Mepuzho Afuma ku Batanga
Nga “bamalaika basalwa” bo baambapo pa 1 Timoti 5:21 bo bañanyi?
Mutumwa Paulo wanembejile mukwabo mukulumpe mu kipwilo aye Timoti amba: “Nakukambizha ku meso a Lesa ne kwi Kilishitu Yesu ne ku bamalaika basalwa namba, ulame ino mikambizho kwa kubula kuchibila jimo mambo nangwa kuba misalululo.”—1 Timo. 5:21.
Pa kuba’mba tuyuke bano bamalaika, patanshi twayai twisambe pa bamalaika bo twafwainwa kubula kubajila pa bano bamalaika basalwa. Abano bamalaika kechi baji pa ba 144,000 ne. Paulo wanembejile Timoti bino byambo lusanguko lwa kuya mwiulu saka lukyangye kutendeka. Batumwa ne bashingwa bakwabo pa kyokya kimye kechi bajinga bilengwa bya mupashi ne, onkao mambo kechi bo bajinga “bamalaika basalwa” ne.—1 Ko. 15:50-54; 1 Tesa. 4:13-17; 1 Yoa. 3:2.
Kikwabo, bano “bamalaika basalwa” kechi bo boba basatukile mu kimye kya Muyulo ne. Abano bamalaika bafuukwilepo kwikala ku lubaji lwa kwa Satana ne kwikala bandemona, kabiji baikele balwanyi ba kwa Yesu. (Nte. 6:2; Luka 8:30, 31; 2 Pe. 2:4) Kulutwe, bakebataya mu kalengwa kabula kupela pa myaka 1,000, kepo bakebonauna pamo na Diabola.—Yuda 6; Lum. 20:1-3, 10.
“Bamalaika basalwa” baambilepo Paulo kyamweka ke bamalaika ba kishinka baji mwiulu bakwashisheko “Lesa ne Yesu Kilishitu.” Kabiji Lesa ne Yesu Kilishitu nabo bebambapo pa kino kyepelo.
Kuji biumbi ne biumbi bya bano bamalaika bakishinka. (Hebe. 12:22, 23) Kyamweka Yehoba kechi upa bano bamalaika mwingilo umo pa kimye kimotu ne. (Lum. 14:17, 18) Vulukai’mba pa kimye kimo malaika umo bamupeele mwingilo wa konauna bashilikale bena Asilya 185,000. (2 Mfu. 19:35) Bamalaika bavula kyamweka bebapa mwingilo wa ‘kufumyamo bintu byonse bya kwituntulako mu Bufumu [bwa kwa Yesu] ne bantu boba byatama.’ (Mat. 13:39-41) Bamalaika bakwabo kampe “bakakonkanya pamo basalwa banji” mwiulu. (Mat. 24:31) Kabiji bakwabo bebakambizha ‘kwitulama mu mashinda etu onse.’—Sala. 91:11; Mat. 18:10; esakanyaiko ne Mat. 4:11; Luka 22:43.
“Bamalaika basalwa” bo baambapo pa 1 Timoti 5:21 kyamweka ke boba bo bapele mwingilo wa kukwasha bipwilo. Mu kino kyepelo, Paulo wajimwineko bakulumpe mu kipwilo pa byo bafwainwa kwingilanga bulongo mingilo yabo, kabiji amba balongo ne banyenga mu kipwilo bafwainwa kunemeka bano bakulumpe mu kipwilo. Bakulumpe mu kipwilo bafwainwa kwingilanga mingilo yabo kwa kubula “misalululo” kabiji bafwainwa kulangulukapo bulongo saka bakyangye kuchiba mambo. Kintu kyanema kyafwainwa kwibalengela kulondela bibajimwineko Paulo ke na mambo a kuba’mba babena kwingila mingilo ya kukwasha balongo kwesakana na byo bebakambizha “ku meso a Lesa ne kwi Kilishitu Yesu ne ku bamalaika basalwa.” Onkao mambo, kyamwekeshatu patoka kuba’mba bamalaika bamo bebapa mingilo ya kukwasha kipwilo, nabiji kwikizhikijila, kutangijila mwingilo wa kusapwila ne kubwezha sawakya kwi Yehoba.—Mat. 18:10; Lum. 14:6.