Kabokoshi Ka Mepuzho

◼ Jishinda ka jawama ja kupainamo mali a kukwasha balongo bakajilwa mu byalo bikwabo?

Bimye bimo, tumvwa kuba’mba balongo mu byalo bikwabo bakajilwa bintu bya ku mubiji na mambo a kumanyikwa, bya malwa, ne makatazhotu akwabo. Na mambo a bino, balongo bamo batuma mali ku maofweshi a musampi mu byobyo byalo. Kwakonsha kwikalako kulomba mali kuba’mba engijishiwe kukwasha bantu bamo, kipwilo, nangwa kishimikwa kyatongolwa kushimikwa.—2 Ko. 8:1-4.

Nangwa kya kuba kuta muchima bakwetu ba mulwitabilo kwa uno mutundu kusanchilwa bingi, javujisha kuji bintu bimo bikebewa kutalapo bukiji bukiji kukila pa bibena kulanguluka yewo ubena kutuma bupe. Bimye bimo, bintu bimo byo alangulukile kukwashañana, kyakonsha kutanyiwa kuba’mba byaingijiwapo kala. Nangwa byonkabyo, twakonsha kuketekela’mba umvwe bupe bwa mali a ntanda yonse, Mali a Mazubo a Bufumu nangwa mali apanwa umvwe kwapona bya malwa atumwa ku ofweshi wa musampi wa monka mu kyalo kyetu, engijishiwa monka mwayila mulanguluko wa muntu wiapana.

Maofweshi a musampi onse beafunjisha bingi bulongo kuyuka bya kuba bukiji bukiji na bintu bikajilwa balongo bipulumukatu. Monse mo kyakonsha kwikela, ofweshi wa musampi ubula Jibumba Jitangijila pa mambo abino bintu. Umvwe bukwasho bukwabo bubena kukebewa, Jibumba Jitangijila jakonsha kubula misampi iji pepi kuba’mba ikwashañane nangwa bupe bukwabo bwakonsha kutumwa kufuma konka kwine ku ofweshi mukatampe.—2 Ko. 8:14, 15.

Onkao mambo, bupe bonse bupanwa ku mwingilo wa ntanda yonse, bwa kutungila bishimikwa mu byalo bikwabo, nangwa bupanwa umvwe kwapona bya malwa, bwafwainwa kutumwa ku ofweshi wa musampi wa mu kyalo kyonka kyo mwikalamo, kupichila mu kipwilo nangwa kwibutumatu konka ku musampi. Mu jino jishinda, ‘kalume wa kishinka ne wa maana,’ kupichila mu lunengezho lwa jibumba janengezhiwa na Jibumba Jitangijila, uta muchima kukajilwa kwa bwanabwankazhi bwetu bwa ntanda yonse mu mushingi ne mo byalondakena.—Mat. 24:45-47; 1 Ko. 14:33, 40.