Mwakonsha Kuswisha Nzubo Yenu Kupwilangamonyi?
1 Mukitota-myaka kitanshi, bena Kilishitu bavula baswishishe mazubo abo kupwilamo. (1 Ko. 16:19; Kolo. 4:15; File. 1, 2) Mubipwilo bimo lelo jino, kechi baji namapunzha avula a Lufunjisho lwa Buku pa Kipwilo nangwa kupwila kwakwinengezha kuya mumwingilo wamubujimine. Kino kyakonsha kulengela mabumba amo alufunjisho lwa buku kupwilanga bantu 30 nekukilapo kukilaila pa 15, nambala yabantu bafwainwa kutanyiwanga mujibumba jimo.
2 Jishuko Jawama: Abya mwakilangulukapo kala amba mwakonsha kuswisha nzubo yenu kuba’mba ikale yakufunjilamo Lufunjisho lwa Buku pa Kipwilo nyi? Kibamba kyavungulukako bulongo kyabutooto, mwauba kyeya bulongo kabiji mupita mwela kijitu bulongo kupwilamo. Kwikala nalufunjisho lwa buku munzubo yenu kejishuko jawama bingi, mambo lufunjisho lwa buku kekupwila kwakipwilo kabiji kemutanchi watanchikwa na Yehoba wakufunjishishamo bantu banji. Bavula bamba’mba bamwenamo bingi mfweto kumupashi mukuswisha mazubo abo kwingijishiwa mujino jishinda.
3 Umvwe mwalanguluka’mba muji nanzubo yafwainwa kupwilangamo, kwakubula nekutaya kimyene, bulai bakulumpe mukipwilo. Kampe babena kukeba mazubo akupwilangamo. Inge mwikimona’mba munzubo yenu kechi mwafwainwa kwikela lufunjisho lwa buku ne, nga kupwila kwakwinengezha kuya mumwingilo wamubujimi kuba kekubiwemo nenyi? Nangwatu kyakuba’mba pakyokyo kimye kechi pabena kukebewa nzubo yakupwilangamone, bakulumpe mukipwilo bakasanta bingi umvwe baumvwa’mba mwaswisha nzubo yenu. Kulutwe nalwendo kupwila kwakonsha kuba kekwikele munzubo yenu.
4 Kupana Mushingi: Kimye kyakupwila munzubo, bonse batanwako kechi bafwainwa kutendeka kukwataula-kwataulanga bipe byabene benanzubone. Bansemi bafwainwa kumona kuba’mba baana babo baikala monka mukibamba kyaswishiwa kufunjilamo, kechi bafwainwa kwibaleka kebatwele kubibamba byakukachi kobabula kwibaswishane. Kabiji kikebewa bingi kutako muchima kumona kuba’mba kechi pajipo bintu bimo bibena kubiwa byakonsha kukatezhamo bomuji nabo kinkalankulo nayoyo nzubo yomupwilamone.—2 Ko. 6:3, 4; 1 Pe. 2:12.
5 Bahebelu 13: 16 betutundaika’mba: “Kuba byawama ne kupana bya kupana kwikuvulama ne: mambo bitapisho bya byonka bino byo bimutokesha Lesa ku muchima.” Kuswisha nzubo yenu kupwilangamo kupwila kumo kwakipwilo kejishinda jimo jawama bingi kupainamo byawama kubakwenu ne ‘kunemeka Yehoba na bintu byenu.’—Mana. 3:9.