Langulukainga Byonka Bilanguluka Yehoba ne Yesu

1-2. Ñanyi bintu byavwangwa mu kutemwa Yehoba, kabiji Yesu wamwesheshe byepi kuba’mba watemenwe Yehoba na maana anji onse?

“WAFWAINWA kutemwa Yehoba Lesa wobe na muchima wobe yense, ne na mweo wobe yense, ne na bulume bobe bonse, ne na maana obe onse.” (Luka 10:27) Yesu waambile’mba uno ye mukambizho wanema bingi mu Mizhilo ya Mosesa. Mu kutemwa Yehoba mwavwangwa ne michima yetu, ko kuba’mba bintu byo tukeba ne byo tumvwa ku muchima. Kabiji mwavwangwa ne kumwingijila na muchima wetu yense ne na bulume bwetu bonse. Nangwa byonkabyo, mu kutemwa Yehoba mwavwangwa ne maana etu, ko kuba’mba byo tulanguluka pa bintu. Ibyo kuba’mba kechi twakonsha kumvwisha byonse bilanguluka Yehoba ne. Pano bino, twakonsha kumvwisha bilanguluka Lesa inge ke tufunde pa biji “muchima wa Kilishitu,” mambo Yesu umwesha patoka milanguluko ya Shanji.—1 Ko. 2:16.

² Yesu watemenwe Yehoba na maana anji onse. Wayukile bintu Lesa byo akebelenga amba obe kabiji wakebeshe kwibifikizha, nangwa kya kuba kino kyalumbulwilenga amba ukamanama na mambo a kuba byaoloka. Na mambo a kuba’mba Yesu watele muchima pa kuba kyaswa muchima wa Shanji, kechi waswishishe kintu kiji kyonse kumulabika ne.

3. Ñanyi bintu mutumwa Petelo byo afunjijileko kwi Yesu kabiji Petelo watundaikile bena Kilishitu bakwabo kuba ka? (1 Petelo 4:1)

³ Petelo ne batumwa bakwabo baikele kimye kyabaya ne Yesu. Kino kibalengejile kuyuka bulongo byo alangulukanga. Petelo byo bamutangijile ku mupashi kunemba nkalata yanji itanshi, watundaikile bena Kilishitu bakwabo kulanguluka byonka byalangulukanga Kilishitu. (Tangai 1 Petelo 4:1.) Mu mulaka mwine mutanshi, Petelo byo anembele kuba’mba “inengezhai,” waingijishe kyambo kyalumbulwilenga bashilikale benengezha na bilwilo kuba’mba baye na kulwa nkondo. Onkao mambo, inge bena Kilishitu kebalanguluke byonka byalangulukanga Yesu, kikekalatu nobe benengezha na kilwilo kikebakwasha kushinda miteeto yatama ne ino ntanda ibena kulama Satana.—2 Ko. 10:3-5; Efi. 6:12.

4. Uno mutwe usakwitukwasha byepi kulondela byambo byaambile Petelo?

⁴ Tusakwisamba pa byalangulukanga Yesu ne byo twakonsha kulanguluka byonka byo alangulukanga. Tusakufunda pa (1) byo twafwainwa kulangulukanga byonka bilanguluka Yehoba pa kuba’mba tuyilenga mumo na bakwetu, (2) kwipelula, ne (3) byo twafwainwa kulangulukanga bulongo kupichila mu kulomba kwi Yehoba.

LANGULUKAINGA BYONKA BILANGULUKA YEHOBA

5. Petelo wakankelwe byepi kulanguluka byonka bilanguluka Yehoba?

⁵ Akilangulukai pa kimye kimo Petelo po akankelwe kulanguluka byonka bilanguluka Yehoba pa bintu. Yesu wabuujile batumwa banji kuba’mba ukaya ku Yelusalema ko bakamupana ku bantangi ba bupopweshi, kuchinchika lumanamo apa bino ne kumwipaya. (Mat. 16:21) Kyamweka Petelo kyamukatezhe kuswa kuba’mba Yehoba wakonsha kuswisha Yesu wafwainwe kupokolola bena Isalela kabiji Mesiasa walailwe kumwipaya. (Mat. 16:16) Onkao mambo, Petelo wasendele Yesu ku mbaji ne kumwambila’mba: “Kwakamwa ne, Nkambo; kino kechi kikemumwekela ne.” (Mat. 16:22) Na mambo a kuba’mba Petelo kechi walangulukilenga bilanguluka Yehoba pa kino ne, walangulukilenga byapuseneko na byalangulukilenga Yesu.

