Kwashai Mukulumpe Wenu Walufunjisho lwa Buku Pakipwilo
1 Atweba bonse pamuntu pamuntu tufunda byavula bingi Mulufunjisho lwa Buku Pakipwilo. Ñondo wapwa twaambile pamingilo ingila mukulumpe Walufunjisho lwa Buku Pakipwilo. Pano bino twakonsha kuba byepi pakuba’mba tumukwashe nekumwenamo byawama atwe bene nebakwetu pamo?
2 Tanwaingako Mulungu Nemulungu: Kyanema bingi anweba kutanwako mambo mabumba alufunjisho lwabuku ekalatu abantu bacheche. Monai kuba’mba mubena kutanwako mulungu nemulungu. Kabiji mwakonsha kukwashañana umvwe samufika bukiji, mambo kino kikwashako mukulumpe kutendeka bukiji kupwila monka mujishinda janengezhiwa bulongo.—1 Ko. 14:40.
3 Mikumbu Ikoseshañana: Jishinda jikwabo jomwakonsha kukwashañenamo kekunengezhezhanga jimo lufunjisho kuba’mba mukumbulenga mikumbu yapita mukyaji ikoseshañana. Kyawama kukumbulanga mikumbu yaamba pakishinka kimo, mambo kino kilengela bakwetu nabo kukumbulapo. Kechi mwafwainwa kwamba pabishinka byonse biji mupalagalafune. Umvwe kishinka kimo kimufika pamuchima, kumbulaipo mulondolole byobyafikilamo.—1 Pe. 4:10.
4 Umvwe mwaikala najishuko jakutanga mapalagalafu, tangai bulongo kuba’mba jibumba jimwenemo. Ntangilo yawama ilengela lufunjisho kuwama.—1 Timo. 4:13.
5 Kusapwila Pamo Najibumba: Kupwila kwakuya mumwingilo wamubujimi kwikalako mumapunzha alufunjisho lwabuku, kabiji umvwe mwatanwako kuuno mutanchi, kikwashako mukulumpe byoatangijila mwingilo wabusapwishi. Monai luno lunengezho kuba’mba kejishinda jimo jakwimupwañenyamo pamo nabalongo benu nekwibakwasha.
6 Sawakya Wamwingilo Wamubujimi: Kupana bukiji sawakya wenu wamwingilo wamubujimi kumpelo yañondo pañondo pañondo kejishinda jikwabo jakukwashishamo mukulumpe mukipwilo. Mwakonsha kumupa sawakya wenu nangwa kubika mukabokoshi kakubikamo masawakya amwingilo kaji mu Nzubo ya Bufumu. Mukano kabokoshi munembeshi momoatola masawakya amwingilo wamubujimi abikamo bakulumpe balufunjisho lwa buku.
7 Musanchilwa bingi pakwingijila pamo namukulumpe wenu Walufunjisho lwa Buku Pakipwilo. Kyakilapo, yukai’mba Yehoba ‘ukekala ne mipashi yenu.’—Fili. 4:23.