Kusambakana kwa Kuya mu Mwingilo
1. Mambo ka o twatela muchima ku kusambakana kwa kuya mu mwingilo?
1 Yesu washile kya kumwenako kyawama kya bya kwingila ne kutangijila mwingilo wa kusapwila Bufumu. Ne lelo jino aba baji na mutembo wa kutangijila mwingilo wa kusapwila Bufumu batako bingi muchima byonka byo aingilanga. Pa kuba’mba uno mwingilo engilwe bulongo, bipwilo mwaya ntanda jishinda jimo jo bikwashishamo basapwishi kwingila bulongo mwingilo wa Bufumu ke kusambakana pamo kwa mabumba.—Mat. 24:45-47; 25:21; Luka 10:1-7.
2. Kusambakana kwa kuya mu mwingilo kwikala byepi?
2 Lunengezho Lwawama: Ku kusambakana kwa kuya mu mwingilo ko ko bapana lutundaiko, mikambizho, ne lutangijilo ku bonse babena kuya mu mwingilo. Mwakonsha kwisambako pacheche kinembelo kya juba umvwe kibena kwamba pa mwingilo wa mu bujimi. Pa bimye bimo, kwikala kupituluka mu byambo kufuma mu Mwingilo Wetu wa Bufumu, buku wa Ukupelulula, nangwa mu buku wa Isukulu Ilya Butumikishi kuba’mba bakwashe bonse bashinkwako jojo juba babena kuya mu mwingilo. Kabiji kimo kimye kwikala kumwesha bya kusha buku. Bonse bafwainwa kuyuka ye babena kwingila nanji mu mwingilo ne nyaunda ya kwingijilamo saka mukyangye kulomba lulombelo lwa kupezhako. Panyumatu ya misambo ya kubula kukila pa maminiti 15, bonse bafwainwa kuya mu mapunzha abo o bebapa kwingijilamo.
3. Bañanyi baji na mutembo wa kunengezha kusambakana kwa kuya mu mwingilo?
3 Bekunengezha Byepi? Kalama wa mwingilo ye uji na mutembo wa kunengezha kusambakana kwa kuya mu mwingilo. Bakalama nangwa bankwasho ba mabumba bafwainwa kutanwangako ne kwingijila pamo na jibumba jabo ku mpelo ya mulungu. Bakalama ne bankwasho bamo bakonsha kwingijilanga pamo na mabumba mukachi ka mulungu. Bakalama ba mabumba bengijila pamo na kalama wa mwingilo pa kuba’mba bekale na nyaunda mwa kwingijila jibumba jabo ku nzubo ku nzubo ku mpelo ya mulungu. Mukachi ka mulungu kalama wa mwingilo wafwainwa kumona’mba mutanchi wa bakutangijila mabumba a ba kuya mu mwingilo po aji.
4-6. (a) Nkebelo ka ya kusambakana kwa kuya mu mwingilo mu nyaunda ya kipwilo? (b) Ki ka kyakonsha kwimukwasha kusala bimye bya kusambakana kwa kuya mu mwingilo?
4 Kwepi Kwakonsha Kwikela Kusambakana kwa Kuya mu Mwingilo Kabiji Kimye Ka? Mu kifulo kya kuba’mba kipwilo kyonse kisambakenenga pa mpunzha imo, kyawama kusambakena pa mapunzha paipipila balongo, nabiji mu mazubo a balongo aji mu nyaunda na mulanguluko wa kukeba kwingila mu nyaunda yonse. Kabiji mwakonsha ne kwingijisha Nzubo ya Bufumu. Bipwilo byavula bingijisha Nzubo ya Bufumu kusambakenapo panyumatu ya kupwila kwa jashi ja mvula bantu ne lufunjisho lwa Kyamba kya Usopa. Bino kechi kwafwainwa kulepa na nyaunda mwakuya na kwingijila ne. Onkao mambo kyawama kwisambangapo pa kimye pa kimye pa lunengezho ne kumona kuba’mba mapunzha a kusambakenapo aji pawama pakuba kekipele kwingila bulongo mu nyaunda yonse.
5 Mwakonsha kusala kwesakanya na nyaunda kimye kyawama kya kusambakenapo kuya mu mwingilo ne bimye byo mwafwainwa kusambakananga mu mulungu nangwa pa juba jo mwatongola. Ano mepuzho akonsha kwimukwasha kusala bulongo mpunzha ne kimye kya kusambakana.
6 Ñanyi mpunzha yo twakonsha kuteshapo muchima? Kimye ka kyawama kusapwila ku nzubo ku nzubo? Nanchi kimye kya muntuwa muntuwa twakonsha kwingijisha kusapwila ku nzubo ku nzubo nangwa kubwelako nyi? Mwafwainwa kulamika mutanchi wa mwingilo wa mu bujimi pa kipabi kya mabulañano. Basapwishi ba Bufumu bonse bafwainwa kumona kuba’mba baingila bulongo mu mpunzha yo bebapa pa kuba’mba bambe byonka byaambile mutumwa Paulo amba: Naingila ‘mu bino byalo nangwa’mba kafwako mpunzha po nabujile kunyanta ne.’—Loma 15:23.
