Nanchi Muji na Lwitabilo Nyi?

Twafwainwa kwikala na lwitabilo pa kuba’mba tutokeshenga Yehoba ku muchima. Pano bino, Baibolo waamba’mba “kechi bantu bonse baji na lwitabilo ne.” (2 Tesa. 3:2) Mutumwa Paulo waambilenga pa bantu bamumanyikilenga amba bajinga “bantu batama kabiji babi.” Nangwa byonkabyo, bintu byo aambile pa lwitabilo byakonsha kwingila ne ku bantu bakwabo. Bantu bamo bakana bishiino bimwesha patoka kuba’mba kuji Mulenga aye Lesa. (Loma 1:20) Bakwabo nabo baitabila mu kintu nangwa mu muntu uji bingi na bulume. Nangwa byonkabyo, kwitabila mu bino bintu kechi lo luketekelo lukebewa pa kuba’mba tutokeshenga Yehoba ku muchima ne.

Twafwainwa kushiinwa kuba’mba Yehoba koaji kabiji amba ye ufweta aba baji na lwitabilo lwakosa. (Hebe. 11:6) Pa kuba’mba twikale na lwitabilo, twafwainwa kwikala na mupashi wanji wazhila. Kulomba kwi Yehoba kulengela muntu kutambwila mupashi wazhila. (Luka 11:9, 10, 13) Jishinda janema jo twakonsha kutambwilamo mupashi ke kutanga Mambo a Lesa. Kabiji twafwainwa kulanguluka langulukanga pa byo tutanga ne kwibingijisha. Mupashi wa Yehoba wakonsha kwitukwasha mu bwikalo bwetu ne kwitukwasha kwikala na lwitabilo luketulengelanga kuba bintu bitokesha Yehoba ku muchima.