Lombelaingako Bakwenu

1. Twayuka byepi amba Yehoba wanemeka bingi milombelo yetu?

LULOMBELO ke bupe bwanema bingi. Akilangulukaipotu pa kino: Yehoba wapa bamalaika mingilo imo. (Sala. 91:11) Kabiji wapa Mwananji mingilo yanema bingi. (Mat. 28:18) Pano, ibyepi pa mwingilo wa kuteleka ku milombelo? Uno ye mwingilo Yehoba ye abula kupana, ye engila aye mwine. Yehoba ‘Umvwa milombelo,’ aye mwine ye uteleka ku milombelo yetu.​—Sala. 65:2.

2. Tubena kufunjilako ka ku mutumwa Paulo pa kulombelako bakwetu?

² Twakasuluka kulomba kwi Yehoba pa makatazho etu. Pano bino twafwainwa kulombelangako ne bakwetu. Mutumwa Paulo byobyo aubanga. Wanembejile kipwilo kya mu Efisesa amba: “Nemutela kimye kyonse mu milombelo yami.” (Efi. 1:16) Paulo walombelangako ne bapopweshi bakwabo pa muntu pa muntu. Nabiji Timoti wamunembejile’mba: “Namusanchila Lesa, . . . byo mbula kuleka kukuvuluka mu milombelo yami ya misashijilo bufuku ne mute.” (2 Timo. 1:3) Paulo wajinga na makatazho o alombangapo kwi Lesa. (2 Ko. 11:23; 12:7, 8) Nangwa byonkabyo, walombelangako ne bakwabo.

3. Ñanyi bintu byakonsha kwitulengela kulubako kulombelako bakwetu?

³ Kimye kimo twakonsha kulubako kulombelako bakwetu. Mambo ka? Nyenga Sabrinaa waambapo kintu kimo kilengela. Waambile’mba: “Mu ano moba a kupelako twapayankana bingi. Twakonsha kulabikwa na makatazho etu kya kuba ketulombetu pa bintu byo tukeba.” Nanchi ne anweba byo byo kiji nyi? Inge ibyo, uno mutwe usakwimukwasha bingi. Usakulumbulula (1) ene mambo kulombelako bakwetu o kwanemena ne (2) bintu byakonsha kwitukwasha kulombelangako bakwetu.

ENE MAMBO KULOMBELAKO BAKWETU O KWANEMENA

4-5. Kulombelako bakwetu kuji byepi na “bulume”? (Yakoba 5:16)

⁴ Kulombelako bakwetu kuji “bingi na bulume.” (Tangai Yakoba 5:16.) Nanchi kulombelako bakwetu kwakonsha kwibakwasha nyi? Ee kwakonsha. Yesu byo ayukile’mba mutumwa Petelo usakumukaana, waambile’mba: “Nakulombelako kuba’mba lwitabilo lobe lutwajijile kukosa.” (Luka 22:32) Kabiji Paulo naye wayukile buneme bwa kulombelako bakwetu. Byo bamukashile kwakubula mambo mu Loma, Paulo wanembejile Filemonyi amba: “Naketekela namba na mambo a milombelo yenu, bakambwezha kwi anweba.” (File. 22) Ne kya kine kyo kyamwekele. Byo papichile kimye kicheche, Paulo bamufuminye mu kaleya kabiji wabwelele na kusapwila jikwabo.

⁵ ino kechi kibena kulumbulula’mba milombelo yetu ilengela Yehoba kuba kyonse kyo twalomba ne. Yehoba umona bintu bikatazha bakalume banji byo balombapo, kabiji kimye kimo ukumbula kwesakana na byo balomba. Kuyuka bino kwafwainwa kwitulengela kulombanga na mukoyo kwi Yehoba ne kushiila byonse mu maboko anji.—Sala. 37:5; 2 Ko. 1:11.