6. Yesu wamwesheshe byepi kuba’mba walangulukilenga byonka bilanguluka Yehoba?

⁶ Yesu walangulukanga byonka bilanguluka Shanji wa mwiulu. Yesu waambijile Petelo amba: “Pichila kunyuma yami, Satana! Obewa wi kya kwituntulako kyami, mambo ulanguluka milanguluko ya bantu kechi ya Lesa ne.” (Mat. 16:23) Kyamweka byalangulukilenga Petelo byajingatu bulongo, bino Yesu wakaine byamwambijile Petelo. Tufunjilako kintu kyanema bingi. Yehoba wayukile’mba Yesu ukamanama. Pa kyokya kimye, Petelo wafunjijileko kintu kyanema bingi kya kuba’mba wafwainwe kulanguluka byonka bilanguluka Lesa.

7. Mu kuya kwa moba, Petelo wamwesheshe byepi kuba’mba wakebelenga kulanguluka byonka bilanguluka Yehoba? (Monai ne kipikichala kya pa )

⁷ Mu kuya kwa kimye, Petelo wamwesheshe’mba wakebelenga kutendeka kulanguluka byonka bilanguluka Yehoba. Kimye kyafikile kya kuba’mba bantu ba mu bisaka bikwabo bekale bantu ba Lesa. Petelo bamutumine kuya na kusapwila muntu wa mu bisaka bikwabo aye Koneleusa wajinga mutanshi kwikala pa jino jibumba ja katataka ja bapopweshi ba Yehoba. Bayudea ne bantu ba mu bisaka bikwabo kechi baumvwañananga ne, onkao mambo Petelo wafwainwe kupimpula milanguluko yanji pa kuba’mba asapwile bantu ba mu bisaka bikwabo. Petelo byo ayukile byalangulukilenga Lesa pa kino, wapimpwile milanguluko yanji. Ne kyafuminemo, Petelo byo bamwichile, wayile kwakubula “kuzhinyazhinya.” (Byu. 10:28, 29) Wasapwijile Koneleusa ne ba mu nzubo yanji, kabiji babatizhiwe.—Byu. 10:21-23, 34, 35, 44-48.

8. Twakonsha kumwesha byepi amba tulanguluka byonka bilanguluka Yehoba? (1 Petelo 3:8 ne tubyambo twa munshi)

⁸ Byo papichile myaka, Petelo watundaikile bena Kilishitu bakwabo’mba “kwatankanai mu milanguluko.”(Tangai 1 Petelo 3:8 ne tubyambo twa munshi.) Byo tuji bantu ba Lesa, twakonsha kukwatankana mu milanguluko na balongo ne banyenga inge ketulanguluke byonka bilanguluka Yehoba kwesakana na byo tufunda mu Baibolo. Yesu watundaikile baana banji ba bwanga kukeba Bufumu patanshi mu bwikalo bwabo. (Mat. 6:33) Onkao mambo, musapwishi mu kipwilo kyenu wakonsha kufuukulapo kutwela mu mwingilo wa kimye kyonse. Mu kifulo kya kumukanya, twakonsha kumutundaika ne kwamba byawama pa byo afuukulapo kuba.

IKALAI BEPELULA

9-10. Yesu wamwesheshe byepi’mba wipelula bingi?

⁹ Bufuku saka bakyangye kumwipaya, Yesu wafunjishe Petelo ne batumwa bakwabo ene mambo o kyanemena kwipelula. Panyuma, Yesu watumine Petelo ne Yoano kuya na kunengezha kijiilo kyapeleleko Yesu kyo ajiile pamo nabo. Kyamweka mu byo banengezhenga mwavwangilwe kunengezha nsanyi ne mataulo pa kuba’mba benyi baishilenga bebovwe ku maulu kijiilo saka kikyangye kutendeka. Pano ñanyi wafwainwe kovwa bakwabo ku maulu, kimye byo kyafikile kya kuba bino?

