Itemwainga Anwe Bene na Bene

1-2. (a) Mambo ka Paulo o aambijile’mba butemwe kyo kyubilo kyakila byubilo bikwabo? (b) Ñanyi mepuzho o tusakwisambapo?

MUTUMWA Paulo byo aambilenga pa lwitabilo, luketekelo ne butemwe, waambile’mba: “Kyakila pa bino byonse [byubilo] ke butemwe.” (1 Ko. 13:13) Mambo ka Paulo o aambijile bino? Kulutwe tukaleka kwikala na lwitabilo mu milaye ya Lesa yaamba pa ntanda ipya mambo pa kyokya kimye bino byonse byo twaketekelamo saka byaubiwa kala. Bino kechi tukaleka kutemwa Yehoba ne bantu ne. Kabiji buno butemwe bukayangatu na kubayilako myaka ne myaka.

² Na mambo a kuba’mba butemwe kechi bukapwa ne, tusakwisamba pa ano mepuzho asatu: Butanshi, mambo ka o twafwainwa kwitemwa atwe bene na bene? Tumwesha byepi amba twatemwa bakwetu? Bwa busatu, twakonsha kutwajijila byepi kwitemwa atwe bene na bene?

MAMBO KA O TWAFWAINWA KWITEMWA ATWE BENE NA BENE?

3. Ñanyi bintu byafwainwa kwitulengela kwitemwa atwe bene na bene?

³ Mambo ka o kyanemena kwitemwa atwe bene na bene? Kwitemwa atwe bene na bene kwitulengela kuyukanyikwa’mba twi bena Kilishitu ba kine. Yesu waambijile batumwa banji amba: “Kino kyo kyo bakayukilako bonse amba mwi baana bami ba bwanga, umvwe mwitemwa anwe bene na bene.” (Yoa. 13:35) Kabiji kwitemwa atwe bene na bene kwitulengela kukwatankana. Paulo waambile’mba buno butemwe “bukwatankanya bantu bulongo.” (Kolo. 3:14) Kuji kishinka kikwabo kyanema bingi kyafwainwa kwitulengela kwitemwa atwe bene na bene. Mutumwa Yoano wanembejile bakwabo ba mu lwitabilo amba: “Yense watemwa Lesa wafwainwa ne kutemwa mulongo wanji.” (1 Yoa. 4:21) Umvwe twitemwa atwe bene na bene tumwesha’mba twatemwa Lesa.

4-5. Lumbululai kutemwa Lesa byo kwakwatankana na kwitemwa atwe bene na bene.

⁴ Kutemwa Lesa kwakwatankana byepi na butemwe bo tumwesha balongo ne banyenga? Umvwe dokotala wimupima pa mukoko pa kuba’mba amone bibena kwenda mashi inge abena kwenda lubilo nangwa ne, umona ne muchima inge ujitu bulongo. Ñanyi bintu byo tubena kufunjilako ku kino?

⁵ Byonkatu dokotala byo apima mashi mu mubiji wetu pa kuba’mba ayuke inge muchima ujitu bulongo, ne atweba twakonsha kuyuka’mba twatemwa Lesa inge twatwajijila kutemwa bakwetu. Inge twamona’mba kechi twatemwa balongo ne banyenga byonka bo twibatemenwe kala ne, kino kimwesha’mba twaleka kutemwa Lesa byonka byo twamutemenwe kala. Bino inge twatwajijila kutemwa balongo ne banyenga, po po tukayuka’mba twatwajijila kutemwa Lesa.

6. Mambo ka o kyanemena kuyuka inge twaleka kutemwa balongo ne banyenga? (1 Yoano 4:7-9, 11)

⁶ Inge twaleka kutemwa balongo ne banyenga byonka byo twibatemenwe kala, twafwainwa kuyuka’mba luno ke lukatazho lukatampe bingi. Mambo ka? Mambo bulunda bwetu ne Yehoba buji mu kizumba. Mutumwa Yoano waamba pa kino kishinka amba: “Awa wabula kutemwa mulongo wanji ye amona na meso, kechi wakonsha kutemwa Lesa ye abula kumona ne.” (1 Yoa. 4:20) Ñanyi kintu kyo tubena kufunjilako ku kino? Tukatookeshatu Yehoba ku muchima inge ‘ketwitemwe atwe bene na bene.’—Tangai 1 Yoano 4:7-9, 11.

