Mepuzho Afuma Ku Batanga

Yesu walumbulwilenga ka byo aambile’mba: “Kange mulanguluke’mba naishile kuleta mutende” ne?

Yesu wafunjishenga bantu kwikala mu mutende na bakwabo. Nangwa byonkabyo, pa kimye kimo Yesu wabuujile batumwa banji amba: “Kange mulanguluke’mba naishile kuleta mutende pano pa ntanda ne; pakuba naishile kuleta mpoko kechi mutende ne. Naishile kwabanya muntu na shanji kabiji mwana wa mukazhi na inanji, mulokazhi naye na muko wanji wa mukazhi.” (Mat. 10:34, 35) Yesu walumbulwilenga ka byo aambile bino byambo?

Yesu kechi wakebelenga kwabanya bisemi ne, nangwa byonkabyo wayukile kuba’mba bintu byo afunjishenga bikaleta mabano mu bisemi. Onkao mambo, aba bonse bakeba kwikala baana ba bwanga ba kwa Kilishitu ne kubatizhiwa bafwainwa kuyuka kuba’mba bakebashikwa ku ba mu kisemi kyabo na mambo a byo bafuukulapo. Kimye kimo benakwabo babula kwitabila nangwa ba mu kisemi bakonsha kwibakanya kabiji kino kyakonsha kwibalengela kubula kutwajijila kwikala bakishinka kwi Kilishitu.

Baibolo utundaika bena Kilishitu kwikala “bamutende na bantu bonse.” (Loma 12:18) Nangwa byonkabyo, bintu byafunjishe Yesu byakonsha kwikala nobe “mpoko” mu bisemi bimo. Kino kyakonsha kumweka inge wa mu kisemi umo waswa byafunjishe Yesu, pano bino, bakwabo bakana byo afunjishe. Inge kyaikala bino, ba mu kisemi bakana bekala ke “balwanyi” ba yewa ubena kufunda bukine.—Mat. 10:36.

Baana ba bwanga ba kwa Yesu bekala mu bisemi byaabenamo mu bupopweshi bakonsha kusalapo kutokesha Yehoba ne Yesu ku muchima nangwa kusalapo kutokesha ku muchima ba mu kisemi kyabo. Nabiji balongo babo babuula kwitabila bakonsha kwibakanjikizha kusekelela moba a kukokoloka a bupopweshi. Inge kyaikala bino, ñanyi ye mwafwainwa kukookela? Yesu waambile’mba: “Yense watemwa bashanji nangwa bainanji kukila byo antemwa amiwa kechi wafwainwa kwikala mwanami wa bwanga ne.” (Mat. 10:37) Yesu kechi walumbulwilenga’mba baana banji ba bwanga babena kufunda bukine bafwainwa kuleka kutemwa bansemi babo ne. Bino Yesu wibafunjishenga kuba’mba bafwainwa kufuukulapo bintu byanema mu bwikalo bwabo. Umvwe ba mu kisemi babula kwitabila ke betukanye kupopwela Yehoba, twafwainwa kutwajijila kwibatemwa. Nangwa byonkabyo, kutemwa Lesa kyo kintu kyafwainwa kwikala kitanshi.

Kwa kubula nangwa kuzhinaukatu ne, kwitukanya ku ba mu kisemi kwakonsha kwituletela bingi bulanda. Pano bino, baana ba bwanga ba kwa Yesu bafwainwa kuvulukanga byambo byanji bya kuba’mba: “Yense ubula kuswa kusenda kichi kyanji kya lumanamo ne kubula kundondela, kechi wafwainwa kwikala mwanami wa bwanga ne.” (Mat. 10:38) Bino byambo bibena kulumbulula’mba bena Kilishitu bamona kwibamanyika ku ba mu kisemi kyabo kuba’mba ke bya kumanama baana ba bwanga ba kwa Kilishitu byo bachinchika. Baketekela kuba’mba na mambo a byubilo byabo byawama, balongo babo babula kwitabila bakonsha kupimpula ndangulukilo yabo ne kuswa kufunda bukine.—1 Pe. 3:1, 2.