Bañanyi Bafwainwa Kwitufuukwilako Kyawama ne Kyatama?

Mwakonsha kuba byepi inge mukeba kuya ku mpunzha ko mwabula kuyuka?

1. 1. Kuya mu jishinda jo mwalanguluka amba ijo.

2. 2. Kulondela bakwenu ne kulanguluka’mba kampe bayuka ko mubena kuya.

3. 3. Kwingijisha kiñambañamba kitelwa’mba GPS, mapu nangwa kushikisha mukwenu wayukako.

Inge twasala jishinda 1 ne 2, kechi twakonsha kufika ko tubena kukeba kuya ne. Inge twasala jishinda ja busatu, twakonsha kufika ko tubena kuya.

Bwikalo bwetu twakonsha kwibwesakanya ku lwendo lo twaketekela’mba mukafuma lusekelo kulutwe. Kufika ko tubena kuya nangwa kubula kufika kwaimena pa ko tufumya maana pa kuba’mba tufuukule bya kuba.

Bintu byavula byo tufuukulapo byakonsha kulengela bwikalo bwetu kuwama nangwa ne. Bintu bimo byo tufuukulapo bicheche pakuba bikwabo bikatampe kabiji byanema bingi. Byo tuba pa kufuukula pa bintu bikatampe bimwesha byo tumona kyawama ne kyatama. Inge twafuukulapo bulongo mu bino bintu, tumwenamo byawama ne batemwe betu pamo kabiji inge twabuula kufuukula bulongo bintu kechi byakonsha kwituwamina ne. Bintu bikatampe byo tufuukulapo ke bintu nabiji:

• Kwilaala ne masongola

• Bukishinka, nkito ne mali

• Bya kukomesha baana

• Bya kwikala bulongo na bakwetu

Mwakonsha kuyuka byepi’mba byo mufuukulapo mu bino bintu bikalengela anweba ne kisemi kyenu kwikala na lusekelo kulutwe?

Atweba bonse twafwainwa kwiipuzha’mba: Ñanyi kintu kyafwainwa kunkwasha kufuukula bulongo pa kyawama ne kyatama?

Uno magazini usakulumbulula ene mambo o twafwainwa kuketekela byaamba Baibolo pa kyawama ne kyatama ne Baibolo byo yafwainwa kwimukwasha.