TUMWESHA BYEPI AMBA TWATEMWA BAKWETU?

7-8. Ñanyi mashinda amo o twakonsha kumwesheshamo amba twitemwa atwe bene na bene?

⁷ Mambo a Lesa aambapo javula pa “kwitemwa atwe bene na bene.” (Yoa. 15:12, 17; Loma 13:8; 1 Tesa. 4:9; 1 Pe. 1:22; 1 Yoa. 4:11) Kafwako muntu nangwa umo wakonsha kwibumona butemwe ne, mambo muntu mwine ye umvwa inge uji na butemwe nangwa ne. Onkao mambo, bakwetu bakonsha kuyuka byepi amba twibatemwa? Byo twamba ne byo tuba byo bikamwesha’mba twibatemwa.

⁸ Twakonsha kumwesha butemwe balongo ne banyenga mu mashinda avula bingi. Bino byo bintu bimo byo twakonsha kuba: “Saka mwamba bya kine mu lwenu.” (Zeka. 8:16) “Kwikala mu mutende anwe bene na bene.” (Mako 9:50) “Ikalainga batanshi kunemeka bakwenu.” (Loma 12:10) “Itambwilainga anwe bene na bene.” (Loma 15:7) ‘Ilekelaingako mambo anwe bene na bene.’ (Kolo. 3:13) “Isendelaingako anwe bene na bene bintu bimunemena.” (Nga. 6:2) “Itekeneshainga anwe bene na bene.” (1 Tesa. 4:18) “Ikomeshainga anwe bene na bene.” (1 Tesa. 5:11) “Kwilombelako anwe bene na bene.”​—Yako. 5:16.

9. Mambo ka kutekenesha bakwetu o kumweshesha’mba twibatemwa? (Monai kipikichala.)

⁹ Twayai twisambe pa jishinda jimo jo tumwesheshamo’mba twatemwa bakwetu. Paulo waambile’mba: “Itekeneshainga anwe bene na bene.” Mambo ka kutekenesha bakwetu o kwaikela jishinda jimo janema bingi jimwesha’mba twibatemwa? Kwesakana na buku umo waamba pa Baibolo, kyambo kya “kutekenesha” kyaingijishe Paulo kilumbulula “kwikala na muntu kipikipi saka ubena kumutekenesha inge ubena kupita mu lukatazho.” Onkao mambo, inge twatekenesha muntu ubena kupita mu lukatazho, tukamukwasha kutwajijila kwingijila Yehoba mu bukishinka. Kimye kyonse kyo twatekenesha mulongo nangwa nyenga, tumwesha’mba twamutemwa.​—2 Ko. 7:6, 7, 13.

10. Kumwesha kifyele kwakwatankana byepi na kwitekenesha?

¹⁰ Kumvwina muntu lusa ne kumutekenesha byendela pamo. Mu ñanyi jishinda? Muntu waumvwina mukwabo lusa ubena kupita mu lukatazho umutekenesha ne kumukwasha. Onkao mambo, tutendekelapo kumvwina muntu lusa apa bino twamutekenesha. Paulo walumbulula’mba Yehoba umvwina bantu lusa kabiji kino kimulengela kwibatekenesha. Paulo walumbulula Yehoba amba ye “Shanji bya lusa kabiji Lesa wa lutekenesho lonse.” (2 Ko. 1:3) Apano Paulo waingijisha byambo bya kuba’mba “bya lusa” kulumbulula muntu ubila bakwabo kifyele. Onkao mambo, Lesa bamutela’mba “Shanji nangwa Nsulo ya bya lusa mambo ubila bingi bantu kifyele” kabiji kino kifyele kimulengela kwitutekenesha mu “meseko etu onse.” (2 Ko. 1:4) Byonkatu mema awama abena kukonkoloka mu kakola byo apwisha kilaka, Yehoba naye utekenesha bonse baji na bijikila. Twakonsha kubila byepi bakwetu kifyele ne kwibatekenesha byonka byuba Yehoba? Jishinda jimo jo twakonsha kubilamo bino kekwikala na byubilo byawama biketulengelanga kumvwina bakwetu lusa ne kwibatekenesha. Ñanyi bino byubilo bimo byo twafwainwa kwikala nabyo?

