Lesa Witubuula Bintu Byawama Biji Kulutwe

Lesa byo alengele bantu, wisambanga nabo kwingijisha bamalaika ne bangauzhi. Wanembele milaye yanji yonse yaamba pa bintu bya kulutwe. Kabiji witulaya kuba’mba tukekalanga bingi bulongo. Pano lelo jino, kwepi ko twakonsha kutaana ino milaye?

Milaye ya Lesa yanembwa mu Baibolo. (2Timoti 3:16) Lesa waingijishe byepi bangauzhi kunemba ino milaye? (2 Petelo 1:21) Lesa wabikile milanguluko yanji mu michima ya banembi, bino abo beinemba. Fwanyikizhai kuba’mba mukulumpe wa nkito waambila munembeshi wanji amba amunembeleko nkalata. Nanchi twakonsha kwamba’mba ino nkalata ya munembeshi nyi? Ine. Kyo kimotu, Lesa naye waingijishe banabalume kunemba Mambo anji, ye mwine wanembele Baibolo.

BANTU BAVULA BAJI NA BAIBOLO

Lesa ukeba bantu bonse kutanganga Baibolo ne kumvwa byo batanga. Lelo jino “mambo awama a myaka ne myaka” abena kusapwilwa “ku bisaka bya bantu byonse ne ku mikoka yonse ne milaka yonse.” (Lumwekesho 14:6, tubyambo twa panshi) Lesa wakwashishe banabalume kunemba Mambo anji. Mambo a Lesa beanemba mu milaka kukila pa 3,000 kukila mabuku akwabo.