7. Ñanyi mutembo uji na ubena kutangijila jibumba kuya mu mwingilo?
7 Kutangijila Kusambakana kwa Kuya mu Mwingilo: Ubena kutangijila kuno kusambakana unemeka luno lunengezho lwa Lesa kupichila mu kunengezha bulongo. Kuno kusambakana kwafwainwa kutendeka pa kimye kyafuukulwa ne kwikala kukwashañana kabiji kwa kakimye kacheche, nabiji maminiti 10 kufika 15. Ubena kutangijila wafwainwa kuyukila jimo nyaunda kwa kwingijila kusambakana saka kukyangye kutatula. Nangwa kya kuba panyuma ya kusambakana kechi twafwainwa kupembelela bakelwa ne, kyakonsha kuwama kusha byambo bya kwibabula kwaya na kwingijila jibumba. Bonse bafwainwa kuya bukiji ku nyaunda na kusapwila aku kusambakana kupwatu. Kunengezha ne kutangila bulongo kusambakana kwa kuya mu mwingilo kukwasha bonse bashinkwako jojo juba bya kusapwila bulongo.—Mana. 11:14.
8. Mu ñanyi mashinda bashinkwako ku kusambakana kwa kuya mu mwingilo mo bakwatankena na balongo batangijila?
8 Kushinkwako ku Kusambakana kwa Kuya mu Mwingilo: Kukwatankana kwanema bingi. (Hebe. 13:17) Umvwe kyakonsheka ubena kutangijila jibumba wafwainwa kumona’mba yense uji na wa kwingila nanji. Kyakonsha kuwama bingi umvwe kya kuba basapwishi baibijila saka bashinkwako pa kuba’mba ke bakwashe basapwishi babula kwibijila ne bakatataka. Aba bakeba kwingilako na bakwabo bapusana pusana boba bingi bulongo. (Mana. 27:17; Loma 15:1, 2) Bonse bafwainwa kwibikangako kubula kukelwa. Kunemeka luno lunengezho lwa Lesa ne kulangulukilako bakwetu basapwishi kuketulengela kwingila bulongo mu luno lubaji.—2 Ko. 6:3, 4; Fili. 2:4.
9. Ñanyi mashinda bapainiya mo bakonsha kutundaikila luno lunengezho?
9 Lutundaiko Lupana Bapainiya: Lutundaiko lupana bapainiya pa kusambakana kwa kuya mu mwingilo lwanema bingi kabiji lutundaika. Kwakubula nangwa kuzhinaukatu ne, bapainiya baji na mitembo yavula. Kechi bafunjishatu Baibolo ne kubwelako ku bantu ne, baji ne na mingilo ikwabo nabiji kulama kisemi ne nkito ya ku mubiji. Onkao mambo bapainiya kechi bakonsha kumona’mba bafwainwa kushinkwangako kusambakana kwa kuya mu mwingilo konse kunengezha kipwilo ne, kikatakata inge kwikalako pa juba pa juba. Bino kikebwa bapainiya kushinkwangako ku kusambakana kumo kumo kwa kuya mu mwingilo kwikalako mukachi ka mulungu. Kusambakana kwa kuya mu mwingilo kukwasha bamu kipwilo, kabiji bapainiya byo bayuka bulongo Baibolo ne kwingila mu mwingilo bakonsha kukwasha bingi bakwabo. Kusapwila kimye kyonse kwibalengela kuyuka kwingila bulongo. Bakonsha kufunjishangako ne bakwabo buno busendwe. Kwingila mwingilo na kizaku ne kutundaika kusambakana kwa kuya mu mwingilo kwibalengela kwikala bakumwenako bawama. Basanchilwa bingi pa byo bakumbulapo pa kimye kya kusambakana kwa kuya mu mwingilo.
10. Mambo ka bonse basapwishi ba Bufumu o bafwainwa kuteshako muchima ku luno lunengezho?
10 Byonka byo kyajinga kwi Yesu ne baana banji ba bwanga, lubaji lukatampe lwa mwingilo wetu wa kusapwila Bufumu ke lwa ku nzubo ku nzubo. Nkebelo ya kusambakana kwa kuya mu mwingilo ke ya kwitundaika ne kwingila bulongo uno mwingilo. Bonse basapwishi ba mambo awama bafwainwa kutako bingi muchima ku luno lunengezho lwa Lesa. (Byu. 5:42; 20:20) Twayai atweba bonse twibikengako kushinkwako kusambakana kwa kuya mu mwingilo. Umvwe saka tuba bino Yehoba witupesha kabiji byo tusapwila mambo awama a Bufumu bwa Lesa tusangajika Ntangi wetu aye Yesu Kilishitu.—Mat. 25:34-40; 28:19, 20.