“Wi Muntu Wanemekwa Bingi”!

1-2. Ñanyi bintu byakonsha kwitukwasha kushiinwa’mba Yehoba witunemeka bingi?

YEHOBA wanemeka bingi bakalume banji. Nangwa byonkayo, bamo balanguluka’mba Yehoba kechi wibanemeka ne. Kampe mambo bantu kechi bebanemeka ne. Nanchi ne anweba byo byo mulanguluka nyi? Umvwe ibyo, ñanyi bintu byakonsha kwimukwasha kushiinwa’mba Yehoba wimunemeka bingi?

² Kulanguluka pa mashimikila a mu Baibolo asolola Yehoba byo akeba’mba tumonenga bantu kwakonsha kwimukwasha bingi. Mwananji, aye Yesu wanemekele bingi bantu kabiji wibobilanga lusa. Byo amonanga bantu bimweshatu patoka kuba’mba aye ne Shanji banemeka bantu balanguluka’mba kechi banema ne. (Yoa. 5:19; Hebe. 1:3) Mu uno mutwe tusakwisamba: (1) Yesu byo akwashanga bantu kuyuka’mba Yehoba wibanemeka bingi ne (2) bintu byakonsha kwitulengela kushiinwa’mba Lesa witunemeka bingi.​—Hagai 2:7.

YESU BYO AKWASHANGA BANTU KUYUKA’MBA YEHOBA WIBANEMEKA

3. Yesu waubilenga byepi na bena Ngalilea baishilenga kwi aye kuba’mba ebakwashe?

³ Yesu byo asapwijilenga mu Ngalilea pa lwendo lwanji lwa busatu, bantu baishilenga kwi aye kufuma mu mapunzha apusana pusana na kuteleka byo afunjishenga ne kwibabuka bikola byo bajinga nabyo. Yesu wamwenenga ‘byo basubakenenga ne kupelelwa nobe mikooko yabula kafunga.’ (Mat. 9:36) Bano bantu bebalengulwile bingi ku bantangi babo ba bupopweshi kabiji bebamonanga’mba “bantu bafingwa.” (Yoa. 7:47-49) Pakuba Yesu wibanemekele bingi mambo wifunjishanga ne kwibabuka bikola byapusana pusana byo bajinga nabyo. (Mat. 9:35) Kabiji na mambo a kuba’mba wakebelenga kukwasha bantu bavula, Yesu wafunjishe batumwa ne kwibatuma kuya na kusapwila mambo awama, kabiji wibapele ne bulume bwa kubuka bikola ne bulema bwapusana pusana.​—Mat. 10:5-8.

4. Tubena kufunjilako ka kwi Yesu byo aubanga na bantu bo balengulwile?

⁴ Yesu byo anemekanga ne kubila lusa bantu baiyanga kwi aye, wamweshanga aye ne Shanji byo banemekele bingi bantu bo balengulwile mu kimasamasa. Inge mwingijila Yehoba bino muzhinauka’mba kechi mwanema ne, langulukainga pe Yesu byo atele muchima bantu bo balengulwile baiyanga kwi aye kuba’mba ebafunjishe. Kulanguluka pa kino kukemukwasha kushiinwa’mba Yehoba wimunemeka bingi.

5. Lumbululai byajinga bwikalo bwa mwanamukazhi Yesu ye ataaine ku Ngalilea.

⁵ Yesu kechi wafunjishangatu mabumba a bantu ne, bino watanga ne muchima bantu pa muntu pa muntu. Byo ajinga mu mwingilo wa kusapwila mu Ngalilea, wataaine mwanamukazhi wakolelwe kikola kyakatazha kya kupita mashi pa myaka 12. (Mako 5:25) Na mambo a kuba’mba kino kikola kyamulengejile kwikala wa muzhilo, yense wamukwatanga naye waikalanga wa muzhilo. Onkao mambo, kino kyafwainwa kyamulengelanga kwikalatu kwa bunke pa bimye byavula. Kabiji kino kyamulengelanga kubula kuya ku nshinagoga na kupopwela Yehoba nangwa kutanwa ku bijiilo. (Levi 15:19, 25) Kwambatu kine, uno mwanamukazhi wajinga bingi na binyenge mambo walangulukanga’mba kechi wanema ne.​—Mako 5:26.

