Kabokoshi Ka Mepuzho

◼ Ñanyi byambo byafwainwa kwambiwa pakupwila kwakwinengezha kuya mumwingilo wa mubujimi?

Kupwila kwa kwinengezha kuya mu mwingilo wa mubujimi kwikalako kuba’mba kwitukwashe kuta muchima pamwingilo yetubena kuya nakwingila. Onkao mambo, ubena kutangijila wafwainwa kunengezha bulongo nekwamba byambo byakukosesha bantu, bishinka bikebewa byakonsha kwingila. Umvwe kinembelo kya juba kibena kwamba pamwingilo wa busapwishi, kyafwainwa kutangiwa ne kwisambapo pacheche. Pano bino nangwa byonkabyo, byambo byapa kuno kupwila byafwainwa kukonkomwena pamwingilo, nekukwasha bonse babena kuya mumwingilo wa busapwishi kwinengezha kwingila bulongo jojo juba.—2 Timo. 4:5.

Mwakonsha kwambapo bishinka bimo biji mu Mwingilo Wetu wa Bufumu byakonsha kwingila bulongo koko komuji kuba’mba bonse bayuke buku ubena kutambikwa nebyakumutambika. Pa Juba ja Magazini mwakonsha kumwesha kimwesho kiji mukibaba kyakuba’mba “Byakwamba Pakutambika Magazini.” Mumisabilo ikwabo yamwingilo, mwakonsha kumweshapo ñambilo imo nangwa ibiji kufuma mu buku wa Ukupelulula yafwainwa kwingila bulongo munyaunda yenu. Mwakonsha kwisambapo mbaji imo ya mwingilo nangwa kumwesha kimwesho mwakwiyubila, nabiji byakwingijisha Baibolo ku mwinanzubo, mwakukumbwila batemwa kuchibikizha misambo, byakutatula lufunjisho lwa Baibolo nangwa kubwela kubantu bakeba kufunda bukine.

Kupwila kwakwinengezha kuya mumwingilo wa mubujimi, kwabana, kubulañana nyaunda mwakuya nakwingijila nelulombelo kechi kwafwainwa kukila pamaminiti 10 nangwa 15 ne. Pakupalañana, bonse bafwainwa kuyuka yebasa kwingilanga nanji nekumpunzha kwakwingijila, kabiji bukiji-bukiji bafwainwa kuya munyaunda kwakubula kutaya kimye. Na mambo akuba kuno kupwila kwikala kwipi, kyanema bingi bonse kufika bukiji. Umvwe kupwila kwakwinengezha kuya mumwingilo wa mubujimi kwaubiwa panyuma yakupwila kwakipwilo, nabiji kwalufunjisho lwa Kyamba kya Usopa, kechi mwafwainwa kubanda ne. Kechi kyafwainwa kabiji ke mwisambe pa Kinembelo kyajuba ne, mambo mwafunda kala misambo ikwabo yawama yamu Binembelo.

Balongo babatizwa bafikapo bafwainwa kubujiwa jimo juba jobakatangijila kupwila kwakwinengezha kuya mumwingilo wa mubujimi. Umvwe pajojo juba kafwapo mulongo ukatangijila kuno kupwila, bakulumpe mukipwilo bafwainwa kumonapo nyenga umo wabatizwa wakonsha kutangijila umvwe kyashupishatu. Saka aikala, nyenga wakonsha kutangijila mwisambo wakwisambila pamo najibumba kikale kinembelo kyajuba nangwa mitwe ikwabo ibena kwamba pamwingilo wa mubujimi. Byambo byanji byafwainwa kwikala bicheche. Kabiji wafwainwa kuvwala kitambala ku mutwe.

Kupwila kwakwinengezha kuya mumwingilo wa mubujimi ke bimye byawama bingi bitukosesha nekwitukwasha kwinengezha bulongo kwingila mwingilo. Umvwe ubena kutangijila wanengezha bulongo, bonse batanwako bakomvwisha bulongo byambo byo bafunda.