BYA KUPWISHA LUPATO

2 | Kange Mushinkanyenga Ne

Lufunjisho lwa mu Baibolo:

“Kange mushinkanyenga kibi na kibi ku muntu nangwa umo ne. . . . Umvwe kyakonsheka, monka mwayila bulume bwenu, ikalainga mu mutende na bantu bonse. Anweba batemwe, kange mushinkanyenga ne, . . . mambo kyanembwa’mba: ‘“Kushinkanya ko kwami; amiwa nkashinkanya nabo,” byo byaamba Yehoba.’”—LOMA 12:17-19.

Byo Kilumbulula:

Nangwa kya kuba kijitu bulongo kuzhingila inge betulubankanya, bino Lesa kechi ukeba’mba tushinkanyenga ne. Witutundaika’mba twafwainwa kutekanya, mambo walaya’mba katatakatu akafumyepo bubi bonse.—Salamo 37:7, 10.

Byo Mwakonsha Kuba:

Bantu bambulwa kulumbuluka inge bashinkanya balengela lupato kubula kupwa. Onkao mambo, inge bemuzhingijisha nangwa kwimuba kyatama, kange mushinkanye ne. Ibikaiko kwikanya ne kukumbula mu mutende. Bimye bimo, kyakonsha kuwama kulubakotu. (Byambo bya Maana 19:11) Pano bino, bimye bimo mwakonsha kubuulako bantu bamo. Inge kya kuba bemulenga mambo akatampe mwakonsha kuya na kuloba ku bakapokola, nangwa ku bantu bakwabo baji na luusa.

Kafwako byawama bifuma mu kushinkanya ne

Mwakonsha kuba byepi inge kya kuba mwakankalwa kupwisha lukatazho mu mutende? Nangwa mwaingila papelela bulume bwenu kupwisha lolo lukatazho mu mutende pano mwakankalwa, mwafwainwa kuba byepi? Kange mushinkanye ne. Mambo kushinkanya kwakonsha kulengelatu lukatazho kubayilako. Inge mwabula kushinkanya, mukalengela lupato kupwa. Mwakonsha kufunda kuketekela mu jishinda Lesa jo engijisha kupwishishamo lukatazho. “Ketekela mwi aye, ne aye ukakukwasha.”—Salamo 37:3-5.

Jishimikila ja Bwikalo—BA ADRIÁN

Bashinjile Kyubilo kya Kushinkanya

Ba Adrián byo bajinga banyike, batemenwe bingi bukapondo, kabiji bajinga na lupato ne kukeba kushinkanya. Bashimikizhe’mba: “Javula twalwanga na mata, kabiji bimye bimo bankozhanga ne bizabila bya mashi ne kunsha napungila mu mukwakwa.”

Ba Adrián batendekele kufunda Baibolo byo bajinga na myaka 16. Banungilepo’mba: “Byo natwajijile kufunda Baibolo,natendekele kumona kuba’mba nafwainwe kupimpula byubilo byami.” Bafwainwe kuleka lupato ne bukapondo. Bamwenejilemo mu byo bafunjile pa kinembelo kya Loma 12:17-19 kyaamba pa kubula kushinkanya. Baambile’mba: “Kino kishinka kyandengejile kuyuka’mba Yehoba ukapwisha nshiji yonse mu kimye kyanji ne mu jishinda janji. Pachepache, natendekele kuleka byubilo byami bya bukapondo.”

Juba jimo mabanga, ba Adrián bebalukukile ku jibumba ja bakapondo jo balwanga najo kala. Mukulumpe wa jino jibumba wabijikile’mba: “Ipokolole obe mwine.” Ba Adrián baambile’mba: “Nakebelenga kulwa nabo.” Bino mu kifulo kya kushinkanya, balombele lulombelo lwipi kwi Yehoba ne kunyema.

Ba Adrián batwajijile kwamba’mba: “Juba jalondejilepo, nasambakene mukulumpe wa jino jibumba saka ajitu bunke. Kyaishiletu mu milanguluko ke kushinkanya, bino bukiji bukiji nalombele kwi Yehoba amba ampe bulume bwa kwikanya kuba byatama. Nakuminye bingi kumona uno nsongwalume byo aishile kwi amiwa ne kwamba’mba: ‘Ndekeleko mambo pa byo naubile kesha bufuku. Kishinka ke kya kuba’mba nkeba kwikala na byubilo byo ujipo nabyo. Nkeba kufunda Baibolo.’ Namusanchila Yehoba pa kunkwasha kufwomona bukaji bwami. Mambo kyo kyalengejile’mba ntendeke kumufunjisha Baibolo uno nsongwalume.”