Ingijishainga mu Mwingilo Buloshuwa wa Kuba’mba Mukekala Myaka ne Myaka!

Tuji bingi na lusekelo pa kwikala na buloshuwa ne buku wa katataka wa kufunjishamo bantu Baibolo! Tubena kulomba kuba’mba Yehoba apeshe mwingilo wetu pa kuba’mba tukwashe bantu bavula kwikala baana ba bwanga. (Mat 28:18-20; 1Ko 3:6-9) Pano twafwainwa kwingijisha byepi uno buloshuwa ne buku wa katataka ye twatambwila?

Byo kiji kuba’mba buloshuwa wa kuba’mba Mukekala Myaka ne Myaka!, bya kufunda Baibolo, tukamwingijishanga mu jishinda japusanako pa kufunjisha, mwafwainwa kulondela ano mashinda pa kunengezha ne pa kufunjisha bantu.a

• Tangai mafuka ne kwisambapo kwingijisha mepuzho

• Tangai binembelo byo baamba’mba “tangai” ne kwisambapo na ye mubena kufunjisha pa kuba’mba mumukwashe kumvwisha mwatala kinembelo

• Mutambishai mavidyo ne kwisambapo kwingijisha mepuzho o bamwesha mu buku

• Mwafwainwa kupwisha mutwe yense ye mwatendeka kufunjishamo muntu

Inge muji mu mwingilo, tendekelaipo kupa muntu buloshuwa pa kuba’mba muyuke inge ubena kukeba kufunda. (Monai kakitenguluzha ka kuba’mba “Bya Kuba pa Kushiila Bantu Buloshuwa wa kuba’mba Mukekala Myaka ne Myaka! pa Kimye Kitanshi.”) Inge mwapwisha kumufunjisha mu buloshuwa kabiji mwamona’mba ye mubena kufunjisha ubena kukeba kutwajijila kufunda Baibolo, mupai buku ne kutendeka kumufunjisha mu mutwe 04. Umvwe kya kuba mubena kufunjisha muntu mu buku wa Nanchi Baibolo Waamba’mba Ka? nangwa mu buku wa Ikalai mu Butemwe bwa Lesa, mutwalai mu buku wa kuba’mba Mukekala Myaka ne Myaka! ne kumona po mwakonsha kutatwila kumufunjisha mu uno buku.

TAMBAI VIDYO WA KUBA’MBA MWENAIMO MU KUFUNDA BAIBOLO, APA BINO MUKUMBULE ANO MEPUZHO:

• Ñanyi bintu bikafunda bantu bo tufunjisha Baibolo biji mu uno buku wa katataka?

• Mambo ka o mwafwainwa kutambisha uno vidyo ba katataka babena kufunda Baibolo?

• Ñanyi bikonkwanyi byo mwafwainwa kutundaika bo mufunjisha Baibolo kufikizha?—Monai kakitenguluzha ka kuba’mba “Paimena Kipungu ne Bikonkwanyi bya Muntu Ubena Kufunda Baibolo”