Bantu Bonse Bakeba Kwikala Bulongo Kulutwe
Nanchi mukeba kukekala byepi kulutwe? Kwambatu kishinka mukeba kwikala bulongo pamo ne kisemi kyenu. Mukeba kwikala na lusekelo, kubula kukolwa, kwikala mutende ne kwikala na bintu byavula.
Nangwa byonkabyo, bantu bavula bazhinauka bwikalo bwawama bwa kulutwe. Kyalengela ke na mambo a bintu byatama bibena kumweka mu ntanda nabiji mwalo wa kolona walengela bwikalo kukatazha ne buyanji. Kabiji uno mwalo waipaya bantu bavula bingi. Abino bintu byatama byalengela bavula kulanguluka’mba kechi kyakonsheka kwikala bulongo kulutwe ne.
Nangwa kya kuba bantu bavula bazhinauka, bino batwajijila na kukebakeba mashinda afwainwa kwibakwasha kwikala bulongo kulutwe. Bantu bamo baketekela mu bintu bibula kumweka nabiji bashayuka batubangabanga nangwa bamba bikamweka kulutwe. Bakwabo balanguluka’mba kufunda ne kwikala na mali avula kwafwainwa kwibalengela kukekala bulongo kulutwe. Kabiji bakwabo balanguluka’mba kwikala na byubilo byawama ko kwafwainwa kulengela muntu kukekala bulongo kulutwe.
Nanchi bino bishinka byo byafwainwa kwitulengela kukekala bulongo kulutwe nyi? Pa kuba’mba tutaane mukumbu, twafwainwa kukumbula ano mepuzho:
Ñanyi bintu byafwainwa kwitulengela kukekala bulongo kulutwe?
Nanchi Kufunda kufika palepa ne mali byo byafwainwa kwitulengela kukekala bulongo kulutwe nyi?
Nanchi kwikala na byubilo byawama ko kwafwainwa kwituulengela kukekala bulongo kulutwe nyi?
Kwepi ko mwafwainwa kutaana bishinka byafwainwa kwimukwasha kuyuka bwikalo bwawama bwa kulutwe?
Kino Kyamba kya Usopa kyafwainwa kwimukwasha kuyuka mikumbu ya ano mepuzho.