Nkalata Yakonsha Kwitukwasha Kutwajijila Kuchinchika Kufika ne ku Mpelo

1-2. (a) Bintu byajinga byepi mu Yudea kimye mutumwa Paulo kyo anembejile nkalata bena Kilishitu Bahebelu? (b) Mambo ka ino nkalata o ibatundaikijile?

YESU byo afwile, bena Kilishitu Bahebelu baikalanga mu Yelusalema ne mu Yudea bapichile mu makatazho avula bingi. Aku kipwilo kilengwatu, bano bena Kilishitu batendekele kwibamanyika bingi. (Byu. 8:1) Byo papichile myaka 20, bwikalo bwa baana ba bwanga ba kwa Yesu bwakatezhe na mambo a kipowe kyajingako mu kyalo. (Byu. 11:27-30) Nangwa byonkabyo, nobe mu 61 C.E., bena Kilishitu kechi bebamanyikile byonka byo bebamanyikile kulutwe ne. Pa kyonkakya kimye, batambwijile nkalata ibanembejile mutumwa Paulo kabiji ino nkalata ibakwashishe kwinengezhezha jimo ku bintu byaishilenga kulutwe.

² Nkalata yo banembejile Bahebelu ibatundaikile bingi mambo mutende wajinga na bano bena Kilishitu kechi watwajijile ne. Paulo wibanembejile byambo bya lujimuno byakwashishe bano bena Kilishitu kwinengezhezha jimo kuchinchika lumanamo lwaishilenga kulutwe. Mpelo ya Bayudea yaambijile jimo Yesu yajinga pepi kufika. (Luka 21:20) Pano bino, Paulo nangwatu bena Kilishitu ba mu Yudea kechi bayukile kine kimye kikafikilamo luno lonaiko ne. Nangwa byonkabyo, bano bena Kilishitu baingijishe kimye kyashajileko kwikala na byubilo byawama nabiji lwitabilo ne kuchinchika.​—Hebe. 10:25; 12:1, 2.

3. Mambo ka bena Kilishitu lelo jino o bafwainwa kuteshako muchima ku nkalata yo banembejile Bahebelu?

³ Ne atweba katatakatu tukapite mu malwa akatampe kukila ne apichilemo bena Kilishitu Bahebelu. (Mat. 24:21; Lum. 16:14, 16) Onkao mambo, twayai twisambe pa lujimuno Yehoba lo ajimwineko bano bena Kilishitu ne byo twakonsha kufunjilako.

“TWAYAI TUKOMENGA”

4. Ñanyi makatazho apichilemo bena Kilishitu Bayudea? (Monai ne kipikichala.)

⁴ Bayudea baikele bena Kilishitu bafwainwe kupimpulako bintu bimo kabiji kino kyakatezhe bingi. Pa kimye kimo, Bayudea bajinga bantu Yehoba bo asajile. Yelusalema ye wajinga muzhi mwalaminanga bamfumu baimenangako Lesa, kabiji mo mwajinga nzubo ya Lesa bantu mo bapopwelanga Yehoba. Bayudea bonse ba kishinka balondelanga Mizhilo ya Mosesa ne mizhilo ikwabo yafunjishanga bantangi babo ba bupopweshi. Ano mafunjisho aambile pa kajo ko bafwainwe kuja, byo bafwainwe kumonanga kuya ku mukanda ne byo bafwainwe kumonanga bantu ba mu bisaka bikwabo. Nangwa byonkabyo, Yehoba walekele kuswa bitapisho byapananga Bayudea Yesu byo afwile. Kino kyakatezhe bingi bena Kilishitu Bayudea balondelanga Mizhilo ya Mosesa. (Hebe. 10:1, 4, 10) Nangwatu bena Kilishitu bajinga na lwitabilo lwakosa nabiji mutumwa Petelo, kibakatezhe bingi kulondela bino bintu byo bapimpwileko. (Byu. 10:9-14; Nga. 2:11-14) Na mambo a bino bintu bya katataka byo baitabijilemo, bano bena Kilishitu batendekele kwibamanyika ku bantangi ba bupopweshi ba Bayudea.

