Funjilai ku Bangauzhi—Habakuka
1. Mambo ka o twakonsha kumvwina byonka byaumvwine ngauzhi Habakuka?
1 Bubi byo bubena kuvujilako mu ino ntanda, twakonsha kumvwa byonka byaumvwine Habakuka waipwizhe Yehoba amba: “Mambo ka o mundengela kumona bintu byatama? Kabiji mambo ka o mwalekelatu bantu na kumanyika bakwabo?” (Ha. 1:3; 2 Timo. 3:1, 13) Kulanguluka pa byambo byaambile Habakuka ne bukishinka bwanji kwakonsha kwitulengela kupembelela juba ja kije ja Yehoba.—2 Pe. 3:7.
2. Twakonsha kumwesha byepi amba tuji na lwitabilo lelo jino?
2 Ikalai na Lwitabilo: Mu kifulo kya kulefulwa na mambo a bintu byamwekelenga, Habakuka watwajijile kwikala wa kishinka. (Ha. 2:1) Yehoba waambijile uno ngauzhi amba byambo byanji bikafika pa kimye kyatongolwa kabiji amba “mololoke ukekala na bumi na mambo a bukishinka bwanji.” (Ha. 2:2-4) Bena Kilishitu babena kwikala mu kino kimye kya ku mpelo bakonsha kufunjilako ka ku kino? Nangwa kya kuba kechi twayuka kimye kikeya mpelo ne, twafwainwa kushiinwa amba ikeya. Lwitabilo lwitulengela kutwajijila kwikala balaba ne kutangizhako mwingilo wa kusapwila.—Hebe. 10:38, 39.
3. Mambo ka o twafwainwa kutwajijila kwingijila Yehoba ne kwikala na lusekelo?
3 Sangalelainga mwi Yehoba: Kimye Gogi wa mu ntanda ya Magogi kyo akalukuka bantu ba Yehoba, lwitabilo lwetu lukesekwa. (Ezi. 38:2, 10-12) Umvwe kwaikala kulwa, bintu bikatazha bingi ku bantutu bonse. Kajo kakepa. Bipe byonaika kabiji bwikalo bukatazha. Tukoba byepi inge makatazho akeye? Habakuka waketekejilenga amba ukapita mu makatazho, onkao mambo, watwajijile kwingijila Yehoba ne kwikala na lusekelo. (Ha. 3:16-19) “Lusekelo lwa Yehoba” luketukwasha kuchinchika meseko aji kulutwe.—Ne. 8:10; Hebe. 12:2.
4. Ñanyi lusekelo lo tuji nalo pa kino kimye kabiji ne kulutwe?
4 Bantu Yehoba bo akapulusha mu juba ja kije bakatwajijila kwibafunjisha mu jishinda ja Lesa ja ku bumi. (Ha. 2:14) Bantu bakasangulwa nabo bakafunda pe Yehoba. Twayai tutwajijile kwamba pe Yehoba ne pa mingilo yanji ya kukumya kimye kyonse!—Sala. 34:1; 71:17.