6. Mwanamukazhi wajinga na kikola kya kupita mashi wabukilwe byepi?

⁶ Uno mwanamukazhi wamanamine bingi wakebelenga Yesu kumubuka. Bino kechi walombele’mba amonañane ne Yesu ne. Mambo ka? Kyamweka waumvwine bumvu na mambo a kikola kyo ajinga nakyo. Nangwa kampe wachiinenga’mba Yesu usakumukaina mambo watwelele mu jibumba ja bantu saka aji wa muzhilo. Onkao mambo, wakwachiletu ku kivwalo kya kwa Yesu kyo avwajile peulu, mambo washiinwe’mba inge obe bino usakubukwa. (Mako 5:27, 28) Ne kya kine wabukilwe byonkatu byo aitabijile. Yesu byo aipwizhe kukeba kuyuka wamukwata, uno mwanamukazhi wisolwele ne kulumbulula byo aubile. Pano Yesu waubile byepi?

7. Yesu waubile byepi na uno mwanamukazhi wapelejilwe bingi? (Mako 5:34)

⁷ Yesu wanemekele uno mwanamukazhi ne kumubila lusa. Yesu wamwene kuba’mba uno mwanamukazhi “waakaminwe ne kuzakama.” (Mako 5:33) Onkao mambo, wamwambijile na kifyele ne kumutundaika. Wamwambijile ne kuba’mba “mwanami.” Yesu byo aingijishe kino kyambo kechi wamwesheshetu’mba wamunemeka ne, bino wamubijile lusa ne kumwesha byo amutemwa. (Tangai Mako 5:34.) Kino kyo kimyetu kyanembwa mu Baibolo Yesu po atelele mwanamukazhi amba ‘mwanami.’ Wafwainwa waingijishe kino kyambo kya kifyele mambo wamwene’mba uno mwanamukazhi waumvwine bingi moyo. Akifwanyikizhai byaumvwine uno mwanamukazhi! Inge Yesu kechi waambile byambo bya kumutekenesha ne, uno mwanamukazhi nangwa kya kuba wabukilwe, wakonsheshe kutendeka kwizhachisha bingi pa kyo aubile. Pakuba Yesu walengejile uno mwanamukazhi kushiinwa amba wajinga mwanamukazhi wanemekwa bingi kwi Shanji wa mwiulu.

8. Ñanyi makatazho apichilemo nyenga wa ku kyalo kya Brazil?

⁸ Ne mu ano moba bakalume ba Yehoba bamo bakolwa bikola bibalengela kupelelwa bingi ne kumona’mba kechi banema ne. Nyenga Maria,a painiya wa mu kyalo kya Brazil wasemenwetu kilema kwa kubula maboko ne maulu. Walumbulwile’mba: “Pa sukulu bansekanga bingi kabiji bantumbanga ne mazhina a bisela. Kabiji nangwatu mu kisemi bandengulwile bingi.”

9. Ñanyi kintu kyakwashishe Maria kuyuka’mba Yehoba wamunemeka bingi?

⁹ Ñanyi kintu kyakwashishe Maria? Byo aikele Kamonyi wa kwa Yehoba, bakwabo ba mu lwitabilo bamutekeneshe ne kumukwasha kutendeka kwimona aye mwine byonka byamumonanga Yehoba. Waambile’mba: “Balongo ne banyenga bavula bankwasha bingi, kabiji ne bya kwamba mfwabyo. Nsanchila Yehoba kufuma panshi ya muchima pa kumpa kino kisemi kya ku mupashi.” Balongo ne banyenga bakwashishe Maria kuyuka’mba Lesa wamunemeka bingi.

10. Ñanyi makatazho apichilengamo Maliya Mangadala? (Monai ne bipikichala.)

¹⁰ Akilangulukai pe Yesu byo akwashishe Maliya Mangadala. Wajinga na bandemona batanu na babiji. (Luka 8:2) Na mambo a kino, kyamweka waubanga bintu byabula kuyilamo, kabiji bantu bavula bamuchinuzhukanga. Byo apichilenga mu luno lukatazho, kyamweka walangulukanga’mba bantu kechi bamutemwa ne, kabiji wapelejilwe bingi. Yesu wapangile bandemona mwi aye kabiji waikele mwananji wa bwanga wakishinka. Mu ñanyi jishinda jikwabo Yesu mo akwashishe Maliya Mangadala kuyuka’mba Lesa wamunemekele bingi?

