“Twatemwa Bingi TV wa JW!”

PA 6 October 2014, bashinkwile TV wa Kizungu wa JW.a Kufuma mu August 2015, mitanchi ya pa uno TV beituntulula mu milaka kukila pa 70 pa kuba’mba balongo ne banyenga bamwenemo byavula. Bantu bavula mwaya ntanda baamba byambo byawama bingi bya kusanta pa uno TV wa katataka. Kyajinga byepi pa kulenga uno TV wa JW?

Bakebele mpunzha yawama kwa kwiishimikila. Ku ofweshi mukatampe wa ntanda yonse wa Bakamonyi ba kwa Yehoba mu Brooklyn ku New York, basajile kishimikwa kyaikela ku 30 Columbia Heights. Mu mulungutu umo, bawamishe kishimikwa kabiji Dipatimenti Utala pa bya Kuwamisha watendekele kunengezha mpunzha pa kubika TV, aku jibumba saka jilenga pa kumubikila. Balongo ne banyenga bavula bafumine mu United States baingijile moba avula kulenga mwa kufyatwila, ne kulangulukapo mashinda a kumushimikilamo bukiji. Bya kukeba keba bisenda bañondo bavula, bebingijiletu mu moba acheche kabiji Dipatimenti Upota bya Kupotapota ponkapotu wapotele bipe byavula bya kwingijisha.

Babikile ntambo yavula pamo, kabiji jibumba janengezhe kuba’mba biñambañamba byonse bingijilenga pamo bulongo. Pa kikye kimye, jibumba jetu ja banyimbi pamo na balongo ne banyenga bafumine mu byalo byapusana pusana bajinga ku Patterson na kunengezha lwimbo wa pa uno TV ne nyimbotu ikwabo. Banembele lwimbo pa mapepala ne kupitulukamo, kabiji balongo bayuka bya kufyatula nyimbo ba pa Brooklyn, Patterson ne Wallkill ne byalotu bikwabo mwaya ntanda baingijile pamo pa kufyatula vidyo. Byo bapwishishe kulenga mwa kufyatwila, basokankanya ne biñambañamba, batendekele kufyatula mavidyo atanshi.

Byo twaipwizhe muntu wayuka kulenga mwa kufyatwila kuba’mba etubuuleko moba akapitapo kupwisha kulenga, aye waambile’mba pafwainwa kupita mwaka umo ne kichika. Pakuba balongo ne banyenga baingijiletu mu bañondo babiji!

Mwafuma bintu byawama bingi! Mutanchi yense ulupuka pa ñondo pa ñondo, bamubikapo pa Kimo pa juba jitanshi mu ñondo, kabiji bantu bavula bamutamba bimye byavula pa ñondo pa ñondo. Kabiji kuvwangakotu ne mavidyo akwabo beatamba bimye byavula pa ñondo pa ñondo.

Bantu ba Yehoba bomvwa byepi ku muchima pa luno lunengezho lwa katataka? Abino byo bintu bimo byaambapo bantu bamo kumwesha kusanta:

• “Ajino jo juba jawamine bingi mu bwikalo bwami! Amiwa ne mukazhami byo twatambile mutanchi wa May 2015 pa TV wa JW, twatemenwe bingi. Abwe ke bupe bwanema bingi bwampa Yehoba. Twasanchila Jibumba Jitangijila ne balongo ne banyenga bonse baingijile na ngovu pa kunengezha uno mutanchi wawama.”—Indonesia.

• “Katatakatu balongo bavula po batendeka kumona balongo ba mu Jibumba Jitangijila na kwamba majashi. Aluno kechi twibomvwatu ne, bino twibamona. Pano luno po po twayuka bulongo biji balongo ba mu Jibumba Jitangijila ne balongo betu bonse mwaya ntanda.”—Kenya.

• “Na mambo a kuba bamwatawami kechi bapwila ne, kinkatazha bingi kwikala na kupopwela kwa kisemi na baana bami babiji. Awe mutanchi wankwasha bingi. Wandengela kuyuka’mba nji mu jino jibumba ja Lesa kabiji untundaika bingi amiwa ne baana bami. Kine, abuno ke bupe bwafuma kwi Yehoba.”—Britain.

• “Twatemwa bingi TV wa JW! Milombelo yetu beikumbwile kimye uno mutanchi kyo bamutuntulwile mu milaka ikwabo. Kitutundaika bingi kwimumona anweba balongo byo mwikala na lusekelo, kifyele ne byo mwatangizhako kwingijila Yehoba. Kufumatu kimye kyatendekele uno TV wa JW, tumvwa’mba pano tuji mu jibumba ja Yehoba jawama kukila byo kyajinga kala.”—Czech Republic.

• “Kuteleka ku majashi amba balongo ba mu Jibumba Jitangijila mu mulaka wami, kwandengela kufwenya kwipi ne Yehoba.”—Brazil.

• “Naingijila Yehoba pa myaka 16, bino lusekelo lo nji nalo luno, lujitu nobe lo najinga nalo kimye kyo nabatizhiwe. Nemusanchila bingi balongo pa kushinkula TV wa JW.”—Brazil.

Na bukwasho bwa Yehoba, twaketekela kuba’mba TV wa JW usakutwajijila kukosesha bulunda bwetu ne Lesa ne na balongo betu mwaya ntanda yonse, ne kutwajijila kutota ne kutumbijika Yehoba.