Mwenaingamo Pakatampe mu Kupwila kwa Kuya mu Mwingilo wa mu Bujimi
1. Kupwila kwa kuya mu mwingilo wa mu bujimi kwakonsha kwitukwasha byepi?
1 Kupwila kwa kuya mu mwingilo wa mu bujimi kwanengezhiwa bulongo kutundaikañana bingi kabiji kupana ne mikambizho ingila saka tukyangye kuya mu mwingilo. Kwitulengela kwingijila pamo mwingilo na bakwetu basapwishi kuba’mba twingijilenga pamo nabo kukeba kwikwasha ne kwifunjisha. (Mana. 27:17; Sapwi. 4:9, 10) Twafwainwa kuba byepi pa kuba’mba tumwenengamo pakatampe mu kuno kupwila?
2. Bintu ka ubena kutangijila byo akonsha kwambapo?
2 Ubena Kutangijila: Mitwe ya kwisambapo pa kuno kupwila kechi itanchikilwa jimo ne. Onkao mambo, umvwe yenu mukatangijilanga mwafwainwa kunengezha bulongo. Kechi kimye kyonse kyo mwafwainwa kunengezha kwisamba pa kinembelo kya juba ne, nangwa kya kuba mwakonsha kwikivwangamo mu mwisambo umvwe kibena kwamba pa mwingilo. Langulukai pa mashinda awama akonsha kukwasha babena kuya na kusapwila jojo juba. Kya kumwenako, mwakonsha kwisamba nangwa kumweshapo kimwesho kimo. Mwakonsha kusalapo kupituluka mu byambo bimo biji mu buku wa Ukupelulula, buku wa Nonkelenimo, nangwa mu mutwe wafunjiwe katataka mu Kupwila kwa Mwingilo. Pa bimye bimo mwakonsha kwisamba pa makatazho akonsha kwipuzhiwa mu nyaunda yenu, nangwa mwakonsha kwisamba pa bya kubayisha lusekelo kabiji ne kutendeka mafunjisho a Baibolo, kikatakata umvwe basapwishi bavula babena kubwelako ku bantu bo besambile nabo. Kechi na mambo akyo mubena kwisambapo ne, mweshai kizaku ne lutundaiko.
3. Kuno kupwila kwafwainwa kusenda kimye kyabaya byepi pa kuba’mba kupwe, kabiji bintu ka byafwainwa kubiwa mu kyokyo kimye?
3 Tatulai kupwila pa kimye kyafwainwa, nangwa kya kuba mwayuka’mba kuji basakukelwa. Yukai bya kwabanya mabumba ne kupana nyaunda ya kwingijilamo ku boba babena kukeba. Kuno kupwila kechi kwafwainwa kukilaila pa maminiti 10 kufika ku 15 ne, kabiji umvwe kwalondankana na kupwila kwa kipwilo, kwafwainwa kwikala kwa maminiti achechetu. Saka mukyangye kupwisha kupwila, muntu yense wafwainwa kuyuka wa kwingila nanji kabiji ne kwa kuya na kwingijila. Kupwila kwafwainwa kushinkwa na lulombelo.
4. Ki ka kyakonsha kukwasha bonse kumwenamo pakatampe mu kupwila kwa kuya mu mwingilo wa mu bujimi?
4 Mwakonsha ku Kwashañana: Byonka biji kupwila kwa kipwilo, tupana mushingi kwi Yehoba ne kulangulukilako bakwetu kupichila mu kufika pa kimye kyafwainwa. Kumbulaingapo. Mwakonsha kuleka ubena kutangijila kwimupa wa kwingila nanji, nangwa anweba bene mwakonsha kunengezhezha jimo wa kwingila nanji. Umvwe mukeba kwikebela muntu wa kwingila nanji, esekeshainga na ngovu ‘kubaisha muchima’ kupichila mu kwingila na basapwishi bapusana pusana mu kifulo kya kwingila kimye kyonse na bantutu bamo. (2 Ko. 6:11-13) Pa kupwisha kuno kupwila, chinuzhukai kupimpula ye bemupa kwingila nanji, kabiji ponkapotu mwafwainwa kutatulako kuya ku nyaunda yenu.
5. Kupwila kwa kuya mu mwingilo wa mu bujimi kuji na ñanyi nkebelo?
5 Nkebelo ya kupwila kwa kuya mu mwingilo wa mu bujimi ijitu pamo na kupwila kukwabo kwa kipwilo. Kuno kupwila kwanengezhiwa kuba’mba ‘twilangulukenga atwe bene na bene mu kwiubisha butemwe ne mingilo yawama.’ (Hebe. 10:24, 25) Umvwe twaesekesha na ngovu kumwenamo mu kuno kupwila, po po tukayuka bya kwingila uno ‘mwingilo wawama’ kya kine kine!