¹⁰ Yesu waingijile uno mwingilo kwakubula kuzhinyazhinya kabiji kino kyamwesheshe’mba wipelula bingi. Kino kyakumishe bingi baana banji ba bwanga mambo waingijile mwingilo waingilanga bazha. Yesu wavuujile bivwalo byanji bya peulu kabiji winyingile taulo mu lubunda, wabikile mema mu nsanyi ne kutendeka kwibovwa ku maulu. (Yoa. 13:4, 5) Kyamweka pa kubatu’mba ovwe ku maulu batumwa bonse 12 kuvwangakotu ne Yudasa wamufutukilemo, kyasendele kimye kyabaya bingi. Nangwa byonkabyo, Yesu wipelwile ne kupwisha kwingila uno mwingilo. Kepo Yesu alumbulwile’mba: “Nanchi mwakwatakanya kintu kyo nemubila nyi? Anweba muntela’mba, ‘Mufunjishi,’ ne, ‘Nkambo,’ mwamba kine, mambo yami iye. Onkao mambo, umvwe amiwa byo nji Nkambo kabiji Mufunjishi, nemovwa ku maulu, ne anweba mwafwainwa kwiovwanga ku maulu anwe bene na bene.”—Yoa. 13:12-14.

11. Petelo wamwesheshe byepi kuba’mba wafunjile kwipelula? (1 Petelo 5:5) (Monai ne kipikichala.)

¹¹ Petelo wafunjijileko bintu byavula bingi ku kwipelula kwa kwa Yesu. Yesu byo abwelele mwiulu, Petelo waubile kya kukumya byo abukile mwanamulume wasemekelwe kilema. (Byu. 1:8, 9; 3:2, 6-8) Kino kya kukumya kyaubile Petelo, kyalengejile bantu bavula kwiya ko ajinga. (Byu. 3:11) Nangwa byonkabyo, Petelo kechi wakebelenga’mba bantu bamutumbijike nangwa kya kuba wakomejile mu bantu bakebanga kutumbalala ne. Petelo aye wipelwile ne kutumbijika Yehoba ne Yesu byo aambile’mba: ‘Kupichila mu jizhina ja kwa Yesu ne na mambo a kuba twaitabila mu jizhina janji, kyo kyalengela’mba abukwe uno muntu ye mubena kumona kabiji ye mwayuka.’ (Byu. 3:12-16) Byambo byaingijishe Petelo mu nkalata yo anembejile bena Kilishitu byaamba pa kwikala na muchima wa kwipelula, bituvululamo kimye Yesu kyo enyingile taulo mu lubunda ne kovwa batumwa banji ku maulu.—Tangai 1 Petelo 5:5.

12. Twakonsha kutwajijila byepi kumwesha kwipelula byonka byaubile Petelo?

¹² Twakonsha kuba byonka byaubile Petelo pa kuba’mba twikale bepelula. Vulukainga kuba’mba byambo byamba muntu kechi byo bimwesha’mba wipelula ne. Byambo byaingijishe Petelo byaamba pa kwipelula byavwangamo ne milanguluko yetu ko kuba’mba kwikala na ‘muchima wa kwipelula.’ Tubila bakwetu bintu byawama mambo twatemwa Yehoba ne bantu, kechi na mambo a kukeba kutumbalala ne. Inge ketwingijile Yehoba na lusekelo ne kukwasha balongo ne banyenga mu mashinda onse nangwa kya kuba mingilo yetu ibena kumweka ku bantu nangwa ne, kwingila bino kumwesha’mba twipelula.—Mat. 6:1-4.

“LANGULUKAINGA BULONGO”

13. Lumbululai byo kilumbulula ‘kulanguluka bulongo.’

¹³ Ñanyi bintu byavwangwa mu ‘kulanguluka bulongo?’ (1 Pe. 4:7) Mwina Kilishitu ulanguluka bulongo wibikako kufuukula bintu kwesakana na bilanguluka Yehoba. Mwina Kilishitu wa uno mutundu wayuka’mba kintu kyanema bingi mu bwikalo bwanji ke bulunda bwanji ne Yehoba. Kabiji wikala na mweno yawama pe aye mwine ne kuyuka’mba kechi byonse byo afwainwa kuba bulongo ne. Umwesha amba waketekela mu lutangijilo lwa Lesa kupichila mu kulomba kwi Yehoba kimye kyonse.

