Nkalata Yafuma ku Jibumba Jitangijila

Ku Balongo ne Banyenga:

Ngauzhi Isaya waambile’mba, Yehoba ye wakwashishe Bufumu bwa Yuda kwingila bulongo ne kwikala na bintu byawama. Pa Isaya 26:12, aye waambile’mba: “Anweba Yehoba, . . . bintu byonse byo twauba yenu mwitukwasha kuba’mba twibyube.” Kulanguluka languluka pa bintu byawama byo twaingijile mwaka wapwa wa mwingilo, kwitulengela kuswa byaambile Isaya. Kine, Yehoba ubena kuba ‘bintu bya kukumya byo akyangye kubapo!’ (Lupu. 34:10) Akilangulukai pa bintu byawama byo etubila.

Tubena kwingijisha bingi bulongo keyala wetu wa jw.org. Uno keyala uji mu milaka kukila pa 600, kabiji twakonsha kutanga ne kukopolola mabuku mu milaka kukila pa 750. Uno keyala ubena kukwasha byepi bantu bavula bakeba kufunda bukine? Akimonai kino kyamwekele: Ba mulume ne mukazhi bamo kibalefwile bingi byo bamwene bukamfutumfutu buji mu machechi. Byo bakebelenga kuyuka Lesa, bataaine keyala wetu. Bamwingijishanga kimye kyonse kutanga bibaaba bya mu mabuku etu ne kutamba mavidyo. Bakopolwele ne kabuku ka Kubalaula Binembelo Moba Onse kabiji batanga kano kabuku pa juba pa juba na baana babo. Bakamonyi ba kwa Yehoba byo baishile ku nzubo yabo bebataaine saka babena kubalaula. Bakamonyi bayukile’mba akino kisemi kyapimpwile byubilo byabo na mambo a kwingijisha keyala wetu kimye kyonse. Bafuuchile nnembo, bavuujile byo bakobaikile pa mubiji, batayile bipashañano bya bupopweshi, balekele kusekelela moba a kukokoloka a ntanda, kabiji balekele ne kutamba mafilimu atama, balekele kuba bino saka bakyangye ne kwibafwakesha ku ba mulume ne mukazhi Bakamonyi! Kimye kyo twanembelenga bino byambo, bansemi ne mwanabo umo saka baikala kala basapwishi babula kubatizhiwa kabiji bansemi babena kwinengezha kubatizhiwa katataka.

Twatambwila byambo byavula bya kusanta pa kintu kikwabo kyawama: TV wa JW. Uno mutanchi wa pa ñondo pa ñondo bamutuntulula mu milaka kukila pa 70, kabiji kuji ne milaka ikwabo ikamutuntulula. Bisemi byavula bitamba uno mutanchi pa Kupopwela kwa Kisemi. Mulongo umo waambile’mba: “Jibumba ja Yehoba byo jibena kubayilako; akino kitulengela kuyuka bulongo Jibumba Jitangijila ne balongo bebakwashako!”

Bantu ba Yehoba batemwa bingi kushonkena pamo, kabiji kushonkena kwajingako mwaka wapwa wa 2015 kwawamine bingi. Pa kuno kushonkena bamwesheshepo mavidyo 42, bipikichala ne nyimbo itanu na umo yo bajizhizhenga kipungu saka kikyangye kutendeka. Mulongo umo waambile pa kushonkena amba, “Kafwako muntu nangwa umo wakebelenga kulupuka kimye kya majashi ne, mambo kechi bakebelenga kushalapo pa jashi nangwa jimo ne.” Mishonale umo waambile pa kushonkena kwa mwaka wapwa amba, “Mavidyo andengejile kumvwisha bukine ne kuba’mba Bufumu kine kobuji.”

Kabiji mwaka wapwa, Yehoba witubijile bintu byawama pa kwitupa nyimbo ya katataka ya Bufumu. Ba mulume ne mukazhi bamo, baambile’mba: “Nyimbo ya katataka ke bupe bwawama bwafuma kwi Yehoba. Kwimba ino nyimbo itukwasha kukepeshako bijikila.” Kushonkena kwitulengejile kuyuka mwingilo mukatampe uji na banyimbi ba ba Watchtower ne byo bemba, pa kuba’mba atweba bonse tumutote Yehoba!

Nanchi kipwilo kyenu kibena kusapwila kwingijisha matebulu pa kutanchika mabuku ku mpunzha kuji bantu bavula nyi? Ajino ke jishinda jawama bingi ja kwingijisha pa kusapwila! Bantu bamo bekala mu mpunzha mwakatazha kufika, babena kumvwa bukine, kabiji bantu bavula kuvwangakotu ne Bakamonyi baleka kupwila ne kusapwila nabo babena kumwenamo mu uno mutanchi. Mu January 2015, mwanamulume umo wa ku South Korea wafikile po batanchika mabuku. Waambile’mba, watendekele kala kulanguluka kukeba kufunda pe Lesa. Watendekele kufunda Baibolo. Mu February wayile na kupwila kimye kitanshi; kabiji mu March walekele kupepa fwanka. Mu April, wayile na kufwakasha ku musampi wa mu South Korea, kabiji watwajijila kufunda Baibolo. Abino ke bintutu bicheche byo twatambwila kuno ku ofweshi mukatampe wa ntanda yonse.

Twaketekela kuba’mba byambo byo twafunjile pa kushonkena bikakwasha bantu bavula balekele kwingijila Yehoba kubwela kwi aye saka kukiji kimye! Tubena kwimutundaika anweba bonse kuba’mba mwikale na muchima ujipo ne Yehoba, wa kutambwilanga bonse babena kubwela kwi aye.—Ezi. 34:16.

Kine, Yehoba waubijile bantu banji bintu byawama bingi mwaka wapwa. Ñanyi bintu bikwabo byo tubena kukeba? Twafwainwa kutwajijila kupembelela. Onkao mambo, yukai’mba atweba ba mu Jibumba Jitangijila twimutemwa bingi anweba bonse kabiji twimulombelako kimye kyonse.

Mwingilengatu bulongo,

Atweba balongo benu,

Jibumba Jitangijila ja Bakamonyi ba kwa Yehoba