5. Ñanyi bintu bena Kilishitu byo bafwainwe kuchinuzhuka?

⁵ Bena Kilishitu Bahebelu bebamanyikilenga ku mabumba abiji a bantu. Bantangi ba bupopweshi balangulukilenga’mba bano bena Kilishitu basatukijile bupopweshi bwa Bayudea. Kabiji bantu bamo bebepekezhanga’mba bena Kilishitu bakanjikizhanga baana ba bwanga ba kwa Kilishitu kulondela Mizhilo imo ya Mosesa pa kuba’mba babulenga kwibamanyika. (Nga. 6:12) Ñanyi bintu byakonsheshe kukwasha bena Kilishitu ba kishinka kukosela ku bukine?

6. Ñanyi bintu Paulo byo atundaikile bakwabo ba mu lwitabilo kuba? (Bahebelu 5:14–6:1)

⁶ Mu nkalata Paulo yo anembejile Bahebelu, watundaikile bakwabo ba mu lwitabilo kufunda ne kulanguluka-languluka pa Mambo a Lesa. (Tangai Bahebelu 5:14–6:1.) Kwingijisha Binembelo bya Kihebelu, Paulo walumbulwijile balongo banji ene mambo jishinda bena Kilishitu jo bapopwelangamo Yehoba o jawamijile kukila japopwelangamo Bayudea.a Paulo wayukile kuba’mba inge bano balongo banji bafunda byavula pe Yehoba ne kumvwisha bukine, kino kikebalengela kuyuka ne kukaana mafunjisho a bubela.

7. Ñanyi bintu byatama byo tupitamo lelo jino?

⁷ Byonka byajinga bena Kilishitu Bahebelu, ne atweba lelo jino twikala mu ntanda muji bantu basampanya bintu byapusana na mizhilo ya Yehoba. Javula balwanyi betu bamba byatama pa bintu byo twaitabilamo byaamba pa byubilo byawama kabiji bamba’mba twakanama. Byubilo ne milanguluko ya bantu ba mu ino ntanda bibena kuya na kutaminakotu ne kupusana na mizhilo ya Yehoba. (Maana 17:15) Onkao mambo, twafwainwa kuyuka ne kukaana milanguluko yatama ya balwanyi betu yakonsha kwitulefula nangwa kwitongola.​—Hebe. 13:9.

8. Ñanyi bintu byo twafwainwa kuba pa kuba’mba tukomenengako ku mupashi?

⁸ Ne atweba twafwainwa kukomenangako ku mupashi byonka Paulo byo atundaikile bena Kilishitu kuba. Kino kyavwangamo kufunda byavula pe Yehoba ne kuyuka byo alanguluka. Mwafwainwa kutwajijila kuba bino nangwa kya kuba mwipana ne kubatizhiwa. Nangwa kya kuba twabanda mu bukine, atweba bonse twafwainwa kutanganga ne kufunda Mambo a Lesa. (Sala. 1:2) Kufunda Baibolo pa bunke kimye kyonse kukakosesha lwitabilo lwetu byonka Paulo byo atundaikile Bahebelu mu nkalata yo ebanembejile.​—Hebe. 11:1, 6.

“TWIKALE NA LWITABILO LWA KUPULUSHA BUMI BWETU”

9. Mambo ka bena Kilishitu Bahebelu o bafwainwe kwikala na lwitabilo lwakosa?

⁹ Bena Kilishitu Bahebelu bafwainwe kwikala na lwitabilo lwakosa pa kuba’mba bapuluke malwa aishilenga mu Yudea. (Hebe. 10:37-39) Yesu wajimwineko baana banji ba bwanga kuba’mba inge bamona Yelusalema bamuzhokoloka ku mazhita, bafwainwe kunyemena ku mitumba. Bena Kilishitu bonse baikalanga mukachi ka muzhi ne mu mapunzha akwabo bafwainwe kulondela luno lujimuno. (Luka 21:20-24) Mu oa moba, bantu bo balukukanga ku nzhita javula banyemenanga mu mizhi iji na nsakwa byonka byajinga muzhi wa Yelusalema pa kuba’mba bebazhikijile. Balangulukilenga’mba kunyemena ku mitumba kechi kukebazhikijila ne. Onkao mambo, bafwainwe kwikala na lwitabilo lwakosa pa kuba’mba bobe bino.