14. Pa kimye kimo Petelo wamwesheshe byepi kubula kuketekela mwi Yehoba?

¹⁴ Juba japeleleko Yesu saka akyangye kufwa, wajimwineko baana banji ba bwanga’mba: “Anweba bonse musakwituntula na mambo a kisakummwekela bufuku buno.” Petelo wakumbwile na kwiketekela amba: “Nangwa kya kuba bonse basakwituntula na mambo a kisakwimumwekela, amiwa kechi nsakwituntula ne!” Abwa bufuku Yesu wabuujile baana banji ba bwanga bamo amba: “Labainga ne kukenkenta ne kutwajijila na kulomba.” (Mat. 26:31, 33, 41) Petelo inge waumvwijile byaambile Yesu, inge wachinchikile ne kuswa kuba’mba wajinga mwana wa bwanga wa kwa Yesu. Pano bino, Petelo wakaine Nkambo yanji kabiji palutwe kacheche wilangulwishe bingi.—Mat. 26:69-75.

15. Yesu wamwesheshe byepi’mba watwajijile kulanguluka bulongo ne pa bufuku bwapeleleko kwikala pano pa ntanda?

¹⁵ Yesu waketekejile mwi Yehoba na muchima wanji yense. Nangwa kya kuba Yesu wajinga muntu waoloka, bino walombanga kimye kyonse. Kuba bino kwamulengejile kuchinchika ne kuba bintu kwesakana na byakebelenga Yehoba kuba’mba obe. (Mat. 26:39, 42, 44; Yoa. 18:4, 5) Twaketekela Petelo kechi walubilemo bimye byavula byalombele Yesu pa juba ja kupelako saka akyangye kufwa ne.

16. Petelo wamwesheshe byepi’mba wajinga na milanguluko yawama? (1 Petelo 4:7)

¹⁶ Pa kupitapo kimye, Petelo wafunjile kulomba ne kuketekela mwi Yehoba. Yesu byo bamusangwile, watundaikile Petelo ne batumwa bakwabo kuba’mba bakatambwila mupashi wazhila ukebakwasha kwingila bulongo mwingilo wa kusapwila. Nangwa byonkabyo, Yesu wibambijile kwikala mu Yelusalema ne kupembelela kufikatu ne kimye kyo bakebapa mupashi wazhila. (Luka 24:49; Byu. 1:4, 5) Ñanyi kintu kyaubilenga Petelo byo bapembejilenga kutambula mupashi wazhila? Petelo ne bena Kilishitu bakwabo “balombelenga na mukoyo.” (Byu. 1:13, 14) Kabiji palutwe kacheche, mu nkalata yanji itanshi, Petelo watundaikile bena Kilishitu bakwabo kwikala na milanguluko yawama, kulomba ne kuketekela mwi Yehoba. (Tangai 1 Petelo 4:7.) Petelo waketekejile mwi Yehoba kabiji waikele jishiki watundaikanga bakwabo mu kipwilo.—Nga. 2:9.

17. Nangwa kya kuba tuji na maana a kuba bintu bulongo, ñanyi bintu byo twafwainwa kutwajijila kubanga? (Monai ne kipikichala.)

¹⁷ Pa kuba’mba twikale na milanguluko yawama, twafwainwa kulombanga kwi Yehoba kimye kyonse. Twafwainwa kutwajijila kulomba kwi Yehoba nangwa kya kuba tuji na maana a kuba bintu bulongo. Onkao mambo, kikatakata inge tubena kukeba kufuukula bintu byanema mu bwikalo, twafwainwa kulomba kwi Yehoba kwitutangijila ne kuketekela’mba wayuka bulongo bintu bitufwainwa.

18. Twakonsha kutendeka byepi kuba bintu kwesekana na bilanguluka Yehoba?

¹⁸ Tumusanchila bingi Yehoba mambo witulenga mu jishinda jitulengela kumwesha byubilo byo ajipo nabyo. (Nte. 1:26) Ibyo kuba’mba kechi twakonsha kulondela sukasuka byubilo bijipo ne Yehoba ne. (Isa. 55:9) Pano bino, byonka byaubile Petelo, ne atweba twakonsha kutendeka kuba bintu kwesakana na bilanguluka Yehoba. Twayai tutwajijile kuba bino kupichila mu kulanguluka byonka bilanguluka Yehoba, kwipelula ne kwikala na milanguluko yawama.