6. Kulombelako bakwetu kwitukwasha byepi? (1 Petelo 3:8)

⁶ Kulombelako bakwetu kwitulengela kwibobila “kifyele.” (Tangai 1 Petelo 3:8.) Kifyele kitulengela kumona bibena kupitamo bakwetu ne kukebesha kwibakwasha. (Mako 1:40, 41) Mukulumpe mu kipwilo aye Michael waambile’mba: “Inge nalombelako bakwetu pa bintu byo bakajilwa ne makatazho o babena kupitamo, kindengela kuta muchima ku makatazho o babena kupitamo kabiji kino kindengela kwibatemwa bingi. Bulunda bwami ne abo bukoselako bingi nangwa kya kuba abo bene kechi bayuka ne.” Mukulumpe mu kipwilo mukwabo aye Richard waambile pa kintu kikwabo kifumamo. Waambile’mba: “Inge nalombelako bakwetu kindengela kukebesha kwibakwasha.” Kabiji wanungilepo’mba: “Inge nakwasha muntu ye nalombelako, kindengela kumvwa’mba Yehoba wañingijisha kukumbula lulombelo lo nalombele.”

7. Kulombelako bakwetu kwitukwasha byepi kwikala na mweno yawama ya makatazho o tubena kupitamo? (Filipai 2:3, 4) (Monai ne bipikichala.)

⁷ Kulombelako bakwetu kwitukwasha kwikala na mweno yawama ya makatazho o tuji nao. (Tangai Filipai 2:3, 4.) Atweba bonse tubena kupita mu makatazho mambo tubena kwikala mu ntanda mwaangela Diabola. (1 Yoa. 5:19; Lum. 12:12) Kulombelako bakwetu kimye kyonse, kwitulengela kuyuka’mba “bya kumanama bintutu bimo byo bibena kupitamo ne balongo betu bonse baji pano pa ntanda.” (1 Pe. 5:9) Nyenga painiya aye Katherine waambile’mba: “Kulombelako bakwetu kumvululamo kuba’mba nabo babena kupita mu makatazho. Kino kindengela kubula kutatu muchima pa makatazho o mbena kupitamo.”

BO TWAFWAINWA KULOMBELANGAKO

8. Ambaipo bantu bamo bo twakonsha kulombelako.

⁸ Bañanyi bo twafwainwa kulombelangako? Twakonsha kulombelako nabiji aba bakolwakolwa, banyike bo bendeleka pa sukulu ku bakwabo ne babena kupita mu makatazho na mambo a bukote. Balongo ne banyenga bavula babena kuchinchika lumanamo kufuma ku kisemi nangwa ku makafulumende. (Mat. 10:18, 36; Byu. 12:5) Balongo betu bamo basha mazubo abo na mambo a milukuchi ya bumulwila ntanda. Kabiji bakwabo nabo basha mazubo abo na mambo a bya malwa biponakotu bine. Kechi twakonsha kuyuka bano balongo ne banyenga bonse ne. Bino inge ke twibalombeleko, tumwesha’mba tubena kulondela mukambizho wa kwa Yesu wa kuba’mba ‘itemwai anwe bene na bene.’​—Yoa. 13:34.

9. Mambo ka o twafwainwa kulombelangako babena kutangijila mu jibumba ja Yehoba ne bakazhi babo?

⁹ Kabiji twakonsha ne kulombelako babena kutangijila mu jibumba ja Yehoba. Nabiji ba mu Jibumba Jitangijila ne bankwasho babo, ba mu Kavoto ka Musampi, bakalama batangijila mingilo pa maofweshi a musampi, bakalama ba mwanzo, bakulumpe mu kipwilo ne bankwasho. Nangwa kya kuba bano balongo bengila na ngovu mingilo yavula ya kwitukwasha, nabo baji na makatazho o bapitamo. (2 Ko. 12:15) Kalama wa mwanzo aye Mark waambile’mba: “Lukatazho lumo lwambayila bingi ke lwa kwikala kwalepa na bansemi bami bakota. Bonse babiji bakolwakolwa. Nangwa kya kuba babena kwibalamatu bulongo ku nyenga yami ne bamwata wanji, bino kinkola bingi ku muchima mambo kechi nebakwasha byo nafwainwa kwibakwashanga ne.” Kechi twakonsha kuyuka makatazho onse apitamo bano balongo bonse bengila bingi na ngovu ne, pano bino twafwainwa kwibalombelangako. (1 Tesa. 5:12, 13) Kabiji twafwainwa ne kulombelangako bakazhi babo, pa byo bebatundaika mu bukishinka pa kuba’mba bengilenga bulongo mingilo yabo.