10. Kwikala na lwitabilo lwakosa kwakonsheshe kulengela bena Kilishitu kuba ka? (Bahebelu 13:17)

¹⁰ Bena Kilishitu Bahebelu bafwainwe kuketekela bantu Yesu bo aingijishenga kutangijila kipwilo. Kyamweka aba batangijilanga babuujile bena Kilishitu kimye kyo bafwainwe kunyema kufuma mu muzhi ne byo bafwainwe kuba pa kunyema. (Tangai Bahebelu 13:17.) Kyambo kya Kingiliki kyo baingijisha pa Bahebelu 13:17 kya kuba’mba “kookelainga” kilumbulula muntu ubena kukookela na mambo a kuketekela muntu ubena kumupa mukambizho. Kino kyambo kyalumbulula byavula, kechi kukookelatu muntu na mambo a kuba’mba bamupa luusa lwa kupana mizhilo ne. Onkao mambo, bena Kilishitu Bahebelu bafwainwe kuketekela bebatangijilenga nangwatu malwa saka akyangye kwiya. Inge kya kuba bakookejile ne kulondela mikambizho yapainenga bebatangijilenga mu kimye kyo baikelenga ku matwi nzoo, ko kuba’mba kyakonsheshe kwibapelela kulondela mikambizho ne mu kimye kya makatazho.

11. Mambo ka kwikala na lwitabilo lwakosa o kwanemena ku bena Kilishitu mu ano moba?

¹¹ Ne lelo jino twafwainwa kwikala na lwitabilo lonka lwajingapo na bena Kilishitu Bahebelu. Tubena kwikala mu kimye bantu kyo bakaana kuba’mba kechi tubena kwikala mu moba a kupelako ne. Kabiji betwendeleka na mambo a kwitabila bino. (2 Pe. 3:3, 4) Kunungapo, nangwa kya kuba Baibolo witubuula bintu bimo bikamweka mu kimye kya malwa akatampe, bino kuji bintu byavula byo twabula kuyuka. Twafwainwa kwikala na lwitabilo lwakosa kuba’mba Yehoba wafuukula kimye kyo akaletelamo mpelo ya buno bwikalo kabiji twafwainwa kushiinwa’mba Yehoba uketuzhikijila mu kimye kya malwa akatampe.​—Ha. 2:3.

12. Ñanyi kintu kiketukwasha kupuluka pa malwa akatampe?

¹² Kabiji twafwainwa kuketekela “kalume wa kishinka kabiji wa maana” Yehoba ye abena kwingijisha kwitutangijila lelo jino. (Mat. 24:45) Inge malwa akatampe atendeka, kyamweka tukatambwila mikambizho iketulengela kupuluka byonka byaubile bena Kilishitu Bahebelu kimye bena Loma kyo balukukile muzhi wa Yelusalema. Kino kyo kimye kya kuketekela bingi mikambizho yo tutambwila kufuma ku boba babena kwitutangijila mu jibumba ja Yehoba. Kiketukatazha kulondela mikambizho yabo mu kimye kya malwa akatampe inge tukankalwa kwiilondela pa kino kimye.