11. Yesu wamwesheshe byepi amba Lesa wanemekele Maliya Mangadala? (Monai ne bipikichala.)

¹¹ Yesu waichile Maliya Mangadala kuya nanji mu mwingilo wa kusapwila.b Onkao mambo, watwajijile kufunjilapo byavula byo aumvwanga Yesu na kufunjisha bantu. Kabiji Yesu wamwekele ne kwi aye pa juba jo bamusangwile. Wajinga pa baana ba bwanga batanshi Yesu bo esambile nabo pa joja juba. Kabiji Yesu wamutumine ne kuya na kubuula baana banji ba bwanga bakwabo kuba’mba bamusangula. Kino kimweshatu patoka kuba’mba Yehoba wamunemekele bingi.—Yoa. 20:11-18.

12. Lumbululai nkomeno ya kwa Lidia byo yamulengelanga kulanguluka’mba kechi wanema ne.

¹² Byonka byo kyajinga kwi Maliya Mangadala, ne mu ano moba bavula balanguluka’mba kechi banema ne. Nyenga Lidia, wa ku kyalo kya Spain waambile’mba saka akyangyetu ne kusemwa bainanji bakebelenga kufumya jivumo. Byo ajinga mwanyike, uvuluka bainanji byo bamushintaukilanga ne kubula kumuta muchima. Waambile’mba: “Kintu kyo nakebeshanga mu bwikalo bwami ke kuntemwa ku bakwetu. Nalangulukanga’mba kafwako wakonsha kuntemwa ne, mambo bamama bandengejile kushiinwa’mba najinga muntu watama.”

13. Ñanyi bintu byalengejile Lidia kuyuka’mba Yehoba kine wamunemeka bingi?

¹³ Lidia byo afunjile bukine, kulomba ne lufunjisho lwa pa bunke ne byambo byawama byamwambilanga bakwabo ba mu lwitabilo byamukwashishe kushiinwa’mba Yehoba kine wamunemeka bingi. Waambile’mba: “Bamwatawami javula bambula’mba bantemwa bingi. Javula bansanchila pa byubilo byami byawama. Kabiji ne balunda nami bavula byobyo boba.” Nanchi kujipo muntu ye mwakonsha kukwasha kuyuka’mba Yehoba wamunemeka bingi nyi?

BINTU BYAKONSHA KWITUKWASHA KWIMONA BYONKA BITUMONA YEHOBA

14. Kinembelo kya 1 Samwela 16:7 kitukwasha byepi kuyuka Yehoba byo amona bantu? (Monai ne kakitenguluzha ka kuba’mba, “Mambo ka Yehoba o Anemekela Bantu Banji?”)

¹⁴ Vulukainga’mba Yehoba kechi wimumona byonka bimumona bantu ba mu ino ntanda ne. (Tangai 1 Samwela 16:7.) Yehoba kechi wimunemeka na mambo a mwekelo yenu, biji bwikalo bwenu nangwa po mwafika kufunda sukulu ne. (Isa. 55:8, 9) Onkao mambo, imonainga byonka Yehoba byo emumona, kechi bimumona bantu ba mu ino ntanda ne. Kutanga mashimikila a mu Baibolo aamba pa bantu belengulwile Yehoba bo anemekele nabiji Elaija, Naomi ne Hana kukemukwasha bingi. Mwakonsha ne kunemba byo mwapitamo bimwesha’mba Yehoba wimutemwa bingi ne kwimunemeka. Kabiji mwakonsha ne kutanga mu mabuku etu pa mutwe waamba pe Yehoba byo anemeka bantu belengulula.c

15. Mambo ka Yehoba o amwenanga Danyela amba “muntu wanemekwa bingi”? (Danyela 9:23)

¹⁵ Yukai’mba bukishinka bwenu bo bulengela Yehoba kwimunemeka bingi. Pa kimye kimo Danyela saka aji na myaka kukila pa 90, walefwilwe ne “kukokatu zubulu.” (Da. 9:20, 21) Yehoba wamutundaikile byepi? Lesa watumine malaika Ngabaliela kuya na kuvululamo Danyela kuba’mba wajinga “muntu wanemekwa bingi” kabiji amba milombelo yanji yakumbulwa. (Tangai Danyela 9:23.) Ñanyi bintu byalengejile Danyela kunemekwa bingi kwi Lesa? Kutemwa bololoke ne bukishinka bwanji byo bintu bimo byalengejile Lesa kunemeka bingi Danyela. (Ezi. 14:14) Yehoba wabikile jino jishimikila mu Mambo anji kuba’mba jitutekeneshenga. (Loma 15:4) Ne anweba, Yehoba umvwa milombelo yenu kabiji wimunemeka bingi mambo mwatemwa kuba byawama kabiji mumwingijila mu bukishinka.​—Mika 6:8, tubyambo twa munshi; Hebe. 6:10.

