Kusambakana Kwawama kwa Kuya mu Mwingilo

1. Kusambakana kwa kuya mu mwingilo kwaikelako ka?

¹ Juba jimo Yesu wasambakene na baana banji ba bwanga 70 saka akyangye kwibatuma kuya na kusapwila. (Luka 10:1-11) Wibatundaikile kupichila mu kwibambila’mba kechi basa kwikala bunke ne, bino amba Yehoba “Mwine mwina mwingilo wa kunowa” usakwikala nabo. Kabiji wibapele ne mikambizho ya kwibakwasha kwingila mwingilo, ne kunengezha’mba bengile “babiji babiji.” Lelo jino, kusambakana ko twikala nako pa kuya mu mwingilo kwingila mwingilo muntutu umo, ko kuba’mba kwitutundaika, ne kwitukwasha kwinengezha bulongo.

2. Kusambakana kwa kuya mu mwingilo kwafwainwa kulepa byepi?

² Pa kino kimye, kusambakana kwa kuya mu mwingilo kwikala kwa maminiti 10 kufika ku 15, mwavwanga kunengezha mabumba, kwabanya kwa kwingijila ne kulomba. Abino byapimpulwa. Kutendeka mu April, kusambakana kwa kuya mu mwingilo kukekalangatu kwa maminiti atanu kufika ku atanu na abiji. Nangwa byonkabyo, inge kwaikalako panyuma ya kupwila, kechi kwafwainwa kufika ku ano maminiti ne, mambo bantu batanwako bafunda kala bikwabo bya mu Binembelo. Kwikala na kusambakana kwa kuya mu mwingilo kwipi kukalengela bantu bonse kwikala na kimye kyabaya kya kusapwila. Kabiji inge bapainiya nangwa basapwishi bakutendeka kala kusapwila kusambakana kwa kuya mu mwingilo saka kukyangye kutendeka, ko kuba’mba bakekalatu ka kimye kacheche ne kubwela mu mwingilo.

3. Mwakonsha kunengezha byepi kusambakana kwa kuya mu mwingilo pa kuba’mba basapwishi bamwenemo?

³ Kusambakana kwa kuya mu mwingilo bafwainwa kwikunengezha bulongo pa kuba’mba basapwishi bamwenemo. Mu bipwilo byavula, mabumba asambakana bunke bunke kukila kusambakena pa mpunzha imo. Kino kilengela basapwishi kufika bukiji ku kusambakana kwa kuya mu mwingilo ne ku nyaunda kwa kwingijila. Basapwishi bakonsha kusambakana bukiji kabiji kipela ku bakalama ba mabumba kukwasha bonse baji mu mabumba abo. Jibumba ja bakulumpe mu kipwilo jakonsha kumona byafwainwa kwingila bulongo kwesakana na mpunzha ko bekela. Saka mukyangye kulomba lulombelo lwipi lwa kupezhako, bonse bafwainwa kuyukila jimo muntu ye basakwingila nanji ne ko basakwingijila.

4. Mambo ka o twafwainwa kubujila kumwenanga amba kusambakana kwa kuya mu mwingilo kechi kwanema ne?

⁴ Kwanema Byonkatu Biji Kupwila Konse: Na mambo a kuba kusambakana kwa kuya mu mwingilo kutanwatu babena kuya mu mwingilo, kechi bonse ba mu kipwilo bakonsha kutanwako ne. Nangwa byonkabyo, kino kechi kilumbulula’mba kupwila kukwabo kwanema kukila kuno kusambakana ne. Byonkatu biji kupwila kukwabo, kusambakana kwa kuya mu mwingilo ke lunengezho lwafuma kwi Yehoba lwitutundaika kwitemwa atwe bene na bene ne kuba mingilo yawama. (Hebe. 10:24, 25) Onkao mambo, ubena kutangijila wafwainwa kwinengezha bulongo pa kuba’mba babena kuteleka bamwenemo mu mwisambo ne kuleta munema kwi Yehoba. Inge kyakonsheka, basapwishi babena kuya mu mwingilo bafwainwa kutanwako.

Kechi twafwainwa kumonanga amba kusambakana kwa kuya mu mwingilo kechi kwanema ne, bino kujitu pamo na kupwila kukwabo

5. (a) Ñanyi mwingilo uji na kalama wa mwingilo pa kunengezha kusambakana kwa kuya mu mwingilo? (b) Nyenga wakonsha kutangijila byepi kusambakana kwa kuya mu mwingilo?

