Balongo Babiji Banungwako ku Jibumba Jitangijila

PA 5 OCTOBER 2024, pa kupwila kwa pa mwaka kwajinga kya kubijika kyanema bingi. Mulongo Jody Jedele ne mulongo Jacob Rumph bebatongwele kwikala mu Jibumba Jitangijila ja Bakamonyi ba kwa Yehoba. Bano balongo baingijila Yehoba mu bukishinka pa myaka yavula bingi.

Mulongo Jedele wasemekelwe mu Missouri mu U.S.A. Kabiji bamukomeshe ku bansemi bajinga mu bukine. Baikalanga mu mpunzha yo babulanga kusapwilamo javula. Onkao mambo, bamonañananga na balongo bavula bingi bafumanga mu mapunzha apusana pusana mu kino kyalo baiyanga na kusapwila mambo awama. Butemwe ne kukwatankana kwajinga na bano balongo kwibatundaikile bingi. Mulongo Jedele wabatizhiwe saka ajitu mwanyike pa 15 October, 1983. Na mambo a kuba’mba mwingilo wa kusapwila wamuletelanga bingi lusekelo, byo apwishishe sukulu watendekele mwingilo wa bupainiya bwa kimye kyonse mu September 1989.

Mulongo Jedele byo ajinga mwanyike, bansemi banji bebasendanga aye ne nyenga yanji kuya na kufwakasha pa Betele. Kwibasenda kuya na kufwakasha pa Betele kwibalengejile kwibikila kikonkwanyi kya kwingijila pa Betele kabiji mu kuya kwa moba bonse babiji bafikizhe kikonkwanyi byabo. Mulongo Jedele wayile pa Betele wa ku Wallkill mu September 1990. Patanshitu bamupele mwingilo wa kwingijila mu Dipatimenti wa Butooto kabiji palutwe kacheche watendekele kwingijila mu Dipatimenti Itala pa Bakolwa.

Pa kyonkakya kimye, bipwilo byajinga kipikipi byaingijishanga mulaka wa Kisipanishi byavujijilengako kabiji kwakebewenga balongo bakutangijila. Onkao mambo, mulongo Jedele wavilukijile mu kipwilo kimo kyaingijishanga mulaka wa Kisipianishi ne kutendeka kufunda uno mulaka. Palutwe kacheche, wamonañene na nyenga Damaris waingijilenga mwingilo wa bupainiya mu yenka uno mwanzo. Mu kuya kwa moba, besongwele kabiji batendekele kwingijila pamo pa Betele.

Mu 2005, bafumine pa Betele pa kuba’mba baye na kulama bansemi babo. Byo bayile, bonse babiji batendekele kwingila mwingilo wa bupainiya bwa kimye kyonse. Mulongo Jedele wafunjishanga mu Sukulu wa Mwingilo wa Bupainiya, kabiji wajinga mu Kavoto Kesamba na Badokotala mu Kipatela ne mu Kavoto ka Bantungi ba Mpunzha.

Mu 2013, Mulongo ne Nyenga Jedele bebechile jikwabo ku Betele na kwingila mwingilo wa kushimika wajinga ku Warwick. Kufuma kokwa, bayile na kwingijila ku Patterson ne ku Wallkill. Mulongo Jedele waingijijile mu Dipatimenti wa Local Design/Construction ne mu Dipatimenti Ipana Mabulañano a bya mu Bipatela. Mu March 2023, bamutongwele kwikala nkwasho ku Kavoto Katala pa Bibena Kwenda Mwingilo. Inge walanguluka pa mingilo yapusana pusana yo aingila, waambile’mba: “Inge bakupa mingilo ya katataka, pa bimye bimo wakonsha kwikala bingi na moyo. Nangwa byonkabyo, kino kyo kimye kyawama kuketekela mwi Yehoba mambo ye witukwasha kwingila mingilo yonse yo etupa.”

Mulongo Rumph wasemekejilwe mu muzhi wa California mu U.S.A. Byo ajinga mwanyike, bainanji kechi batanwanga ku kupwila nangwa kusapwila ne. Pano bino bebikileko bingi kumufunjisha bukine bwa mu Baibolo. Kabiji pa mwaka pa mwaka, wayanga na kufwakesha bankambo yanji baingijilanga Yehoba mu bukishinka. Bano bankambo yanji bamukwashishe kwikala na kizaku kya kukeba kufunda bukine, kabiji byo afikizhe myaka 13 walombele kuba’mba bamufunjishenga Baibolo. Pa 27 September 1992, wabatizhiwe saka akijitu mwanyike. Bainanji batendekele kusapwila jibiji ne kutaanwa ku kupwila kabiji kisemi kyonse kyayijilengako palutwe kabiji pa kupitapo moba babatizhiwe.

Saka akijitu mwanyike, Mulongo Rumph wimwenanga bapainiya byo bajinga na lusekelo. Onkao mambo, byo apwishishe sukulu, watendekele mwingilo wa bupainiya mu September 1995. Mu 2000, wayile na kwingijila kwakepa basapwishi ba Bufumu mu kyalo kya Ecuador. Akwa wamonañene na nyenga painiya wa ku kyalo kya Canada kabiji mu kuya kwa moba besongwele. Panyuma ya kwisongola, batendekele kwingijila mu muzhi wa mu Ecuador mwajinga jibumba jicheche ja basapwishi. Lelo jino, basapwishi bavujilako bingi mu kino kipwilo.

Kabiji pa kupitapo moba, Mulongo ne Nyenga Rumph bebatongwele kwikala bapainiya beikajila kabiji palutwe kacheche batendekele kwingila mwingilo wa mu mwanzo. Mu 2011, bebechile kuya na kutanwa ku Sukulu wa Gileada wa nambala 132. Byo bapwishishe uno sukulu, baingijijile mu byalo bitanu ne kwingila mingilo yapusana pusana nabiji kwingijila pa Betele, mwingilo wa bumishonale ne kwingijila mu mwanzo. Kabiji Mulongo Rumph wafunjishanga ne mu Sukulu wa Basapwishi ba Bufumu.

Na mambo a mwalo wa COVID-19, Mulongo ne Nyenga Rumph babwelele ku United States. Bebechile pa Betele wa ku Wallkill kuba’mba Mulongo Rumph bakamufunjishe mingilo ya mu Dipatimenti Utala pa Bibena Kwenda Mwingilo. Byo papichile kimye, bebatumine kubwela pa musampi wa mu Ecuador kabiji Mulongo Rumph waingijijilenga mu Kavoto ka Musampi. Mu 2023, Bebatumine kuya ku Warwick. Mu January 2024, Mulongo Rumph bamutongwele kwikala nkwasho ku Kavoto Katala pa Bibena Kwenda Mwingilo. Inge walanguluka pa konse ko bamutumine kuya na kwingijila, waambile’mba: “Kilengela mwingilo kunema kechi mpunzha ne, bino ke bantu bo ubena kukwasha.”

Tubena kwibasanchila bingi bano balongo pa byo bengila na ngovu kabiji tusakutwajijila ‘kunemeka bantu ba uno mutundu.’​—Fili. 2:29.