13. Mambo ka lujimuno luji pa Bahebelu 13:5 o lwanemena?

¹³ Byo bapembelejilenga kiyukilo kya kwibabuula kunyema, bena Kilishitu Bahebelu bafwainwe kupeezhako bwikalo bwabo, ne kubula “kutemwa mali.” (Tangai Bahebelu 13:5.) Bamo bayanjile na mambo a kipowe kya nzala ne makatazhotu akwabo. (Hebe. 10:32-34) Bamo batatwile kuta muchima ku bintu bya ku mubiji nabiji kukebesha mali kuba’mba bezhikijile ku buyanji ne ku makatazhotu akwabo. Nangwa byonkabyo, mali kechi akonsheshe kwibapulusha ku malwa akatampe aishilenga ne. (Yako. 5:3) Bantu batemenwe bintu bya ku mubiji kyakonsheshe kwibakatazha bingi kunyema ne kusha mazubo abo ne bipe byabo.

14. Luketekelo lwakosa lwakonsha kwitulengela kumonanga byepi bintu bya ku mubiji?

¹⁴ Kiketupelela bingi kubula kutemwisha bintu bya ku mubiji inge twaikala na lwitabilo lwakosa ne kuyuka’mba mpelo ya buno bwikalo bwatama ijitu pepi. Mu kimye kya malwa akatampe, bantu “bakataya siliva mu mikwakwa” mambo bakayuka’mba “siliva nangwa ngolode yabo kechi bikebapulusha mu juba ja bukaji bwa Yehoba ne.” (Ezi. 7:19) Mu kifulo kya kuta muchima pa kukebesha kwikala na mali avula bingi, twafwainwa kubanga bintu byakonsha kwitukwasha kumwena ba mu kisemi ne kwitulengela kutwajijila kwingijila Yehoba. Kabiji twafwainwa kuchinuzhukanga makongole nangwa kwingijishanga kimye kyabaya na kukebatu bya ku mubiji. Kechi twafwainwa kutesha muchima ku bipe byo tuji nabyo ne kwibimona’mba byo bintu byanema bingi mu bwikalo bwetu ne. (Mat. 6:19, 24) Mpelo ya buno bwikalo byo ibena kufwenya pepi, twafwainwa kusalapo kana kuketekela mwi Yehoba nangwa mu bipe byetu.

“KIMUFWAINWA KUCHINCHIKA”

15. Mambo ka bena Kilishitu Bahebelu o bakebewenga kuchinchika?

¹⁵ Bena Kilishitu Bahebelu bafwainwe kuchinchika pa kwingijila Yehoba mambo malwa ajingatu pepi kufika. (Hebe. 10:36) Nangwa kya kuba bena Kilishitu Bahebelu bamo bebamanyikilenga bingi, bavula kechi bebamanyikilenga ne. Onkao mambo, Paulo wibavulwilemo kuba’mba bafwainwe kwinengezha kupita mu makatazho akwabo ne kwikala ba kishinka kufikatu ne ku lufu byonka byaubile Yesu. (Hebe. 12:4) Bayudea bavula bazhingijile bingi ne kukanama mambo bantu bavula baitabijilenga ne kwikala bena Kilishitu. Panyuma kacheche, Paulo byo asapwijilenga mu Yelusalema, jibumba jamulukukile. Bayudea kukila pa 40, “bakonkene pamo ne kwifingisha bene amba, kechi basakuja nangwa kutoma ne, poso bamwipaye Paulo.” (Byu. 22:22; 23:12-14) Bena Kilishitu bafwainwe kutwajijila kupopwela Yehoba, kusapwila mambo awama ne kutwajijila kukosesha lwitabilo lwabo nangwa kya kuba bebashikilwe ne kwibamanyika.

16. Nkalata yo banembejile Bahebelu yakonsha kwitukwasha kumona byepi meseko o tupitamo? (Bahebelu 12:7)

¹⁶ Ñanyi kintu kyakwashishe bena Kilishitu Bahebelu kuchinchika lumanamo? Paulo wakebelenga kukwasha bena Kilishitu kuyuka bintu byawama byo bakamwenamo inge batwajijila kuchinchika. Onkao mambo, walumbulwile’mba Lesa wakonsha kuswisha lwitabilo lwa mwina Kilishitu kwesekwa. (Tangai Bahebelu 12:7.) Lufunjisho lwa uno mutundu lwakonsha kukwasha muntu kwikala na byubilo byawama bya bena Kilishitu nangwa kuwamishako byubilo bimo. Bena Kilishitu Bahebelu kibapelejile bingi kuchinchika meseko mambo batele muchima pa byawama bifumamo.​—Bahebelu 12:11.

