Kwingijila Pamo na Bakwetu Kuleta Bingi Lusekelo

¹ Yesu byoatuminenga baana banji ba bwanga 70 kuya na kusapwila, wibafunjishe bya kuya na kwamba, kabiji wibabenye babiji babiji ne kwibabula nyaunda mwa kuya na kusapwila. Kino kibaletejile bingi lusekelo. (Luka 10:1-17) Ne lelo jino, kwingijila pamo na bakwetu kwitukwasha kuyuka byavula, kuyuka bya kunengezha ne kutundaika bantu ba Lesa kwingila mwingilo wa kusapwila.

² Bakulumpe mu Kipwilo bo Batangijila: Bakulumpe mu kipwilo bengila mwingilo mukatampe bingi wa kukwasha bonse kwingilanga mwingilo wa kusapwila. Mukulumpe utangijila mwingilo ye unengezha lunengezho lwa kwingila mwingilo mukachi ka mulungu. Mukulumpe wa lufunjisho lwa buku uji na mutembo wa kunengezha jibumba janji kuya mu mwingilo, kikatakata kumpelo ya mulungu. Pa bimye bimo umvwe kipwilo kyonse kyapwila pamo na kwinengezha kuya mu mwingilo, nabiji panyuma ya Lufunjisho lwa Kyamba kya Usopa, mukulumpe yense wa lufunjisho lwa buku wafwainwa kutangijila jibumba janji.

³ “Na Mushingi ne mo Byalondakena”: Uji yense watongolwa kutangijila kupwila kwa kwinengezha kuya mu mwingilo wa mu bujimi wafwainwa kutendeka kuno kupwila pa kimye, kabiji kwafwainwa kupwa mu maminiti 10 nangwa 15, kechi kukizhapo ne. Wafwainwa patanshi kukyabanya bantu ne kwibabula nyaunda mwa kuya na kwingijila (umvwe bakulumpe batangijila lufunjisho lwa buku kechi basa kuba bino ne, nobe byonka byo kyaambiwapo kala) apa bino lulombelo lwapelako. Kubujila jimo basapwishi kwakuya na kwingijila kwibakwashako kubula kusambakena kuntu kumo, mambo kino kyakonsha kulengela mwingilo wetu uba nobe kechi wanema ne. Kino kyakwatankana ne na lujimuno lwa kwa Paulo lwakuba’mba: “Bintu byonse byubiwe na mushingi ne mo byalondakena.” (1 Ko. 14:40) Kuno kupwila kwa kwinengezha kuya mu bujimi kwakonsha kubiwa bingi bulongo umvwe bonse ke bafike pa kimye, ne kukwatankena pamo na ubena kutangijila, ne kuya bukiji bukiji mu nyaunda aku jibumba jipalañanatu.

⁴ Kwitukwasha Kukwatankena Pamo: Kwingijila pamo na bakwetu kwitulengela kwiyuka na bakwetu mu kipwilo. Nangwa kyakuba kafwapo muzhilo ukanya kunengezhezha jimo na muntu ye mukengila nanji ne, bino kyakonsha kwitufweta bingi inge satutanwa pa kupwila kwa kwinengezha kuya mu mwingilo wa mu bujimi kwakubula kunengezhezha jimo wa kwingila nanji. Bakonsha kwitwabanya na muntu ye twabula kuyukisha bulongo ne, kino kyakonsha kwitulengela kwiyuka nanji bulongo ne ‘kubaisha’ butemwe bwetu.—2 Ko. 6:11-13.

⁵ Kwingijila pamo na bakwetu kwitukosesha ne kwitukwatankenya pamo byotuji ‘ba mingilo bengijila pamo mu mwingilo wa bukine.’ (3 Yoa. 8) Onkao mambo, twayai twingijilenga pamo na bakwetu!