Nanchi Mwayuka Nyi?

Twayuka byepi kuba’mba nyimbo yanemene bingi ku bena Isalela ba kala?

BENA ISALELA ba kala batemenwe bingi nyimbo. Baibolo waambapo javula pa bantu baimbanga nyimbo kwingijisha byansa ne kwimba nyimbo mu mawi. Kiji bino mambo Binembelo bimo mu Baibolo ke nyimbo, nabiji buku wa Masalamo, Lwimbo wa Solomone ne Majilo a Yelemiya. Buku umo waamba pa byaikalanga bantu mu moba a kala waamba’mba: “Bena Isalela baingijishanga nyimbo mu bintu byavula byo baubanga mu bwikalo bwabo.”

Nyimbo yo Baimbanga mu Bwikalo Bwabo. Bena Isalela baimbanga nyimbo kumwesha bintu byo bapitangamo. (Isa. 30:29) Banabakazhi baimbanga minsakayi, baimbanga nyimbo na lusekelo ne kuzha kimye kya kusekelela nabiji inge baswanyika Mfumu, bashinda mu nkondo ne pa kupopwela Yehoba. (Mito. 11:34; 1 Sam. 18:6, 7; 1 Mfu. 1:39, 40) Bena Isalela baimbanga ne nyimbo ya bulanda inge muntu wafwa. (2 Moba 35:25) Buku wa McClintock ne Strong’s Cyclopedia waamba’mba “bena Isalela batemenwe bingi kwimba nyimbo.”

Nyimbo yo baimbilanga bamfumu. Bamfumu ba bena Isalela batemenwe bingi nyimbo. Mfumu Davida waichile Saulo mu kipango kyanji kuba’mba amwimbilenga nyimbo. (1 Sam. 16:18, 23) Palutwe kacheche, Davida byo aikele mfumu, walengele bijimba bya mizhinge, kunemba nyimbo ne kunengezha jibumba ja kwimba pa nzubo ya Yehoba. (2 Moba. 7:6; Amo. 6:5) Mfumu Solomone wajinga na banyimbi babalume ne babakazhi mu kipango kyanji.—Sapwi. 2:8.

Kwimba nyimbo pa kupopwela Yehoba. Kyakilamo kunema, bena Isalela baimbanga nyimbo pa kupopwela Yehoba. Banyimbi 4,000 baimbanga nyimbo mu nzubo ya Lesa mu Yelusalema. (1 Moba 23:5) Baingijishanga nsonsolo, bijimba bya mizhinge, byansa ne matolompita. (2 Moba 5:12) Bano banabalume bayukile kwimba nyimbo kechi bo bonkatu bapopwelanga Yehoba kwingijisha nyimbo ne. Bena Isalela bavula baimbanga nyimbo pa kuya ku Yelusalema na kupopwela Yehoba pa mwaka pa mwaka kabiji ino nyimbo beitelanga’mba nyimbo ya pa kukanjila. (Sala. 120–134) Kabiji kwesakana na byaamba mabuku a Bayudea, bena Isalela baimbanga nyimbo imo ya Masalamoa pa Kijiilo kya Lupitailo.

Ne lelo jino, bantu ba Lesa bamona nyimbo amba yanema bingi. (Yako. 5:13) Twimba nyimbo pa kupopwela Yehoba. (Efi. 5:19) Nyimbo itukwatankanya na bena Kilishitu bakwetu. (Kolo. 3:16) Kabiji itukosesha inge tubena kupita mu makatazho. (Byu. 16:25) Nyimbo ke jishinda jimo jawama jo tumwesheshamo lwitabilo mwi Yehoba ne byo twamutemwa.