Twajijilai Kwenda mu Lwitabilo

1. Ñanyi kintu kyalengejile mutumwa Paulo kwikala na lusekelo byo alangulukile pa bwikalo bwanji bwa kunyuma?

PA KIMYE kimo, mutumwa Paulo wayukile’mba basakumwipaya, pano bino watwajijile kwikala na lusekelo mambo wayukile’mba waingijijile Lesa mu bwikalo bwanji. Waambile’mba: “Nanyema kapela kufika ne ku mpelo, kabiji nalama lwitabilo.” (2 Timo. 4:6-8) Paulo wafuukwilepo kwingijila Yehoba mu bwikalo bwanji, kabiji wayukile’mba kintu kyo afuukwilepo kuba kyasangajikile bingi Yehoba. Ne atweba tukeba kufuukula bintu bitokesha Lesa ku muchima. Pano twafwainwa kuba byepi bino?

2. Kwenda mu lwitabilo kulumbulula ka?

² Paulo waambile pe aye mwine ne pa bena Kilishitu bakwabo ba kishinka amba: “Tubena kwenda mu lwitabilo, kechi mu kumona na meso ne.” (2 Ko. 5:7) Paulo walumbulwilenga ka? Mu Baibolo, kyambo kya kuba’mba “kwenda,” kimye kimo kilumbulula bwikalo bwafuukulapo muntu amba bo bo asakwikalanga. Muntu wenda na kumo na meso ufuukula bintu kwesakana na byo abena kumona, byo abena kumvwa ku bantu ne byo abena kumvwa ku muchima. Pa kuba muntu wenda mu lwitabilo, pa kufuukula bintu ulanguluka pe Yehoba byo amona kintu kyo akeba kufuukulapo. Bintu byo oba bimwesha kuba’mba washiinwa’mba Lesa ukamufweta nangwa amba ukekala na lusekelo inge wafuukula kwesakana na byaamba mikambizho ya Yehoba iji mu Baibolo.—Sala. 119:66; Hebe. 11:6.

3. Ñanyi bintu byawama bifumamo inge twatwajijila kwenda mu lwitabilo? (2 Kolinda 4:18)

³ Ibyo kuba’mba bimye bimo, atweba bonse tufuukula bintu kwesakana na byo tubena kulanguluka, kumvwa ne kumona. Pano bino, twakonsha kwiletela makatazho inge ketufuukule bintu byanema kwesakana na byo tubena kulanguluka, kumvwa ku bantu ne kumona. Mambo ka? Mambo muchima wetu kimye kimo witujimbaika. Kufuukula bintu kwesakana na byo tubena kulanguluka kuketulengela kufuukulapo bintu bifichisha Lesa ku muchima. (Sapwi. 11:9; Mat. 24:37-39) Bino kwenda mu lwitabilo kuketulengela kufuukula ‘bintu bimutokesha’ ku muchima. (Efi. 5:10) Kukookela mikambizho ya Lesa kuketupa mutende wa mu milanguluko ne kwitulengela kwikala na lusekelo. (Sala. 16:8, 9; Isa. 48:17, 18) Kabiji inge twatwajijila kwenda mu lwitabilo, tukekala na bumi bwa myaka ne myaka.—Tangai 2 Kolinda 4:18.

4. Muntu wafwainwa kuyuka byepi amba ubena kwenda mu lwitabilo nangwa mu kumona na meso?

⁴ Twakonsha kuyuka byepi amba tubena kwenda mu lwitabilo nangwa mu kumona na meso? Twafwainwa kulanguluka pa bino bintu: Bintu byo tufuukula bimena pa ka? Abya nanchi bimena pa bintu byo tumonatu na meso nyi, inyi bimwesha amba twaketekela mwi Yehoba ne byo etufundako? Twayai twisambe pa bintu bisatu mo twafwainwa kumweshesha’mba tubena kwenda mu lwitabilo: Kimye kyo tubena kusala nkito ya kutwela, kusala wa kutwela nanji mu masongola ne kimye kyo tubena kutambwila mikambizho kufuma ku jibumba ja Lesa. Mu bino bintu byonse, tusakwisamba pa bishinka byo twafwainwa kulangulukapo pa kuba’mba tufuukule bulongo.

