Mwafwainwa Kusalapo Byo Mukeba Kukekala Kulutwe

Myaka 3,500 yapitapo, Yehoba Lesa wabuujile bantu bamwingijilenga bintu byo bafwainwe kuba pa kuba’mba bakekale bulongo kulutwe. Wibabuujile’mba: “Nabika bumi ne lufu kwi anweba, mapesho ne mafingo; musale bumi pa kuba’mba mukekale na bumi anweba ne baana benu.”—Mpitulukilo ya mu Mizhilo 30:19.

Pa kuba’mba bantu bekale bulongo, bafwainwe kusalapo kuba bintu byawama. Ne atweba lelo jino tuji na luusa lwa kwisajilapo. Baibolo walumbulula byafwainwa kuba muntu pa kuba’mba akekale bulongo kulutwe. Baibolo waamba’mba: “Kupichila mu kutemwa Yehoba Lesa wenu [ne] kumvwina jiwi janji.”—Mpitulukilo ya mu Mizhilo 30:20.

TWAFWAINWA KUTEMWA BYEPI YEHOBA NE KUMVWINA JIWI JANJI?

FUNDAI BYAAMBA BAIBOLO: Pa kuba’mba mutemwe Yehoba, patanshi mwafwainwa kufunda pe aye mu Baibolo. Inge mwauba bino, po po mukayuka’mba ye Lesa wa butemwe ukeba’mba anweba mwikale bulongo. Ubena kwimubuula kulombanga kwi aye “mambo wimuta muchima.” (1 Petelo 5:7) Baibolo walaya’mba inge mwibikako kufwenya kwipi ne aye, “ne aye ukafwenya kwipi ne anweba.”—Yakoba 4:8.

INGIJISHAINGA BINTU BYO MUBENA KUFUNDA MU BWIKALO BWENU: Kumvwina byaamba Lesa kulumbulula kulondela mikambizho yanji yawama iji mu Baibolo. Inge mwauba bino, ‘jishinda [jenu] jikawama kabiji mukobanga bintu na maana.’—Yoshua 1:8.