Twakonsha Kushinda Lupato

Inge kechi bakimushakwapo ne, kampe mwakimonapo kala muntu ye bashikwa. Javula tumvwa masawakya aamba pa bantu bo bashikwa na mambo a ku kyalo ko bafuma, kikoba nangwa na mambo a kuba’mba basongola nangwa kusongolwa ku banabalume bakwabo nangwa banabakazhi bakwabo. Na mambo a kino, makafulumende avula abikako mizhilo ya kukambula bantu baji na muteeto wa kushikwa bakwabo.

Bantu bo bashikwa nabo bashikwa bakwabo. Bantu bo bashikwa javula bashinkanya, kabiji kino kilengela lupato kubula kupwa.

Kampe bakimubapo kala nshiji, kwimulengulula, kwimwendeleka, kwimutuka nangwa kwimuchinyisha. Pano bino, lupato kechi lupelelatu pa bino byonka ne. Javula lupato lulengela bantu kuleta kiwowo, konauna bipe, kukozhañana, kulaala na bantu kya kwibakajikizha, kwipayañana nangwa kukeba kuzhiya mukoka wa bantu bakwabo.

Kino Kyamba kya Usopa kisakukumbula mepuzho alondelapo ne kumwesha byo twakonsha kushinda lupato:

• Mambo ka lupato o lwavujila?

• Lupato lwakonsha kupwa byepi?

• Nanchi kujipo kimye lupato kyo lukabulako nyi?