⁵ Byafwainwa Kunengezha Ubena Kutangijila: Pa kuba’mba muntu anengezhe kwamba jashi pa kupwila, bafwainwa kumupela jimo jashi. Kyo kimotu ne kusambakana kwa kuya mu mwingilo. Inge mabumba asambakana bunke bunke, kalama wa jibumba nangwa nkwasho wanji ye wafwainwa kutangijila. Nangwa byonkabyo, inge kipwilo kyonse kyasambakana kuya mu mwingilo, kalama wa mwingilo ukatongola wa kutangijila. Bakalama ba mwingilo bamo batanchikila jimo mutanchi ne kupa ba kutangijila ne kumubika pa kipabi kya mabuulañano. Kalama wa mwingilo wafwainwa kufuukula bulongo pa kutanchika ba kutangijila, saka avuluka’mba kuno kusambakana kwakonsha kuwamatu inge muntu ubena kutangijila unengezha ne kufunjisha bulongo. Inge kya kuba kafwapo mukulumpe mu kipwilo, nkwasho nangwa mulongo wabatizhiwa wafikilamo, kalama wa mwingilo wakonsha kutongola nyenga wabatizhiwa wafikilamo kutangijila.—Monai kibaaba kya kuba’mba “Inge Nyenga ye Ubena Kutangijila.”

6. Mambo ka o kyanemena ubena kutangijila kunengezha bulongo?

⁶ Inge betupa jashi mu Sukulu wa Mwingilo wa Lesa nangwa mu Kupwila kwa Mwingilo, tutako muchima ne kunengezha bulongo. Kechi tunengezha kimye kyo tubena kuya na kupwila ne kutendeka kulanguluka pa byo tusakwamba ne. Byo byo kyafwainwa ne kwikala inge betupa mwingilo wa kutangijila kusambakana kwa kuya mu mwingilo. Byo kiji kuba’mba kusambakana kwa kuya mu mwingilo kukepipanga, kyanema kunengezha bulongo pa kuba’mba bantu bakamwenemo ne kupwisha mu kimye kyafwainwa. Kunengezha bulongo mwavwanga ne kutambwila jimo nyaunda.

7. Ñanyi bintu bimo ubena kutangijila byo akonsha kwambapo?

⁷ Bya Kwisambapo: Byo kiji kuba’mba manyaunda aenda kupusana pusana, ‘kalume wa kishinka’ kechi wanengezha mutanchi wa kulondela pa kusambakana kwa kuya mu mwingilo ne. Kakitenguluzha ka kuba’mba “Byo Mwakonsha Kwisambapo pa Kusambakana kwa Kuya mu Mwingilo” kaambapo bintu bimo byo mwakonsha kwisambapo. Javula kuno kusambakana kwafwainwa kwikala kwa mwisambo. Bimye bimo mwakonsha kwikala ne bimwesho byo mwanengezha bulongo nangwa vidyo iji pa keyala wa jw.org. Pa kunengezha kusambakana kwa kuya mu mwingilo, ubena kutangijila wafwainwa kulanguluka pa byo akonsha kutundaika ne kukwasha aba babena kuya mu mwingilo jojo juba.

Pa kunengezha kusambakana kwa kuya mu mwingilo, ubena kutangijila wafwainwa kulanguluka pa bintu byakonsha kutundaika ne kukwasha babena kuya mu mwingilo jojo juba kwinengezha bulongo

8. Ñanyi bintu byakonsha kuwama kwisambapo pa kusambakana kwa kuya mu mwingilo pa Kibelushi ne pa Mulungu?

⁸ Javula pa Kibelushi, basapwishi basha Kyamba kya Usopa ne Labainga! Bavula bengila mu mwingilo pa Kibelushi kechi baya mu mwingilo mukachi ka mulungu ne, onkao mambo, bakonsha kulubamo kimwesho kyo banengezhe pa Kupopwela kwa Kisemi. Onkao mambo, kyakonsha kuwama ubena kutangijila kwingijisha mashinda a kwisambilamo aji kunyuma ya Mwingilo Wetu wa Bufumu. Mashinda akwabo ke kwingijisha jashi jiji mu pepala wa byambo, kintu kyamweka nangwa juba ja kukokoloka kwikala jishinda ja kupainamo magazini ne kubuula mwina nzubo byo kyakwatankana na biji mu magazini pa kuba’mba tukabweleko inge watambula magazini. Inge bamo batanwa ku kusambakana kwa kuya mu mwingilo batendekele kala kusha magazini o mubena kusha, ubena kutangijila wakonsha kwibambila’mba bambe mashinda o babena kwingijisha nangwa kwamba byamweka bibatundaika. Pa mulungu, ubena kutangijila wafwainwa kuba byonkabye pa kumwesha bya kuba na byo babena kusha mu yewo ñondo. Mabuku a kufundamo nabiji Baibolo Ufunjisha ne buloshuwa wa Mambo Awama ne Umvwainga Byamba Lesa mwakonsha kwiasha juba jiji jonse, onkao mambo, ubena kutangijila wakonsha kwambakotu pacheche pa bya kusha ano mabuku.