11. Kwesakana na Kolose 3:12 ne 1 Petelo 3:8, ñanyi byubilo bikwabo byakonsha kwitulengela kutemwa ne kutekenesha bakwetu?

¹¹ Ñanyi byubilo biketukwasha kutwajijila kutemwa bakwetu ne “kwitekenesha atwe bene na bene” moba onse? Twafwainwa kwikala na bino byubilo nabiji kwiubila lusa, kutemwa balongo ne kwiubila kifyele. (Tangai Kolose 3:12; 1 Petelo 3:8.) Bino byubilo byakonsha kwitukwasha byepi? Inge ketubile lusa balongo ne banyenga ne kwibata muchima, kino kiketulengelanga kwibatekenesha inge kebapite mu bya malwa. Yesu waambile’mba: “Kanwa kamba monka mwavujila biji mu muchima. Muntu wawama wamba bintu byawama byonka biji mu muchima wanji.” (Mat. 12:34, 35) Kutekenesha balongo ne banyenga babena kupita mu makatazho ke jishinda janema bingi jimwesha’mba twibatemwa.

TWAKONSHA KUTWAJIJILA BYEPI KWITEMWA ATWE BENE NA BENE?

12. (a) Mambo ka o twafwainwa kujimukila kuchiina’mba twakaleka kutemwa balongo ne banyenga? (b) Ñanyi bwipuzho bo tusakwisambapo?

¹² Atweba bonse twafwainwa kutwajijila ‘kwitemwa atwe bene na bene.’ (1 Yoa. 4:7) Nangwa byonkabyo, twafwainwa kuvulukanga’mba Yesu witujimwineko’mba “butemwe bwa bavula bukakepa.” (Mat. 24:12) Yesu kechi walumbulwilenga’mba baana banji ba bwanga bavula bakaleka kwitemwa bene na bene ne. Nangwa byonkabyo, twafwainwa kujimuka kuchiina’mba twakekala na byubilo bya bantu ba mu ino ntanda byakonsha kwitulengela kuleka kwitemwa atwe bene na bene. Pano twayai twisambe pa bwipuzho bwanema bingi bwa kuba’mba: Ñanyi kintu kiketukwasha kuyuka inge twatwajijila kutemwa balongo ne banyenga?

13. Ñanyi kintu kyafwainwa kwitukwasha kuyuka inge twatwajijila kutemwa balongo ne banyenga?

¹³ Jishinda jimo jafwainwa kwitukwasha kuyuka inge twatemwa bakwetu ke byo tuba inge kwamweka bintu bimo mu bwikalo bwetu. (2 Ko. 8:8) Mutumwa Petelo waambapo kintu kimo kya uno mutundu. Waamba’mba: “Kyakila pa byonse, itemwishai anwe bene na bene, mambo butemwe buvweta pa mambo avula.” (1 Pe. 4:8) Onkao mambo, byo tuba inge bakwetu betuzhingijisha nangwa betukozha ku muchima byo bikamwesha inge twibatemwa.

14. Kwesakana na 1 Petelo 4:8, ñanyi butemwe bo twafwainwa kwikala nabo? Lumbululai.

¹⁴ Twayai twisambe pa bino byambo byaambile Petelo. Byambo bitanshi biji mu kyepelo 8 byalumbulula butemwe bo twafwainwa kwikala nabo ko kuba’mba “kwitemwisha.” Kyambo kyaingijisha Petelo kilumbulula kutandubula. Byambo byalondelapo mu kino kyepelo byalumbulula byo twakonsha kuba inge twatemwisha bakwetu. Kutemwisha bakwetu kwitulengela kuvweta pa mambo a balongo ne banyenga yetu. Fwanyikizhai kuba’mba pa tebulu wenu paji byasombela. Kyapeela kutola kisapi ne kwikitandubwila pa tebulu pa kuba’mba kivwete ponse pasombela. Po pamotu, inge twatemwisha balongo ne banyenga yetu, twakonsha kuvweta nangwa’mba kwibalekelako mambo onse o betulenga.