INGE TUBENA KUSALA NKITO YA KUTWELA

5. Ñanyi bintu byo tulangulukapo pa kusala nkito yo tukengilanga?

⁵ Atweba bonse tukeba kwikala na bintu bikebewa mu bwikalo ne kumwena ba mu kisemi kyetu. (Sapwi. 7:12; 1 Timo. 5:8) Ku nkito kumo bapana mali avula, kabiji ino nkito yakonsha kulengela muntu kwikala na mali a kukwashishamo kisemi kyanji ne kulamapo amo. Pa kuba ku nkito ikwabo bapanatu mali acheche kya kuba muntu wakonsha kwikalatu na mali a kukwashishamo kisemi kwapwa. Na mambo a kino, pa kusala nkito ya kutwela, javula tulanguluka ne pa mali o baketupanga. Pano bino, kino inge kyo kyonka muntu kyo alangulukapotu pa kusala nkito ya kutwela, ko kuba’mba ubena kumona bintu na meso, kechi mu lwitabilo ne.

6. Twakonsha kumwesha byepi amba tubena kwenda mu lwitabilo kimye kyo tubena kusala nkito ya kutwela? (Bahebelu 13:5)

⁶ Inge tubena kwenda mu lwitabilo, tukalanguluka ne pa nkito yo tukasala inge iketulengelanga kwingijila Yehoba bulongo nangwa ne. Twakonsha kwiipuzha’mba: ‘Nanchi ino nkito ikandengelanga kuba bintu byashikwa Yehoba nyi?’ (Maana 6:16-19) ‘Abya ikandengelanga kukankalwa kupopwela Lesa nangwa kundengela kusha kisemi kyami pa kimye kyabaya nyi?’ (Fili. 1:10) Inge mukumbu ku ano mepuzho onse ke wa kuba’mba ee, ko kuba’mba kechi kyakonsha kuwama kutwela nkito ya uno mutundu ne, nangwa kya kuba kutaana nkito kwakatazha. Inge tubena kwenda mu lwitabilo, tufuukula bintu bimwesha’mba twashiinwa kuba’mba Yehoba uketukwashanga kutaana bintu bikebewa mu bwikalo.—Mat. 6:33; tangai Bahebelu 13:5.

7-8. Mulongo umo wikala mu kyalo kya South America, waubile byepi pa kuba’mba atwajijile kwenda mu lwitabilo? (Monai ne kipikichala.)

⁷ Mulongo Javier,a wikala mu kyalo kya South America, wamwene ene mambo o kyanemena kwenda mu lwitabilo. Waambile’mba: “Nataaine nkito yawama bingi ko bafwainwe kumpanga mali jibiji mu ñondo, kino kyakonsheshe kundengela kwikala na bintu bya mu bwikalo byonse byo nkeba.” Nangwa byonkabyo, mulongo Javier wakebeshe ne kwingilako mwingilo wa bupainiya. Wanungilepo’mba: “Utala pa bibena kwenda mingilo pa ino nkito wangichile amba namubuule byo nayukile pa ino nkito. Saka nkyangye kuya, nalombele kwi Yehoba kuba’mba ankwashe, mambo nayukile’mba ye wayuka bintu byangwamina. Nangwa kya kuba nakebelenga nkito yawama, kechi nakebelenga kutwela nkito yakonsheshe kundengela kukankalwa kufikizha bikonkwanyi byami ne.”

⁸ Mulongo Javier waambile’mba: “Kimye kyo nesambilenga na utala pa mingilo, wambujile’mba bimye byavula nkengilanga maola avula bingi. Namubuujile na mushingi kabiji kwakubula kupita mu mbaji kuba’mba kechi nakonsha kwingila ino nkito ne, mambo yakonsha kundengela kubula kupopwela Lesa wami.” Mulongo Javier wafuukwilepo kubula kutwela ino nkito. Byo papichile milungu ibiji, watendekele mwingilo wa bupainiya. Kabiji pa kupitapo kimye mu yenkawa mwaka, wataaine nkito ya kwingilako moba amo mu mulungu. Waambile’mba: “Yehoba wakumbwile lulombelo lwami ne kunkwasha kutaana nkito yandengejile kwingila bulongo mwingilo wa bupainiya. Nji bingi na lusekelo pa kutaana nkito ibena kundengela kwingijila Yehoba bulongo ne kukwasha balongo ne banyenga.”