10-11. Nanchi milombelo ya kuvwangamo balongo ne banyenga bavula itokesha Yehoba Lesa ku muchima nyi? Lumbululai.

¹⁰ Byonka byo twisambapo kala, tulombelako balongo ne banyenga bavula babena kupita mu bintu byapusana pusana. Kwa kubula kwibatela pa mazhina, twakonsha kulombelako bo bakasa mu tuleya, nangwa bafwisha batemwe babo kuba’mba Yehoba ebatekeneshe. Mukulumpe mu kipwilo aye Donald waambile’mba, “Tuji na balongo ne banyenga bavula babena kupita mu makatazho, onkao mambo pa bimye bimo tulomba milombelo ya kuvwangamo bavula, kubikapotu ne boba babena kumanama.”

¹¹ Nanchi milombelo ya uno mutundu itokesha Yehoba Lesa ku muchima nyi? Ee, mambo kechi twayuka bintu byonse bibena kupitamo balongo ne banyenga ne. Onkao mambo, kyayilamo kulomba milombelo ya kuvwangamo balongo ne banyenga bavula babena kupita mu bintu byapusana pusana. (Yoa. 17:20; Efi. 6:18) Milombelo ya uno mutundu imweshatu patoka kuba’mba twatemwa “balongo bonse mwaya ntanda.”​—1 Pe. 2:17.

LOMBELAINGAKO BAKWENU PA MUNTU PA MUNTU

12. Kuyuka bibena kupitamo balongo ne banyenga kwitukwasha byepi kushinkamika milombelo yetu?

¹² Yukainga byo babena kupitamo. Kununga pa kulomba milombelo ya kuvwangamo balongo ne banyenga bavula, twafwainwa ne kwibalombelangako pa muntu pa muntu ne kwibatela pa mazhina. Nanchi mu kipwilo mwenu mujipo ubena kukolwa kikola kibula kupwa nyi? Nanchi mujipo mwanyike walefulwa na mambo a bintu byo abena kupitamo ku sukulu nyi? Nanchi mujipo nsemi uji bunke ubena kwibikako kukomesha baana banji, “kwibajimuna ne kwibafunjisha maana a Yehoba nyi”? (Efi. 6:4) Kuyuka byo babena kupitamo kukemulengelanga kubila kifyele bakwenu, kabiji kino kikemulengelanga kukebesha kwibalombelako.b​—Loma 12:15.

13. Twakonsha kulombelako byepi balongo ne banyenga bo twabula kuyuka?

¹³ Batelainga pa mazhina pa kwibalombelako. Pa kulomba, twakonsha kutela pa mazhina ne bo tukyangye kumonañanapo nabo. Akilangulukai pa balongo bo bakasa mu kaleya mu byalo nabiji Crimea, Eritrea, Russia ne Singapore. Inge mwaya pa jw.org, mukataanapo mazhina a bano balongo ne banyenga baji mu tuleya.c Kalama wa mwanzo aye Brian waambile’mba: “Kunemba mazhina a bena Kilishitu bakwetu bo bakasa mu kaleya ne kwibatela na jiwi jasansuka, kunkwasha kwibavuluka ne kwibatela pa mazhina pa kwibalombelako.”

14-15. Ñanyi bintu byo twafwainwa kuba pa kuba’mba tushinkamikenga milombelo yetu?

¹⁴ Shinkamikainga milombelo yenu. Mulongo Michael ye twaji kwambapo waambile’mba: “Inge mbena kutanga pa jw.org mashimikila aamba pa balongo bo bakasa mu tuleya, mfwanyikizha byo nakonsha kumvwa inge yami mbena kupita mu ano makatazho. Nayuka kuba’mba nakonsha kulangulukanga bingi pa bakazhi bami, kabiji nakonsha kukebeshanga bingi kuyuka inge baji na byonse bibena kukebewa mu bwikalo. Kuba bino kunkwasha kuyuka bya kwambapo pa kulombelako balongo basongola baji mu tuleya.”​—Hebe. 13:3, tubyambo twa munshi.