9. Ñanyi bintu byo mwakonsha kwisambapo ku mpelo ya mulungu inge muji na mukwekele wiikajila?

⁹ Inge kipwilo kiji na mukwekele wiikajila ku mpelo ya mulungu, ubena kutangijila wakonsha kwamba pa bya kusha magazini pamo na kapepala ka kwichilapo bantu nangwa talakiti, nangwa kwisamba bya kuba inge bataana muntu wamwesha lusekelo. Jishinda jikwabo ke kwisamba pa byamwekele bibena kumwesha buneme bwa mukwekele.

10, 11. Mambo ka o kyanemena basapwishi kwinengezha pa kuba’mba kusambakana kwa kuya mu mwingilo kuwame?

¹⁰ Basapwishi byo Bafwainwa Kunengezha: Basapwishi nabo kuji byo bakonsha kuba pa kuba’mba kusambakana kwa kuya mu mwingilo kuwame. Inge saka banengezhezha jimo kuya mu mwingilo, kampe pa kupopwela kwa kisemi, bakekala na bya kubuulako basapwishi bakwabo. Kunengezha bulongo kwavwangamo ne kutambula magazini ne mabuku akwabo saka tukyangye kuya ku kusambakana kwa kuya mu mwingilo pa kuba’mba bonse baye mu nyaunda kwa kubula kutaya kimye.

¹¹ Kabiji kyanema kufika bukiji ku kusambakana kwa kuya mu mwingilo saka kwashala maminiti acheche kutendeka. Twafwainwa kufika pa kupwila konse mu kimye kyafwainwa. Nangwa byonkabyo, twakonsha kuvulañanya mutanchi inge twakelwa ku kusambakana kwa kuya mu mwingilo. Mu ñanyi jishinda? Kuji bintu byavula bitalapo ubena kutangijila saka akyangye kunengezha jibumba. Inge pajitu basapwishi bacheche baiya, wakonsha kufuukulapo kwibatuma mu nyaunda yo babula kwingijilamo javula. Inge bamo baji kwiyatu panshi ku kusambakana kwa kuya mu mwingilo kabiji nyaunda iji kwalepa, wakonsha kwibabanya na basapwishi baji na myotoka. Inge mu nyaunda muji bumbanzhi bwavula, wakonsha kwambila mulongo kwingila na banyenga nangwa kwingijila kwipi na ko babena kwingijila. Basapwishi bakolwakolwa wakonsha kwibatuma kuya na kwingijila mu mikwakwa yabula mwa kutuntauka nangwa mu mazubo atentakana. Basapwishi ba katataka bakonsha kwibabanya na basapwishi bapijilwa. Bino inge basapwishi bakelwa, kikalengela kutendeka kwibabanya jikwabo pa kuba’mba aba bakelwa bebavwangemo. Kuji bintu bimo byakonsha kulengela kukelwa. Nangwa byonkabyo, inge tuji na muteeto wa kukelwa, twafwainwa kwiipuzha atweba bene inge kubula kunemeka kusambakana kwa kuya mu mwingilo ko kulengela nangwa tukankalwatu kwinengezhezha jimo.

12. Inge javula mwinengezhezha ba kwingila nabo, ñanyi bintu byo mwafwainwa kulangulukapo?

¹² Basapwishi beya ku kusambakana kwa kuya mu mwingilo bakonsha kunengezhezha jimo ba kuya nabo kusambakana saka kukyangye kutendeka nangwa bakonsha kwibapa ba kwingila nabo. Inge javula mwinengezhezha ba kuya nabo, nanchi mwakonsha ‘kubaisha butemwe bwenu’ kupichila mu kwingilako na basapwishi bapusana pusana kukila kwingilatu na balunda nenu kimye kyonse nyi? (2 Ko. 6:11-13 tubyambo twa panshi.) Nanchi bimye bimo kechi mwakonsha kunengezha kwingilako na musapwishi wa katataka kuba’mba mumukwashe kuyuka bya kufunjisha nenyi? (1 Ko. 10:24; 1 Timo. 4:13, 15) Telekeshai inge bemubuula mikambizho, kubikakotu ne ko musakutendekela kwingijila. Inge kusambakana kwapwa, chinuzhukainga kupimpula ba kwingila nabo kabiji yai mu nyaunda ponkapotu.

