Bya Kukwasha Baponenwa na bya Malwa

Lelo jino, bya malwa bibena kuyatu na kuvujilako. Inge kwamweka bya malwa kikebewa kunengezha bulongo ne kupaana bukwasho bukebewa bukiji. Na mambo a kino, Jibumba Jitangijila jabikako kavoto katala pa baponenwa na bya malwa mu misampi yonse mwaya ntanda.

Balongo baji mu kano kavoto inge baumvwa’mba kwamwenka bya malwa, bukiji bukiji batumina bakulumpe ba ku yonkayo mpunzha kwamwenka bya malwa pa kuba’mba bayuke bukwasho bo bafwainwa kupaana ku basapwishi. Inge kya kuba bintu byaonaika byavula bingi kya kuba basapwishi ba ku yonkayo mpunzha bafwabo bulume bwa kukonsha kuwamisha ne, musampi utongola balongo bakonsha kutangijila bulongo yeo mwingilo. Abano balongo bakonsha kwambila balongo ne banyenga bakonsha kwipana kwingila uno mwingilo nangwa kupaanako bintu bibena kukebewa. Nangwa bakonsha kupota ku yonkayo mpunzha bibena kukebewa ne kupa balongo ne banyenga baponenwa na bya malwa.

Kuji bintu byawama bilengela kubila bintu mu jino jishinda. Kubula kulekela balongo kuba’mba beingijile abo bene kwitukwasha kwingila bulongo, kubula kutaya mali avula ne kubula kwingijisha bintu byavula.

Balongo bo batongola ku musampi bayuka mali o bakonsha kwingijisha ne balongo ne banyenga bakonsha kuya na kukwasha baponenwa na bya malwa. Bano balongo bakonsha ne kwisamba na bamukafulunde pa kuba’mba uno mwingilo ende bukiji. Onkao mambo, balongo kechi bafwainwa kutambulanga mali, kutuma mali nangwa kuya kumpunzha kwamweka bya malwa ne, kanatu inge bebaswisha ku ofweshi wa musampi.

Nangwa byonkabyo inge bya malwa byamwenka, tukeba kupaana bukwasho. (Hebe. 13:16) Na mambo a kuba’mba twatemwa balongo, twafwainwa kuba byepi? Kintu kyanema kyo twafwainwa kuba, ke kulombelangako aba baponenwa na bya malwa ne boba babena kupaana bukwasho. Kabiji twakonsha ne kupaanako mali a kukwasha mu mwingilo wa ntanda yonse. Na lutangijilo lwa Jibumba Jitangijila maofweshi a misampi o ayuka kwakonsha kwingila bulongo ano mali. Kabiji inge tubena kukeba kuya na kwingilako uno mwingilo, twakonsha kunemba pepala wa kuba’mba Local Design/Construction Volunteer Application nangwa’mba (DC-50).

TAMBAI VIDYO WA KUBA’MBA MUYULO MUKATAMPE WAJINGAKO MU BRAZIL, APA BINO MUKUMBULE BUNO BWIPUZHO

Ñanyi kintu kyo mwatemwa pa mwingilo waingijile bakamonyi ba kwa Yehoba panyuma ya muyulo mukatampe wajingako mu Brazil mu mwaka wa 2020?