Bya Kwingijisha Biji pa Kipungu kya Kuba’mba Bya Kwisamba na Bantu

Kutendeka mu January 2018, pa nkupiko ya Mutanchi wa Kupwila kwa Bwikalo ne Mwingilo Wetu wa Bwina Kilishitu patendekele kwikala kipungu kya kuba’mba bya kwisamba na bantu. Twafwainwa kwikingijishanga byepi?

Pa Kwamba Majashi a Baana ba Sukulu: Mwafwainwa kwingijisha bwipuzho, kinembelo ne pa kutendekela pa kubwelako. Pano bino, kechi kibena kulumbulula’mba mwafwainwa kusombololatu byonka byo baamba mu vidyo wamwesha bya kwisamba na bantu ne. Mwakonsha kwisamba na bantu kwingijisha jishinda japusanako, ntendekelo ingi ne bikwabotu byakonsha kupusanako. Kabiji mwakonsha ne kusha buku ye tufunjishamo bantu Baibolo nangwa kya kuba kechi byobyo baamba mu mikambizho ya jashi jenu ne.

Mu Mwingilo wa Kusapwila: Kipungu kya bya kwisamba na bantu bekinengezha kwimukwasha kuyuka bya kutendeka misambo. Inge muntu watako muchima kabiji ubena kukeba kumvwinapo byavula, mwakonsha kutwajijila na mwisambo. Inge mukeba mwakonsha ne kwingijisha biji pa bya kwamba pa kubwelako. Mwakonsha kwalulako mwakwambila nangwa kwambatu mu jishinda japusanako. Nanchi byo twaingijishenga pa kwisamba na bantu ñondo wapwa nangwa kinembelo kikwabo kyakonsha kulengela bantu kuteshako muchima koko kwenu nyi? Nanchi bantu babena kulanguluka pa kyamwekele nangwa pa bibena kumweka koko kwenu nyi? Mwakonsha kwingijisha kipungu kya bya kwisamba na bantu mu jishinda japusanako, bino saka ‘muba bintu byonse na mambo a mambo awama, pa kuba’mba mwiasapwile ku bantu.’—1Ko 9:22, 23.