13. Inge kya kuba bonse batanwako benengezha bulongo, tukamwenamo byepi mu kusambakana kwa kuya mu mwingilo?

¹³ Byo bapwishishe kusapwila, bonse 70 Yesu bo atumine mu mwingilo “babwelele na lusekelo.” (Luka 10:17) Kwa kubula nangwa kuzhinaukatu ne, byo besambile ne Yesu saka bakyangye kuya mu mwingilo bibakwashishe bingi. Ne lelo jino, kusambakana kwa kuya mu mwingilo kwakonsha kwitukwasha. Inge kya kuba bonse batanwako benengezha bulongo, kusambakana kwa kuya mu mwingilo kuketutundaika ne kwitukwasha kwinengezha bulongo, ne kupwisha mwingilo pa kuba’mba tushimune “bukamonyi ku bisaka byonse bya bantu.”—Mat. 24:14.

Inge Nyenga ye Ubena Kutangijila

Nyenga wafwainwa kuvwala kitambala ku mutwe kabiji wafwainwa kwikala inge ubena kutangijila kusambakana kwa kuya mu mwingilo. Byo akanengezha kwisambapo byafwainwa kwesakana na byakonsha kunengezha mulongo. Kechi wafwainwa kuba nobe ubena kufunjisha luonde ne, bino wafwainwa kwikala mwisambo wa jibumba. Inge waambila nyenga mukwabo wabatizhiwa kulomba, awo nyenga wafwainwa kuvwala kitambala. Inge mulongo wabatizhiwa waiya nyenga saka atendeka kala kutangijila, nyenga ukambila mulongo kuba’mba apwishe kuno kusambakana. Kalama wa mwingilo wafwainwa kulangulukila jimo byafwainwa kumweka ne kupaina jimo mikambizho pa kukepeshako makatazho. Nabiji, inge nyenga bamwambila kutangijila saka paji ne mulongo mwanyike wabatizhiwa, bino bakulumpe mu kipwilo bamona’mba ukyangye kufikilamo kutangijila. Inge kyaikala bino, kalama wa mwingilo wafwainwa kwambila nyenga amba atangijile kusambakana kabiji mulongo wafwainwatu kulomba inge bakulumpe mu kipwilo bamona’mba wafikilamo. Nangwa kampe paji mulongo ye babika pa bizhila amba kechi wafwainwa kutangijila nangwa kulomba mu kipwilo ne, na mambo a bintu bimo byayuka bakulumpe. Bakulumpe kechi bafwainwa kubuula nyenga byalengela ne, bino bakamwambila kutangijila ne kulomba nangwa kya kuba mulongo po aji. Bakulumpe bafwainwa kubuula mulongo moba banyenga o bakatangijila kusambakana kwa kuya mu mwingilo.

Byo Mwakonsha Kwisamba pa Kusambakana kwa Kuya mu Mwingilo:

Mashinda a kwisambilamo aji mu Mwingilo Wetu wa Bufumu.
Vidyo iji pa keyala wa jw.org.
Jishinda jimo jawama ja kwisambilamo nabiji kutendeka mwisambo, bya kwamba pa kuba’mba tukabweleko, nangwa kubuula bantu lunengezho lwa kupanako bupe inge batambula mabuku.
Kinembelo kitundaika nangwa kilumbulula bya kwingila mu mwingilo.
Kyamwekele mu bujimi kyo banemba nangwa kyamwekele kwenu.
Byambo biji mu kibaaba kya mu Mwingilo Wetu wa Bufumu.
Byambo byajinga mu jashi ja mu Kupwila kwa Mwingilo jaambiwe katataka.
Byambo byafuma mu Kyamba kya Usopa bibena kwamba pa mwingilo.
Byambo byafuma mu mabuku nabiji buku wa Sukulu wa Mwingilo ne buku wa ‘Iyai Mundondelenga.’
Bintu biji pa keyala wa jw.org byo mwakonsha kwingijisha mu mwingilo.
Bintu biji mu Baibolo wa katataka wa Binembelo bya Ntanda Ipya byo mwakonsha kwingijisha mu mwingilo.
Bya kutendeka mwisambo na muntu ye mwataana mu nyaunda yenu, nabiji wamba’mba Lesa ufwako, waitabila’mba bintu byaalukiletu, Muhindu nangwa Mubuddha.
Bya kukumbula bantu bakeba kuchibikizha mwisambo.
Bya kukwasha ye mubena kwingila nanji mu mwingilo kuyuka bya kusapwila bo ataana pa nzubo.
Bya kuba inge mwataana muntu wamba mulaka ungi.
Bya kwingila mbaji imo ya mwingilo isakwingijishanga bamo nabiji, kuya na kukeba bantu, kusapwila pa foni, kusapwila ku mvula bantu, kubwelako nangwa kufunjisha bantu Baibolo.
Kwibavululako byo bakonsha kwizhikijila, kubula kukosela pa kintu kimo, byubilo byawama, kwikala ba lusekelo nangwa bikwabo bipasha na bino.