9. Ñanyi bintu byo mwafunjilako ku byapichilemo mulongo Trésor?

⁹ Twakonsha kuba byepi inge nkito yo twingila kechi ibena kwitulengela kupopwela Yehoba bulongo ne? Akilangulukai pe Trésor, wikala mu kyalo kya Congo. Waambile’mba: “Nataaine nkito yawama, nafolanga mali avula kukila ku nkito ko naingilanga patanshi, kabiji bantu bannemekele bingi. Nangwa byonkabyo, mulongo Trésor javula washalanga ku kupwila na mambo a kwingila maola avula ku nkito. Kabiji bantu bo aingilanga nabo, bamukanjikizhanga kuba bintu byamweshanga kubula bukishinka. Mulongo Trésor wakebelenga kuleka kwingila ino nkito, bino waakaminwenga amba kampe kechi ukatanapo nkito ikwabo ne. Ñanyi kintu kyamukwashishe? Waambile’mba: “Kinembelo kya Habakuka 3:17-19 kyankwashishe kuyuka kuba’mba nangwa kya kuba nkito yapwa, Yehoba ukankwashanga kwikala na bintu bikebewa mu bwikalo. Onkao mambo, nalekele kwingila ino nkito. Wapezhezheko kwamba’mba: “Bakulumpe ba pa nkito bavula balanguluka’mba muntu wakonsha kusankilapo biji byonse nabiji kisemi kyanji ne kupopwela Lesa pa kubatu amba alamawizhe nkito yanji. Nji bingi na lusekelo mambo nazhikijile bulunda bwami ne Yehoba ne kisemi kyami. Byo papichile mwaka umo, Yehoba wankwashishe kutaana nkito ikwabo yawama yandengejile kwikala na mali a kwikwashishamo ne kwingijila Yehoba.” Inge twatangizhako kwingijila Yehoba mu bwikalo bwetu, kampe pa kupuma kuboko pakonsha kwitukatazhako pa ka kimye kacheche. Pano bino, Yehoba uketukwashanga. Inge twaketekela mu bintu bitubuula Yehoba ne mu milaye yanji, tukatwajijila kwenda mu lwitabilo kabiji aye uketupesha.

INGE TUBENA KUSALA WA KUTWELA NANJI MU MASONGOLA

10. Ñanyi bintu byafwainwa kumwesha’mba twatatu muchima pa bintu byo tumona na meso pa kusala wakutwela nanji mu masongola?

¹⁰ Masongola ke bupe bwafuma kwi Yehoba, kabiji kijitu bulongo kutwela mu masongola. Pa kukeba mulongo wa kutwela nanji mu masongola, nyenga wakonsha kulanguluka pa byubilo biji na uno mulongo, byo amweka, byo bamuyuka ku bantu, byo ekala na ba mu kisemi kyanji, byo engijisha mali ne kuyuka inge wamutemwa nangwa ne.b Bino bintu byonse byanema bingi. Nangwa byonkabyo, inge watatu muchima pa bino bintu, ko kuba’mba ubena kumona bintu na meso kechi na lwitabilo ne.

11. Twakonsha kwenda byepi mu lwitabilo pa kusala wa kutwela nanji mu masongola? (1 Kolinda 7:39)

¹¹ Yehoba watemwa bingi bakalume banji balondela mikambizho yanji yaamba pa kusala muntu wa kutwela nanji mu masongola. Balondela mukambizho nabiji waamba’mba bafwainwa ‘kupitaila pa jifumbi ja bwanyike’ saka bakyangye kutendeka kwiyuka na muntu ye bakakeba kutwela nanji mu masongola. (1 Ko. 7:36) Bata muchima pa byubilo Yehoba byo amona kuba’mba byo byafwainwa kwikala na mwanamulume nangwa mwanamukazhi wawama mu masongola. (Maana 31:10-13, 26-28; Efi. 5:33; 1 Timo. 5:8) Inge mwanamulume nangwa mwanamukazhi wabula kamonyi wibafwalama, balondela mukambizho uji pa 1 Kolinda 7:39 wa kuba’mba mwafwainwa kusongolwa nangwa kusongolwa “kanatu monka mwi Nkambo.” (Tangai.) Batwajijila kwenda mu lwitabilo ne kushiinwa’mba Yehoba ukebakwasha kuyuka mwakubila na bijikila byabo.—Sala. 55:22.