15. Inge twatwajijila kutemwa balongo ne banyenga, kino kiketulengela kuba ka? (Kolose 3:13)

¹⁵ Kutemwa bakwetu kwafwainwa kwitulengelanga kulekelako mambo bakwetu bena Kilishitu bambulwa kulumbuluka nangwatu inge kyakatazha kuba bino. (Tangai Kolose 3:15.) Inge ketulekeleko bakwetu mambo, tumwesha’mba twibatemwa bingi kabiji kino kitookesha bingi Yehoba ku muchima. Ñanyi kintu kikwabo kyakonsha kwitukwasha kubula kuzhingilanga bukiji ne kulekelangako bakwetu mambo?

16-17. Ñanyi kintu kikwabo kiketukwasha kulubako ku bintu byatama bituba bakwetu? Lumbululai. (Monai kipikichala.)

¹⁶ Tainga muchima pa byubilo byawama biji na balongo ne banyenga, kechi pa bintu byo balubankanya ne. Akilangulukai pa kino. Fwanyikizhai kuba’mba muji na kijiilo na balongo ne banyenga. Mubena kusangalela pamo kabiji byo mwapwisha kino kijiilo, mwakopa kipikichala kya jibumba jonse. Byo mwapwisha kukopa, mwavuluka kukopa jikwabo bipikichala bibiji kuchiina’mba kampe kitanshi kyatama. Pano muji na bipikichala bisatu. Pa kwibitala mwataana kuba’mba pa kipikichala kimo paji mulongo umo wabula kumwemwesela. Mukoba byepi na kyokyo kipikichala? Mwakonsha kwikifumyamo mambo muji na bipikichala bikwabo bibiji paji balongo ne banyenga bonse babena kumwemwesela kuvwangakotu ne mulongo waji kubula kumwemwesela pa kyokya kikwabo.

¹⁷ Twayai twesakanye bipikichala ku bintu byo tubula kulubamo. Javula tuvuluka bintu byawama byo tuba inge tubena kusangalela pamo na balongo ne banyenga pa bijiilo. Pano twambe’mba pa bino bijiilo, mulongo nangwa nyenga witwambilapo bintu bimo byatama. Twafwainwa kuba byepi na bino byambo byatama byo etwambila? Twafwainwa kwibilubakotu byonka byo tufumyapo kipikichala kyatama kyo twakopa. (Maana 19:11; Efi. 4:32) Twakonsha kulubako bintu byatama bituba bakwetu bena Kilishitu mambo tuvuluka bintu byawama byavula byo twaubijilenga pamo nabo pa bino bijiilo. Bino byo bintu byawama byo twafwainwa kulangulukangapo ne kwibilama mu michima yetu.

ENE MAMBO KUTEMWA BALONGO NE BANYENGA O KWANEMENA LELO JINO

18. Ñanyi bishinka byaamba pa butemwe byo twisambapo mu uno mutwe?

¹⁸ Mambo ka o twafwainwa kwitemwa bingi atwe bene na bene? Byonka byo twafunda, inge ketutemwe balongo ne banyenga tumwesha’mba twatemwa Yehoba. Mu ñanyi mashinda mo tumweshesha’mba twatemwa bena Kilishitu bakwetu? Jishinda jimo jo tubilamo bino kekwibatekenesha. Kwikala na kifyele kuketulengelanga “kwitekenesha atwe bene na bene.” Twakonsha kutwajijila byepi kwitemwa atwe bene na bene? Twakonsha kuba bino inge ke tulekeleko bakwetu mambo nangwatu inge kyakatazha kuba bino.

19. Mambo ka o kyanemena kikatakata lelo jino kwitemwa bingi atwe bene na bene?

¹⁹ Mambo ka o kyanemena kikatakata lelo jino kwitemwa atwe bene na bene? Petelo waamba’mba: “Mpelo ya bintu byonse yafwenya kala pepi. Onkao mambo, . . . itemwishai anwe bene na bene.” (1 Pe. 4:7, 8) Mpelo ya buno bwikalo bwatama byo yafwenya kala pepi, ñanyi bintu byakonsha kwitumwekela? Yesu byo aambilenga pa baana banji ba bwanga, waambijile jimo amba: “Bakemushikwa ku bisaka byonse bya bantu na mambo a jizhina jami.” (Mat. 24:9) Pa kuba’mba tutwajijile kwikala ba kishinka kwi Yehoba nangwa kya kuba betushikwa, twafwainwa kukwatankana. Inge twauba bino, Satana kechi uketwabanya ne, mambo butemwe “bukwatankanya bantu bulongo.”​—Kolo. 3:14; Fili. 2:1, 2.