17. Paulo wafunjile byepi kuchinchika lumanamo?

¹⁷ Paulo wakambizhe bena Kilishitu Bahebelu kuchinchika meseko ne kubula kubwela panyuma. Paulo wafikijilemo bingi kwibanembela byo bafwainwe kuchinchika lumanamo, mambo aye saka akyangye kwikala mwina Kilishitu wamanyikilenga bena Kilishitu. Kabiji wamwene byo bebamanyikilenga. Wayukile ne bya kuchinchika lumanamo. Kiji bino mambo aye byo aikele mwina Kilishitu, wapichile mu lumanamo lwapusana pusana. (2 Ko. 11:23-25) Onkao mambo, Paulo waambile na kushiinwa byo kilumbulula kuchinchika. Wavulwilemo bena Kilishitu kuba’mba inge babena kupita mu meseko, bafwainwa kuketekela mwi Yehoba, kechi kwiketekela abo bene ne. Kabiji waambile na kuchinchika amba: “Yehoba ye nkwasho wami; kechi nakonsha kuchina ne.”​—Hebe. 13:6.

18. Ñanyi bintu biji kulutwe byo twafwainwa kuyuka byakonsha kwitukwasha kuchinchika lumanamo?

¹⁸ Balongo betu bamo babena kuchinchika lumanamo pa kino kimye. Twakonsha kwibatundaika mu milombelo yetu ne pa bimye bimo kwibakwasha mu byo bakajilwa. (Hebe. 10:33) Nangwa byonkabyo, Baibolo waambishatu patoka’mba “bonse bakeba kwikala na munema wa kunemeka Lesa mwi Kilishitu Yesu, nabo bakebamanyikanga.” (2 Timo. 3:12) Onkao mambo, atweba bonse twafwainwa kwinengezhezha jimo ku bintu bibena kwiya kulutwe. Twayai tutwajijile kuketekela mwi Yehoba ne kushiinwa kuba’mba uketukwashanga kuchinchika makatazho onse o twakonsha kupitamo. Kabiji kulutwe ukapwisha makatazho onse abena kupitamo bapopweshi banji bonse ba kishinka.​—2 Tesa. 1:7, 8.

19. Ñanyi bintu byo twafwainwa kuba pa kuba’mba twinengezhezhe jimo ku malwa akatampe? (Monai ne kipikichala.)

¹⁹ Kwakubula nangwa kuzhinaukatu ne, nkalata Paulo yo anembejile Bahebelu yakwashishe bena Kilishitu ba mu myaka kitota kitanshi kwinengezhezha jimo ku bya malwa byaishilenga kulutwe. Paulo wakambizhe balongo banji kufunda byavula pe Yehoba ne kumvwisha mwatala Binembelo. Kuba bino kwakonsheshe kwibakwasha kuyuka ne kukaana mafunjisho akonsheshe konauna lwitabilo lwabo. Wibatundaikile kukosesha lwitabilo lwabo pa kuba’mba kibapeelele kulondela mikambizho ya kwa Yesu ne ya boba batangijilenga mu kipwilo. Kabiji wakwashishe bena Kilishitu kuchinchika ne kuyuka mwakubila na makatazho ne kwiamona’mba jo jishinda jo babena kwibafunjishishamo kwi Shabo wa butemwe. Ne atweba twafwainwa kulondela luno lujimuno lwa mu Baibolo. Inge twauba bino, tukatwajijila kuchinchika kufikatu ne ku mpelo.​—Hebe. 3:14.