16. Ñanyi bintu byakonsha kwimukwasha kushiinwa’mba Yehoba Shenu wimutemwa?

¹⁶ Monainga Yehoba amba Shenu wimutemwa bingi. Ukeba kwimukwasha, kechi kukebatu byatama mwi anweba ne. (Sala. 130:3; Mat. 7:11; Luka 12:6, 7) Kulanguluka pa kino kishinka kwakwasha bavula balanguluka’mba kechi banema ne. Akilangulukai pa byapichilemo Michelle, nyenga wa ku kyalo kya Spain walangulukanga’mba kechi wanema ne, kabiji kafwako wamutemwa ne, na mambo a byambo byatama byamwambilanga bamwatawanji pa myaka yavula. Waambile’mba: “Inge natendeka kulanguluka’mba kechi nanema ne, mfwanyikizha Yehoba saka ansenda mu maboko anji na mambo a kuntemwa ne kukeba kunzhikijila.” (Sala. 28:9) Nyenga Lauren wa ku kyalo kya South Africa uvuluka’mba, “Inge Yehoba wankokejile kwi aye na mizhinge ya butemwe, kabiji wandama pa myaka yavula ne kuñingijisha kufunjisha bantu, ko kuba’mba wannemeka bingi.”​—Ho. 11:4.

17. Ñanyi bintu byakonsha kwimulengela kushiinwa’mba Yehoba wimutemwa? (Salamo 5:12) (Monai ne kipikichala.)

¹⁷ Shiinwai kuba’mba Yehoba wimutemwa. (Tangai Salamo 5:12.) Mfumu Davida waesakenye butemwe bwa Yehoba ku “jikebo jikatampe” jizhikijila bantu banji baoloka. Kuyuka’mba Yehoba wimutemwa kukemukwasha kuleka kulanguluka’mba kechi mwanema ne. Pano mwakonsha kushiinwa byepi amba Yehoba wimutemwa? Byonka byo twafunda, Yehoba wimukwasha kuyuka’mba wimutemwa kupichila mu Mambo anji. Kabiji wingijisha bakulumpe mu kipwilo, balunda nenu ne bantutu bakwabo kwimuvululamo kuba’mba mwanema bingi kwi aye. Pano mwafwainwa kuba byepi inge bakwenu bemwambila byambo bya kwimutundaika?

18. Mambo ka o mwafwainwa kuswilanga inge bemwambila byambo bya kwimutundaika?

¹⁸ Kange mukanenga inge bemwambila byambo bya kwimutundaika ku bakwenu bemutemwa kabiji bemuyuka bulongo ne. Vulukainga’mba Yehoba wakonsha kwibengijisha kwimulengela kuyuka’mba wimutemwa bingi. Nyenga Michelle ye twaji kwambapo waambile’mba: “Mbena kufunda pachepache kuswa inge bakwetu bansanchila. Kechi kyapela ne, bino nayuka’mba Yehoba byobyo akeba’mba ngubenga.” Kabiji nyenga Michelle usanchila bakulumpe mu kipwilo pa byo bamukwasha kuyuka’mba Yehoba wamutemwa. Luno ubena kwingila mwingilo wa bupainiya kabiji wipana kwingilako ne mingilo imo ya pa Betele pa moba amo.

19. Mambo ka o mwafwainwa kushiinwa’mba Lesa wimunemeka?

¹⁹ Yesu wituvululamo kuba’mba twanema kwi Shetu wa mwiulu. (Luka 12:24) Onkao mambo, twafwainwa kushiinwa’mba Yehoba witunemeka bingi. Twafwainwa kuvulukanga kino kishinka kimye kyonse. Twayai tutwajijile kukwasha bakwetu kushiinwa’mba Lesa wibanemeka bingi.