12. Ñanyi bintu byo twafunjilako ku byapichilemo nyenga Rosa?

¹² Akilangulukai pa kyamwekejile nyenga Rosa, painiya wikala mu kyalo kya Colombia. Nkito yo aingilanga yamulengelanga kutanwa kimye kyabaya na mwanamulume wabujile kamonyi wa kwa Yehoba wamufwalamine. Kabiji nyenga Rosa naye wamutemenwe. Waambile’mba: “Wajinga muntu wawama bingi muchima. Wakwashanga bingi bantu ba mu kimasamasa mo aikalanga. Wangubilanga bintu byawama. Wajinga na byubilo byo nkeba mu mwanamulume ye nkeba kusongolwako. Kyataminekotu ke kya kuba’mba kechi wajinga kamonyi ne.” Watwajijile kwamba’mba: “Kyankatezhe bingi kukaana mambo namutemenwe bingi. Pa kyokya kimye, naumvwanga bingi mukose mambo nakebeshe kusongolwa, kabiji kechi nakitainepo mulongo mu kipwilo wa kunsongola ne.” Pano bino, nyenga Rosa kechi wateletu muchima pa bintu byo amwenenga na meso ne. Pa kuba walangulukile pa bikekala bulunda bwanji ne Yehoba inge wasongolwa ku muntu wabula kamonyi. Onkao mambo, walekele kwisamba na uno mwanamulume kabiji wateletu muchima pa kwingijila Yehoba. Byo papichile kimye, bamwichile kuya na kutanwa ku Sukulu wa Basapwishi ba Bufumu, kabiji aluno ke painiya wiikajila. Nyenga Rosa waambile’mba: “Yehoba wampesha bingi kabiji nji bingi na lusekelo.” Nangwa kya kuba kyakatazha kwenda mu lwitabilo inge bintu bya uno mutundu bitumwekela, mu kukookela Yehoba mufuma bintu byawama bingi.

INGE TWATAMBWILA MIKAMBIZHO KUFUMA KU JIBUMBA JA LESA

13. Ñanyi bintu byafwainwa kwitulengela kutatu muchima pa bintu byo tumona na meso inge twatambwila mikambizho kufuma ku jibumba ja Lesa?

¹³ Javula tutambula mikambizho kufuma ku bakulumpe mu kipwilo, bakalama ba mwanzo, ku ofweshi wa musampi nangwa ku Jibumba Jitangijila itukwasha kwingijila Yehoba Lesa bulongo. Pano twakonsha kuba byepi inge kechi twaumvwisha mwatala mikambizho yo betupa ne? Twakonsha kutendeka kulanguluka’mba mikambizho yo betupa kechi yayilamo ne. Kabiji twakonsha kutatu muchima pa bumbulwakulumbuluka bwa balongo bapana mikambizho.

14. Ñanyi kintu kiketukwasha kwenda mu lwitabilo inge twatambwila mikambizho kufuma ku jibumba ja Lesa? (Bahebelu 13:17)

¹⁴ Kwenda mu lwitabilo kwitulengela kushiinwa’mba Yehoba ye ubena kutangijila jibumba janji ne kuba’mba aye ye wayuka bishinka byonse. Kino kyafwainwa kwitulengelanga kukookela na muchima yense kabiji kwa kubula kuzhinyazhinya. (Tangai Bahebelu 13:17.) Twayuka’mba kukookela kwitulengela kukwatankana mu kipwilo. (Efi. 4:2, 3) Twayuka’mba nangwa kya kuba balongo betutangijila bambulwakulumbuluka, bino Yehoba witupesha inge ke twibakookele. (1 Sam. 15:22) Twafwainwa kuketekela amba Yehoba ukolola bintu pa kimye kyanji mwine inge ke kikebewe.—Mika 7:7.

