Ñanyi Bintu Byafwainwa Kwimulengela Kukekala Bulongo Kulutwe?
Bantu bavula baitabila’mba kuji bintu bimo bibula kumweka byafwainwa kwibalengela kukekala bulongo kulutwe. Kuketekela mu bino bintu kwibalengela kuba bintu byo balanguluka’mba byafwainwa kwibalengela kukekala bulongo kulutwe.
BINTU BYAITABILAMO BANTU BAVULA
BASHAYUKA BATUBANGABANGA: Bantu bamo baitabila’mba bwikalo bwa mwana wasemwa bebuyukila ku tubangabanga. Bano bantu baya ku bashayuka batubangabanga na kupongesha, pa kuba’mba bayuke bintu bikebamwekela kulutwe ne byo bakonsha kwizhikijila.
KUYA KU BAÑANGA: Bakwabo baitabila’mba pa kuba’mba muntu ekale na bunonshi bwavula wafwainwa kuya ku bañanga kuba’mba bamubuule bya kuba. Balanguluka’mba kuba bino kulengela bintu byonse byo bakeba kwenda bingi bulongo. Kabiji boba bintu kwesakana na bibabuula bañanga.
KUPOPWELA BASHAKULU: Bantu bamo baitabila kuba’mba bafwainwa kusangajika balongo babo bafwa nangwa kupopwela bankishi pa kuba’mba bebazhikijile ne kwibapesha. Ba Vana bekala ku Vietnam baambile’mba: “Naitabijile’mba inge saka nnemeka bashakulu bami bafwile kala, amiwa pamo na baana bami tukekalanga bulongo luno ne kulutwe.”
KUSEMEKELWA MU KINTU KIKWABO: Bantu bavula baitabila kuba’mba inge muntu wafwa usemekelwa jikwabo mu kintu kingi. Baitabila ne kuba’mba bintu bipitamo muntu nangwa byawama nangwa byatama kikala bino na mambo a bintu byo aubile saka akiji mumi.
Bantu bavula baswa’mba abino bintu ke bingelekezhatu. Nangwa kya kuba bantu kechi baketekela mu bino bintu ne, batemwa bingi kuya ku bañanga na kupongesha. Balanguluka’mba inge bauba bino, kimye kimo bakonsha kuyuka bwikalo bwabo bwa kulutwe.
NANCHI BINO BINTU BIKWASHA BANTU NYI?
Nanchi bantu baitabila mu bino bintu bekala bulongo kabiji bayuka bikekala bwikalo bwabo bwa kulutwe nyi?
Umvwai byaubile ba Hào bekala mu kyalo kya Vietnam. Bakebanga bingi bukwasho ku bashayuka batubangabanga, ku bañanga ne kupopwela bashakulu kuba’mba bebatangijilenga mu bwikalo bwabo. Nanchi kuba bino kwibakwashishe nyi? Ba Hào baamba’mba: “Busulu bwami bwaonaikile, najinga na nkongole bingi, twatobokanga bingi mu kisemi kabiji bijikila byamvujile bingi.”
Ba Qiuming bekala ku Taiwan nabo baketekejile bingi mu bashayuka batubangabanga, kusemekelwa mu kintu kikwabo, kupongesha ne kupopwela bashakulu. Byo balangulukilepo bingi pa ino mitwe, baambile’mba: “Nataaine kuba’mba bino bintu byo bafunjisha ne bisho byabo kechi byakwatankana ne. Nemwenejile kuba’mba byamba bashayuka batubangabanga kechi bya kine ne. Inge kya kuba muntu wakankalwa kuvuluka bintu byo aubile kala saka akiji mumi, pano wakonsha kwikala byepi na bwikalo bwawama inge wasemekelwa mu kintu kikwabo?”
“Nataaine kuba’mba bino bintu byo bafunjisha ne bisho byabo kechi byakwatankana ne.”—BA QIUMING, TAIWAN
Ba Hào, ba Qiuming ne bantu bakwabo bavula aluno bayuka’mba bashayuka batubangabanga, bashakulu bafwa nangwa kusemekelwa mu kintu kikwabo kechi bo bafwainwa kwitubuula bikekala bwikalo bwetu bwa kulutwe ne. Nanchi kino kibena kulumbulula’mba kafwako kintu kyo twafwainwa kuba pa kuba’mba tukekale bulongo kulutwe nyi?
Bantu bavula balanguluka’mba pa kuba’mba bakekale bulongo kulutwe bafwainwa kufunda kufika palepa ne kwikala na bunonshi. Ñanyi bintu bimwekela bantu bafuukulapo kuba bino?
a Mu kino kibaaba ne kibaaba kyalondelapo, mazhina amo apimpulwa.
b Mwakonsha kutaana bino byambo mu Baibolo pa Ngalatiya 6:7. Abino byambo byayilamo bingi na byamba bantu bavula kuba’mba: “Inge wabyala inamunwa ukanowa inamunwa kabiji inge wabyala nkunde ukanowa nkunde yonka yo wabyajile.”