¹⁵ Kulanguluka pa bibena kwikala balongo ne banyenga bo bakasa mu tuleya kwakonsha kwitukwasha kuyuka ne bintu bikwabo byo babena kupitamo ne kushinkamika milombelo yetu pa kwibalombelako. Twakonsha kulomba kuba’mba bakasopa ba mu kaleya bebobilenga lusa, ne ba luusa ba mu kafulumende baswishenga balongo ne banyenga kupopwela Lesa saka bakasuluka. (1 Timo. 2:1, 2) Twakonsha ne kulomba kuba’mba bukishinka bwa balongo bo bakasa mu tuleya butundaike balongo ne banyenga bashala mu kipwilo mo bafuma, nangwa kuba’mba byubilo byawama bya bano balongo ne banyenga bo bakasa mu tuleya bilengele bantu babula kupopwela Lesa babena kwibamona kuteleka ku mambo awama. (1 Pe. 2:12) Bino byobyo twafwainwa kuba ne pa kulombelako balongo ne banyenga babena kupita mu makatazho apusana pusana. Inge twayuka byo babena kupitamo, kwibatela pa mazhina pa kwibalombelako, ne kushinkamika milombelo yetu, tumwesha’mba ‘butemwe bo twitemwa atwe bene na bene bwabaya.’​—1 Tesa. 3:12.

IKALAI NA MWENO YAWAMA YA MILOMBELO

16. Twakonsha kwikala byepi na mweno yawama ya milombelo yetu? (Mateo 6:8)

¹⁶ Byonka byo twisambapo kala, kulombelako bakwetu kwakonsha kwibakwasha mu makatazho o babena kupitamo. Nangwa byonkabyo, twafwainwa kwikala na mweno yawama ya milombelo yetu. Inge tubena kulomba kechi tubuula Yehoba bintu byo abula kuyuka ne, kabiji kechi tumubuula jishinda jawama ja kupwishishamo lolo lukatazho ne. Yehoba uyukila jimo bintu bikeba bakalume banji saka bakyangyetu ne kuyuka abo bene. (Tangai Mateo 6:8.) Pano mambo ka a kulombelako bakwetu? Kununga pa bishinka byo twisambapo mu uno mutwe, kuba bino kumwesha ne byo twata bakwetu muchima. Kutemwa bakwetu ko kwitulengela kwibalombelako. Kabiji Yehoba umvwa bingi bulongo inge bakalume banji kebamweshe butemwe bo ajipo nabo.

17-18. Twakonsha kulumbulula byepi milombelo yo tulombelako bakwetu ba mu lwitabilo?

¹⁷ Nangwa kya kuba kafwako byakonsha kufuma mu milombelo yo twalomba ne, bino kulomba kumwesha’mba twatemwa bingi balongo ne banyenga, kabiji Yehoba umona kino. Pa kuba’mba tumvwishe kishinka, twayai twambe bino: Fwanyikizhai kisemi kiji na baana babacheche babiji, wamulume ne wamukazhi. Wamulume wakolwa bingi. Mwanabo wamukazhi watendeka kusashijila bashanji amba: “Napopwela, mukwashai kolojami, wakolwa bingi!” Bashanji uno mwana bayuka bya kuba, kabiji batemwa bingi mwanabo wakolwa ne kumuta muchima. Nangwa byonkabyo, bashanji, bomvwa bingi bulongo pa kumona mwanabo wamukazhi byo ata muchima kolojanji, kya kuba wibasashijila ne kumukwasha.

¹⁸ Kyo kimotu, ne Yehoba byobyo akeba’mba tubenga. Ukeba’mba twitenga muchima atwe bene na bene ne kwilombelako. Inge ke tube bino, milombelo yetu ikamweshanga’mba kechi twitatu muchima atwe bene ne, pa kuba twata ne muchima bakwetu. Kabiji Yehoba umona kino. (2 Tesa. 1:3; Hebe. 6:10) Kabiji byonka byo twisambapo, milombelo yetu bimye bimo yakonsha ne kukwasha bakwetu mu makatazho o babena kupitamo. Onkao mambo, kimye kyonse tuvulukenga kulombelako bakwetu.