Tumwesha Butemwe Inge ke Tutundaike Lujimuno lwa Yehoba

Kupanga muntu kuzhikijila kipwilo kabiji kukwasha ne muntu walenga mambo. (1Ko 5:6, 11) Inge twalondela lujimuno lwa Yehoba, tumwesha’mba twatemwa yewo muntu. Pano kyakonsha kwikala byepi bino mambo muntu inge bamupanga mu kipwilo kikozha ku muchima bonse bavwangwamo nabiji balongo ba yewo muntu ne bajinga mu kavoto ka mambo?

Kyakila pa byonse, tukeba kumwesha’mba twatemwa Yehoba ne mizhilo yaamba pa buzhile bwanji. (1Pe 1:14-16) Kabiji tumwesha butemwe muntu ye bapanga mu kipwilo. Nangwa kya kuba kikola bingi ku muchima inge muntu bamufundako, bino mufuma “bipangwa bya mutende ne bololoke.” (Heb 12:5, 6, 11) Tumwesha’mba kechi twanemeka lujimuno lwa Yehoba ne, inge ke tupwanañane na muntu wapangiwa nangwa na muntu wipatula mwine ku kipwilo. Twafwainwa kuvulukanga kuba’mba Yehoba ‘ujimuna monka mo kyafwainwa.’ (Ye 30:11) Umvwe ke tutundaike lujimuno lwa Yehoba ne kutwajijila kwikala bakishinka kwi Yehoba, tukakwasha muntu ye bapanga mu kipwilo kubwela kwi Shetu wa lusa.—Is 1:16-18; 55:7.

TAMBAI VIDYO WA KUBA’MBA TWAJIJILAI KWINGIJILA LESA MU BUKISHINKA, APA BINO MUKUMBULE ANO MEPUZHO:

• 

  Bansemi bena Kilishitu bomvwa byepi ku muchima inge mwana waleka kwingijila Yehoba?

• 

  Balongo ne banyenga mu kipwilo bakonsha kukwasha byepi ba mu kisemi batwajijila kwikala bakishinka?

• 

  Ñanyi jishimikila ja mu Baibolo jimwesha’mba kwikala bakishinka kwi Yehoba kwanema bingi kukila kwikala bakishinka ku kisemi kyetu?

• 

  Twakonsha kumwesha byepi amba twanemeka kwikala bakishinka kwi Yehoba kukila ku ba mu kisemi kyetu?