15-16. Ñanyi kintu kyakwashishe mulongo umo kutwajijila kwenda mu lwitabilo byo azhinaukilenga mikambizho yafumine ku jibumba ja Lesa? (Monai ne kipikichala.)

¹⁵ Akilangulukai pa kyamwekele kimwesha ene mambo o kyanemena kwenda mu lwitabilo. Mu kyalo kya Peru, nangwa kya kuba bantu bavula bamba mulaka wa Kisipanishi, pano bino bantu bavula bamba ne milaka yapusana pusana iji mu kino kyalo. Umo pa ino milaka ke mulaka wa Quechua. Pa myaka yavula, balongo ne banyenga bakebanga bantu bamba uno mulaka. Nangwa byonkabyo, bapimpwileko mashinda a kusapwilamo pa kuba’mba balondele mizhilo ya kafulumende. (Loma 13:1) Na mambo a kino, bamo balangulukilenga amba luno lupimpu lukalengela mwingilo wa kusapwila kubula kwenda bulongo mu ino nyaunda. Na mambo a kuba’mba balongo ne banyenga bebikileko kulondela luno lupimpu, Yehoba wapesheshe kwibikako kwabo kwa kukeba bantu bamba mulaka wa Quechua.

¹⁶ Mulongo Kevin, mukulumpe mu kipwilo kingijisha mulaka wa Quechua wajinga pa bantu bazhinaukilenga luno lupimpu. Walumbulwile’mba: “Nalangulukilenga’mba, ‘pano tukatana byepi bantu bamba mulaka wa Quechua?’” Mulongo Kevin waubilepo byepi? Waambile’mba: “Navulukile byambo biji pa Byambo bya Maana 3:5. Kabiji nalangulukile ne pe Mosesa. Yehoba wamwambijile kutangijila bena Isalela kwibafumya mu Ijipita. Byo bafikile ku kalunga kachila, bavula balangulukilenga’mba basakwibepaya mambo kechi kwajinga kwa kunyemena ne. Nangwa byonkabyo, Mosesa wakookejile kabiji Yehoba wamupesheshe mu jishinda ja kukumya.” (Lupu. 14:1, 2, 9-11, 21, 22) Onkao mambo, mulongo Kevin walondejile lupimpu lwaambilenga pa jishinda jakatataka ja kusapwilamo. Ñanyi bintu byafuminemo? Waambile’mba: “Nakuminye bingi mambo Yehoba witupesheshe. Kala twaendanga museke walepa bingi pa kubatu amba tutanepo muntu umo nangwa babiji ba kusapwilako bamba mulaka wa Quechua. Pano luno tutatu muchima kwingijila mu nyaunda muji bantu bavula bamba mulaka wa Quechua. Ne kyafumamo, twisamba na bantu bavula, kubwelako ne kutendeka kwibafunjisha Baibolo. Kabiji bantu beya na kupwila babena kuvujilakotu.” Inge ke twende mu lwitabilo, Yehoba uketupesha.

17. Ñanyi bintu byo mwafunda mu uno mutwe?

¹⁷ Twafunda pa byo twafwainwa kutwajijila kwenda mu lwitabilo mu mashinda asatu anema bingi. Kabiji twafwainwa kutwajijila kwenda mu lwitabilo ne mu bintutu bikwabo byo tuba mu bwikalo bwetu nabiji bya kisangajimbwe byo tusala, po twafwainwa kupelela kufunda sukulu wa ku mubiji nangwa kusema baana. Pa kufuukula bintu biji byonse, kechi twafwainwatu kuta muchima pa bintu byo tumona na meso ne. Twafwainwa ne kulanguluka pa bulunda bwetu ne Yehoba, mikambizho yanji ne kuketekela mu mulaye wanji wa kuba’mba uketukwashanga kutaana byo tukeba. Inge twauba bino, “tukendanga mu jizhina ja Yehoba Lesa wetu myaka ne myaka.”—Mika 4:5.