Kushimika Bukiji Mazubo a Bufumu

KYAWAMA bingi Yehoba byo etukwasha kusampanya bukine mwaya ntanda yonse! (Isa. 60:22) Na mambo a kino, kubena kukebewa Mazubo a Bufumu avula. Mwaya ntanda yonse, kubena kukebewa kushimika Mazubo a Bufumu kukila pa 13,000 nangwa kuwamisha ajipo.

Pa kuba’mba uno mwingilo bamwingile bulongo kwa kubula kutayapo mali avula, Jibumba Jitangijila japanako mashinda akwabo apeela ku dipatimenti utala pa bya buntungi. Katatakatu papo balengele Dipatimenti wa Ntanda Yonse Ulenga Bikekala Bishimikwa ne Dipatimenti Utala pa bya Buntungi, waikela pa ofweshi mukatampe wa ntanda yonse mu Brooklyn ku New York. Kabiji jino jibumba jibena kwingila bukiji mwingilo wa kushimika ne kuwamisha mapunzha a kupwilapo ntanda yonse. Dipatimenti Ulenga Bikekala Kishimikwa ne Madipatimenti Atala pa bya Buntungi aikela ku musampi wa ku Australasia, ku Central Europe, ku South Africa ne ku United States abena kunengezha bya buntungi mu byalo mo baji kuba’mba bafwainwa kupwisha kushimika bukiji Mazubo a Bufumu kwa kubula kutayapo mali avula. Ano madipatimenti nao afunjisha balongo baji pa musampi bya kuwamisha bishimikwa byo tupopwelamo Lesa biji mu nyaunda ya musampi. Kabiji pa musampi yense paji Dipatimenti Ulenga Bikekala Kishimikwa ne Madipatimenti Atala pa bya Buntungi anengezha bya kushimika ne kuwamisha Mazubo a Bufumu ne Mazubo a Kubuñenamo.

Mu January 2015, bakulumpe bonse mu bipwilo bya mu United States batainwe ku kusambakana ko besambilenga pamo pa bya kunengezha ne kushimika ne kulama bulongo Mazubo a Bufumu. Abino byo byo bafunjile.

• Buntungi: Mazubo a Bufumu ne bintu bya kwingijisha bikayilanga monka mwayila mpunzha kwesakana na mikambizho yapana Kavoto ka Kusampanya ka Jibumba Jitangijila. Abino bishimikwa kechi bikakatazhanga kwibiwamisha ne, bikekalanga myaka yavula, pano bino bikamwekanga bulongo kabiji kechi pakataiwanga mali avula ne.

• Kuwamisha paonaika: Mu bipwilo byonse bakafunjishamo basapwishi bakulama bulongo mapunzha etu a kupwilapo pa kuba’mba akabulenga konaika bukiji.

Mwingilo wa kushimika ne kulama bulongo kishimikwa wabaya bingi. Pano bino, kwingijila pamo kwa bantu ba Lesa kukalengela uno mwingilo kupwa bukiji kwa kubula konauna mali.