakonsha kutemwa kufunda Baibolo. Kimye kyo mubena kushila muntu yemuyako jonse buku wa Baibolo Ufunjisha, mwakonsha ku mwipuzha amba: “Nanchi wayukapo bakwabo bakonsha kutemwa uno buku nyi?” Kimye kimo kechi kipela basapwishi ne bapainiya kutana bantu bakufunjisha mu nyaunda yabo ne. Bulai bakwenu amba mukeba kwikalapo na muntu wa kufunjisha Baibolo.
5. Mambo ka o mwafwainwa kwipwizha balongo nangwa banyenga bomupwila nabo baji na benakwabo babula kwitabila umvwe bafwainwa kutemwa kufunda?
5 Bena Kwabo Babula mu Lwitabilo: Nanchi mu kipwilo kyenu mujipo basapwishi baji na bena kwabo babula mu lwitabilo nyi? Bantu bamo babula kwitabila bakana kufunda Baibolo na bena kwabo pano bino bakonsha kuswa kufunda na muntu ungi. Twafwainwa patanshi kukipuzha balume nangwa bakazhi baitabila pa kuba’mba tuyuke bya kwibasolomoka.
6. Lulombelo lwitukwasha byepi kutana muntu ukeba kufunda Baibolo?
6 Lulombelo: Kange muleke kulomba ne. (Yako. 5:16) Yehoba walaya kumvwa milombelo yenu umvwe yayilamo na kyaswa muchima wanji. (1 Yoa. 5:14) Mulongo umo wabujile muntu wakufunjisha Baibolo na mambo a kupayankana watendekele kulomba. Mukazhanji wazhinaukile umvwe ukekalanga na kimye kya kufunjisha bantu, kikatakata umvwe baji na makatazho avula. Wabujile Yehoba bino kupichila mu lulombelo kuba’mba bamwatawanji batanepo muntu wa kufunjisha. Milombelo yanji yakumbwilwe panyuma ya kupitapotu milungu ibiji kimye painiya mu kipwilo kyoataine muntu wakebelenga kufunda kabiji wamutwajile ku uno mulongo. Mukazhanji waambile’mba: “Aba balanguluka amba bakonsha kukankalwa kufunjisha bantu Baibolo na mambo a kupayankana, nashiinwa kuba’mba: Lombelaingapo pa kyonka kyo mubena kukeba kwakubula kuleka. Nji na mapesho avula bingi o nabujile ne kuketekela.” Umvwe ke mulombe na mukoyo, neanweba mukakonsha kutana lufunjisho lwa Baibolo ne kwikala na lusekelo lwa kukwasha muntu kwenda mu “jishinda jitwala ku bumi.”—Mat. 7:13, 14.